នៅថ្ងៃទី១៤ ខែកុម្ភៈ ឆ្នាំ២០២៤ និស្សិតប្រមាណ ២៥០នាក់ មកពីវិទ្យាស្ថានពហុបច្ចេកទេសខេត្តកំពង់ស្ពឺ បានអញ្ជើញមកចូលរួមក្នុងកម្មវិធីទស្សនកិច្ចសិក្សារៀបចំឡើងដោយ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.)។
ក្នុងដំណើរទស្សនកិច្ចសិក្សានោះ និស្សិតទាំងអស់ត្រូវបាននាំយកទៅទស្សនកិច្ចសិក្សា និងស្ដាប់ការបកស្រាយពីមគ្គុទេសក៍ជំនាញអំពីសំណង់ ខ្លឹមសារ គោលគំនិតនៃការសាងសង់នៃវិមានឈ្នះ-ឈ្នះ ជាពិសេសអំពីប្រវត្តិសាស្ត្រយោធានៅវិមានឈ្នះ-ឈ្នះ។
នៅក្នុងបរិវេណវិមានឈ្នះ-ឈ្នះ និស្សិតក៏ទទួលបានការធ្វើបទបង្ហាញរបស់មន្ដ្រីមកពីសាលាក្ដីខ្មែរក្រហម អំពីដំណើរការជំនុំជម្រះក្ដី និងសមិទ្ធផលដែលទទួលបានពីការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហម។ បន្ទាប់មកក្រុមនិស្សិតក៏ត្រូវបាននាំយកទៅទស្សនកិច្ចសិក្សាស្វែងយល់អំពីស្លាកស្នាម និងសោកនាដកម្មរបស់ប្រជាជនកម្ពុជានៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែងផងដែរ។
សាស្ដ្រាចារ្យដែលបានដឹកនាំនិស្សិតចូលរួមក្នុងទស្សនកិច្ចសិក្សានេះ បានលើកឡើងថា ដំណើរទស្សនកិច្ចនេះជាផ្នែកមួយដ៏សំខាន់សម្រាប់និស្សិតដើម្បីស្វែងយល់ពីប្រវត្តិសាស្រ្ត ជាពិសេស របបកម្ពុជាប្រជាធិបតេយ្យ ការកាត់ទោសមេដឹកនាំខ្មែរក្រហម។ អ្នកស្រីន្ថែមថា ការទស្សនាវិមាន ឈ្នះ-ឈ្នះ ក៏ជាចំណែកមួយដែលឲ្យនិស្សិតយល់ដឹងពីប្រភពនៃការកើតឡើងនៃរបបខ្មែរក្រហម ការតស៊ូរបស់ថ្នាក់ដឹកនាំក្នុងការរំដោះប្រទេសពីគុកឥតជញ្ជាំងមួយនេះ រហូតអាចនាំឱ្យកម្ពុជាទទួលបានសុខសន្ដិភាពពេញលេញបាន។
អ្នកស្រី ក៏បានថ្លែងនូវការកោតសរសើរ និងដឹងគុណដល់គោលនយោបាយ ឈ្នះ-ឈ្នះ របស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព ស្ថេរភាពសង្គម និងរីកចម្រើនគ្រប់វិស័យ។ អ្នកស្រីក៏សូមអរគុណដល់ អ.វ.ត.ក. ផងដែរ ដែលបានរៀបចំកម្មវិធីនេះឡើង ដើម្បីឲ្យយុវជនបានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះ។
សូមបញ្ជាក់ថា កម្មវិធីទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ២០០៩ រហូតមកដល់ឆ្នាំ ២០២៤ នេះ មានសាធារណៈជនជាតិ និងអន្តរជាតិ ជាង ៦៥ ម៉ឺននាក់ហើយដែលបានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
