ភ្នំពេញ ប្រទេសកម្ពុជា – អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) នៅថ្ងៃទី៣១ ខែមករា ឆ្នាំ២០២៣ នេះ បានប្រកាសដាក់ឲ្យដំណើរការរថយន្តក្រុងអ.វ.ត.ក. ឬក៏ហៅថា មជ្ឈមណ្ឌលធនធានចល័ត ក្នុងគោលបំណង ដើម្បីបម្រើដល់ការងារផ្សព្វផ្សាយនិងការងាររអប់រំរបស់អ.វ.ត.ក. ពាក់ព័ន្ធនឹងដំណើរការកាត់សេចក្តី សិមិទ្ធផល និង កេរដំណែលរបស់ខ្លួន ឱ្យកាន់តែទូលំទូលាយដល់សាធារណជន សិស្ស និស្សិត យុវជន សហគមន៍ និង ដើមបណ្តឹងរដ្ឋប្បវេណី ដែលរស់នៅក្នុងតំបន់ដែលមានភូមិសាស្ត្រដាច់ ស្រយាល។ រថយន្តក្រុងអ.វ.ត.ក.ចល័ត គឺជាផ្នែកមួយនៃការពង្រីកវិសាលភាព នៃមជ្ឈមណ្ឌលធនធានអ.វ.ត.ក. ដែលមានស្រាប់ ដែលបានបង្កើតឡើងកាលពីថ្ងៃទី២៧ ខែកញ្ញា ឆ្នាំ២០២៤ ក្រោមអធិបតីភាព ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងារទទួលបន្ទុកការអនុវត្តមុខងារសេសសល់របស់អ.វ.ត.ក.។
ពិធីប្រកាសដាក់ឲ្យដំណើរការរថយន្តក្រុងអ.វ.ត.ក.ចល័ត ត្រូវបានប្រារព្ធឡើងក្រោមកិច្ចសហប្រតិបត្តិការជាមួយសាកលវិទ្យាល័យភូមិន្ទភ្នំពេញនិងដោយមានការអញ្ជើញចូលរួមជាគណៈអធិបតីពីសំណាក់ឯកឧត្តមសាស្ត្រាចារ្យ ជេត ជាលី សាកលវិទ្យាធិការ និងថ្នាក់ដឹកនាំពាក់ព័ន្ធផ្សេងទៀត នៃសាកលវិទ្យាល័យភូមិន្ទភ្នំពេញ។
ឯកឧត្តម ក្រាញ់ តូនី ប្រធានរដ្ឋបាលស្តីទីនៃ អ.វ.ត.ក. មានប្រសាសន៍ថា៖ «រថយន្តក្រុងអ.វ.ត.ក.ចល័ត ត្រូវបានបំពាក់ដោយបច្ចេកវិទ្យាចុងក្រោយ ដូចជាកុំព្យូទ័រយួរដៃទំនើប, បន្ទប់ប្រជុំដែលភ្ជាប់ជាមួយម៉ាស៊ីនបញ្ចាំងរូបភាព, ទូរទស្សន៍អេក្រង់អន្តរកម្ម ដែលអាចគូសវាសដោយផ្ទាល់ងាយស្រួលសម្រាប់ធ្វើបទបង្ហាញ និងសម្រាប់ចាក់បញ្ចាំងវីដេអូ, និងសម្ភារៈអប់រំ និងមាតិកាពហុព័ត៌មានជាច្រើនទៀត ពាក់ព័ន្ធនឹងដំណើរការកាត់សេចក្តីរបស់អ.វ.ត.ក. ដែលនឹងបម្រើឲ្យការសិក្សាស្រាវជ្រាវរបស់សាធារណជន សិស្ស និស្សិត ជាដើម»។ លោកបន្ថែមទៀតថា៖ «រថយន្តក្រុងអ.វ.ត.ក.ចល័ត នឹងធ្វើដំណើរទូទាំងប្រទេសកម្ពុជានៃ២៥ខេត្តក្រុង ហើយនឹងឈប់នៅគ្រប់ទីតាំងសំខាន់ៗ ដូចជាសាលារៀន សាកលវិទ្យាល័យ ទីប្រជំុជន វត្តអារាម ផ្សារ និងដើម្បីនាំអ.វ.ត.ក. ទៅជួបប្រជាជនកម្ពុជា។ ជាដំណាក់កាលដំបូង រថយន្តក្រុងអ.វ.ត.ក. នឹងចាប់ផ្តើមធ្វើដំណើរនៅក្នុងរាធានីភ្នំពេញ ហើយឈប់នៅស្ថាប័នអប់រំ ជាពិសេស សាលារៀន និងសាកលវិទ្យាល័យ ដែលជាកន្លែង អ.វ.ត.ក. អាចភ្ជាប់ទំនាក់ទំនងជាមួយយុវជន និង បង្កើតកិច្ចសន្ទនាអន្តរជំនាន់ ដើម្បីពិភាក្សាអំពីដំណើការកាត់សេចក្តី និងកេរដំណែលរបស់អ.វ.ត.ក. ជាមួយពួកគេ»។
