មន្ដ្រីផ្នែកកិច្ចការសាធារណៈ នៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅព្រឹកថ្ងៃទី ២០ ខែ មេសា ឆ្នាំ ២០២៣ បានទទួលស្វាគមន៍ និងធ្វើបទបង្ហាញអំពីសារៈសំខាន់នៃការជំនុំជម្រះក្ដីលើឧក្រិដ្ឋកម្មដែលបានកើតឡើងនៅក្នុងកម្ពុជាប្រជាធិបតេយ្យ ជូនសិស្សានុសិស្សប្រមាណ ១៥០ នាក់ ដែលបានចូលរួមក្នុងកម្មវិធីទស្សនកិច្ចសិក្សារៀបចំដោយ អ.វ.ត.ក។ សិស្សានុសិស្សទាំងអស់នេះមកពីវិទ្យាល័យ ហ៊ុន សែន បាធាយ និងវិទ្យាល័យ ហ៊ុន សែន ជើងឆ្នុក ក្នុងស្រុកបាធាយ ខេត្តកំពង់ចាម។
ក្នុងដំណើរទស្សនកិច្ចសិក្សានៅថ្ងៃនេះ សិស្សានុសិស្សបានទៅទស្សនកិច្ចនៅវិមានឈ្នះ ឈ្នះ មជ្ឈ មណ្ឌលប្រល័យពូជសាសន៍ជើងឯក និងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង។ គោលបំណងនៃទស្សនកិច្ចសិក្សានេះ គឺដើម្បីឱ្យសិស្សានុសិស្ស ចងចាំអំពីសោកនាដកម្មនៅក្នុងរបបខ្មែរក្រហម យល់ដឹងអំពីសមិទ្ធិផលសម្រេចបានដោយ អ.វ.ត.ក និងការរំដោះប្រទេសជាតិពីរបបប្រល័យពូជសាសន៍។
បទបង្ហាញដែលធ្វើឡើងនៅក្នុងបរិវេណ វិមានឈ្នះ ឈ្នះ មន្ដ្រីផ្នែកកិច្ចការសាធារណៈបានជម្រាបជូនសិស្សានុសិស្ស អំពីដំណើរការជំនុំជម្រះក្ដីដោយ អ.វ.ត.ក លើអតីតមេដឹកនាំជាន់ខ្ពស់ និងអ្នកទទួលខុសត្រូវលើឧក្រិដ្ឋកម្មធ្ងន់ធ្ងរបំផុតដែលកើតមានឡើងក្នុងរបបខ្មែរក្រហម និងសមិទ្ធិផលដែលសម្រេចបានពីការជំនុំជម្រះក្ដីនេះ។ មន្ដ្រីរូបនេះក៏បានបញ្ជាក់ផងដែរថា គោលបំណងនៃការជំនុំជម្រះក្ដីនេះ គឺដើម្បីស្វែងរកយុត្តិធម៌ជូនជនរងគ្រោះ ការស្វែងរកការពិត ការផ្សះផ្សារជាតិ ការផ្សះផ្សារផ្លូវចិត្តជនរងគ្រោះ និងការចងចាំអំពីឧក្រិដ្ឋកម្មដែលបានកើតមានឡើងនៅក្នុងរបបប្រល័យពូជសាសន៍។
តំណាងសិស្សានុសិស្សបានថ្លែងកោតសរសើរ និងអរគុណដល់សាលាក្ដីខ្មែរក្រហមដែលបានរៀបចំកម្មវិធីទស្សនកិច្ចសិក្សានេះឡើង ដើម្បីឱ្យយុវជនបានស្វែងយល់ច្បាស់អំពីប្រវត្តិសាស្ដ្ររបស់កម្ពុជា។ លោកក៏បានថ្លែងអំណរគុណដល់ប្រមុខរាជរដ្ឋាភិបាលផងដែរ ដែលលោកបានដឹកនាំប្រទេសកម្ពុជាឱ្យទទួលបានសុខសន្ដិភាព និងបានរីកចម្រើនគ្រប់វិស័យរហូតមកដល់សព្វថ្ងៃនេះ។
សូមបញ្ជាក់ថា ដំណើរទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីតុលាការដំណើការដំបូង រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