ឯកឧត្តមសាស្ត្រាចារ្យ ជេត ជាលី សាកលវិទ្យាធិការ នៃសាកលវិទ្យាល័យភូមិន្ទភ្នំពេញ បានចូលរួមអបអរសាទរចំពោះការប្រកាសដាក់ឲ្យដំណើរការរថយន្តក្រុងអ.វ.ត.ក.ចល័ត នៅថ្ងៃនេះ ហើយបានវាយតម្លៃខ្ពស់ផងដែរ ចំពោះកិច្ចសហប្រតិបត្តិការជាមួយអ.វ.ត.ក. និងក៏បានកោតសរសើរចំពោះការងារកាត់សេចក្តី និងការងារផ្សព្វផ្សាយរបស់សាលាក្តីខ្មែរក្រហមកន្លងមក។
ក្នុងឱកាសនៃពិធីនេះដែរ គណៈអធិបតី និង សិស្សនិស្សិតប្រមាណជាង៥០នាក់ បានអញ្ជើញទស្សនារថយន្តក្រុងអ.វ.ត.ក.ចល័ត អមដោយការធ្វើបទបង្ហាញពីមន្ត្រីផ្នែកពាក់ព័ន្ធនៃអ.វ.ត.ក. អំពីឧបករណ៍សំខាន់ៗដែលបានបំពាក់ក្នុងរថយន្តក្រុង និងសម្ភារៈអប់រំនានាទាក់ទងនឹងការជំនុំជម្រះក្តី និងការស៊ើបអង្កេតក្តីក្នុងរយៈពេល១៦ឆ្នាំ។ នៅចុងបញ្ចប់ពិធី អ.វ.ត.ក. បានរៀបចំវេទិកាកិច្ចពិភាក្សាខ្លីមួយ ដែលមានការចូលរួមពីតំណាងដើមបណ្តឹងរដ្ឋប្បវេណីចំនួន២រូប និង តំណាងនិស្សិតចំនួន២រូប ក្នុងគោលបំណងសំខាន់ ដើម្បីចែករំលែកបទពិសោធន៍របស់ពួកគាត់ ក្នុងពេលចូលរួមក្នុងដំណើរការសវនាក្តីកន្លងមក។
គួរបញ្ជាក់ផងដែរថា មជ្ឈមណ្ឌលធនធាននេះ មានសមាសភាគសំខាន់ៗចំនួន៦ ដែលរួមមាន៖ (ទី១) បណ្ណាល័យនិងកន្លែងស្រាវជ្រាវ, (ទី២).គេហទំព័រថ្មីដែលកំពុងកែលម្អនិងធ្វើបច្ចុប្បន្នភាព, (ទី៣).និហិតដ្ឋានបណ្ណសារ, (ទី៤).បន្ទប់ប្រើប្រាស់ពហុបំណងសម្រាប់រៀបចំសិក្ខាសាលានិងតុលាការត្រាប់, (ទី៥).បន្ទប់ពិគ្រោះយោបល់និងតាំងពិព័រណ៍, និង (ទី៦).ឧទ្យានសម្រាប់ការចងចាំ។ មជ្ឈមណ្ឌលធនធាន មានទីតាំងនៅក្នុងបរិវេណការិយាល័យថ្មីរបស់អ.វ.ត.ក. អគារលេខ៤០ មហាវិធីសហព័ន្ធរុស្សី (ផ្លូវ១១០) សង្កាត់មិត្តភាព ខណ្ឌ៧មករា ភ្នំពេញ។ ក្នុងចំណោមសមាសភាគសំខាន់ៗខាងលើនេះ បណ្ណាល័យនៃមជ្ឈមណ្ឌលធនធាន អ.វ.ត.ក. កំពុងបើកបម្រើជាសាធារណៈ ចាប់ពីម៉ោង៩ព្រឹក ដល់ម៉ោង៨យប់ សម្រាប់ថ្ងៃចន្ទដល់ថ្ងៃសុក្រ និងចាប់បើកពីម៉ោង៩ព្រឹក ដល់ម៉ោង៦ល្ងាច សម្រាប់ថ្ងៃចុងសប្តាហ៍ និងថ្ងៃឈប់សម្រាក។
ទស្សនាព័ត៌មានជាវិដេអូនៅទីនេះ៖ អ.វ.ត.ក. ប្រកាសដាក់ឲ្យដំណើរការរថយន្តក្រុង - មជ្ឈមណ្ឌលធនធានចល័ត
