សេចក្តី​ប្រកាស​ព័ត៌មាន​ក្នុង​នាម​សហ​ព្រះរាជអាជ្ញា

ថ្ងៃនេះ អង្គជំនុំជម្រះតុលាការកំពូលបានតម្កល់ការផ្តន្ទាទោសលើ ខៀវ សំផន - ប្រមុខរដ្ឋនៃរបបកម្ពុជាប្រជាធិប តេយ្យ និងជាមេដឹកនាំជាន់ខ្ពស់បំផុតម្នាក់នៃរបបខ្មែរក្រហម - សម្រាប់ អំពើប្រល័យពូជសាសន៍ ឧក្រិដ្ឋកម្ម​ប្រឆាំង​មនុស្ស​ជាតិ និងការរំលោភបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវ​ ឆ្នាំ១៩៤៩។ ការផ្តន្ទាទោស​ទាំងនេះ​ពាក់​ព័ន្ធនឹងការប្រហារជីវិតក្រៅប្រព័ន្ធតុលាការនៅទូទាំងប្រទេសលើអ្នកទាំងឡាយដែលរបបនោះសន្មត់ថាជាអ្នកប្រឆាំងនឹងរបបខ្លួន រួមទាំងបុរស ស្ត្រី និងកុមារជាង ១២​​​​​​​​​​​​​​​​​​​​​​​​​​​​​​​​ ០០០ នាក់ ដែលត្រូវបានគេធ្វើទារុណកម្ម និងសម្លាប់​នៅ​ក្នុង​មន្ទីរ​សន្តិ​សុខ​ស-២១ (ទួលស្លែង) នៅ​កណ្តាលរាជធានីភ្នំពេញ ការ​ដាក់ក្នុងមន្ទីរឃុំឃាំង​ដោយ​ខុសច្បាប់​លើបុគ្គល​ដែល​គេ​សន្មត់​ថាជាខ្មាំង​​នៅ​ក្នុង​មន្ទីរ​សន្តិសុខ​នៅ​ទូទាំង​ប្រទេស​កម្ពុជា ការដាក់ប្រជាជនឲ្យទៅជាទាសករនៅតាមការដ្ឋាន និង​សហ​ករណ៍នៅទូទាំងប្រទេស ការរៀបអាពាហ៍ពិពាហ៍ដោយបង្ខំ និងការបង្ខំឲ្យរួមដំណេក​ក្នុង​បរិបទ​នៃការរៀប​អាពាហ៍​ពិពាហ៍ដោយបង្ខំ ការធ្វើទុក្ខបុកម្នេញលើពុទ្ធសាសនិកជន និងសហគមន៍ចាម ក៏ដូចជា​អតីតមន្ត្រីរបបសា​ធារណៈ​រដ្ឋខ្មែរ និង​យុទ្ធនាការ​ប្រល័យពូជសាសន៍​សំដៅ​ប្រឆាំង​នឹង​​ជាតិពន្ទុ​វៀតណាម​ដែល​តាំង​ទីលំនៅ​យូរ​មក​ហើយ​នៅ​​ក្នុង​ប្រទេសកម្ពុជា។

ចៅក្រមនៃអង្គជំនុំជម្រះតុលាការកំពូលបានតម្កល់ការរកឃើញជាច្រើនដែលធ្វើឡើងដោយចៅក្រមនៃអង្គជំនុំជម្រះ សាលដំដូង​នៅក្នុងសាលក្រមលម្អិតយ៉ាងល្អិតល្អន់របស់ពួកគេ ដែលមានចំនួនរហូតដល់ទៅ ៣​៩០០ ទំព័រជា​ភាសា​ខ្មែរ។ សាលដីកាបណ្តឹងសាទុក្ខថ្ងៃនេះ និងសាលក្រមអង្គជំនុំជម្រះសាលាដំបូង មាន​ការរកឃើញជាច្រើនអំពីជម្រៅ និង​ទំហំនៃឧក្រិដ្ឋកម្មដែលប្រព្រឹត្តដោយរបបខ្មែរក្រហមពី ឆ្នាំ១៩៧៥ ដល់ឆ្នាំ១៩៧៩។ មេដឹកនាំបក្សកុម្មុយនិស្តកម្ពុជា រួមទាំង ខៀវ សំផន បានហាមឃាត់ការប្រតិបត្តិសាសនាទាំងអស់ បានជម្លៀសប្រជាជនចេញពីទីក្រុង និង​ទី​ប្រជុំ​ជន​នានា​របស់ប្រទេសកម្ពុជា និងបានដាក់ប្រជាជនរបស់​ខ្លួនឲ្យទៅជាទាសករ បានលុបបំបាត់លុយ និងផ្សារ និង បាន​ដាក់​ប្រជាជនជាសមូហភាពដោយបង្ខំ។ របបនេះបានព្យាយាមបំបែកចំណងគ្រួសារបែបប្រពៃណី ដោយបាន​បង្ខំ​មនុស្ស​មិនស្គាល់គ្នាឲ្យរៀបអាពាហ៍ពិពាហ៍នឹងគ្មា និងរួមរស់ជាមួយគ្នាក្រោមការគំរាមកំហែងនៃការសងសឹក ។ របប​នេះ​បាន​​សម្លាប់​ពលរដ្ឋ​ស្លូតត្រង់​រាប់​ម៉ឺន​នាក់ឥតបង្អង់។ នៅក្នុងកិច្ចខិតខំប្រឹងប្រែងដ៏ខុសឆ្គងដើម្បីបង្កើតជាឋាន សួគ៌កសិកម្ម វាបានចាត់មនុស្សរាប់លាននាក់​ឲ្យធ្វើការ​លើ​គម្រោង​ដាំដុះស្រូវ និងប្រព័ន្ធធារាសាស្រ្តដែលពិបាកអនុវត្តទៅបាន។ ប្រជាជនភាគច្រើនមិនមានអាហារគ្រប់គ្រាន់ និង​មិនបានទទួលជំនួយផ្នែកវេជ្ជសាស្រ្ដត្រឹមត្រូវ ហើយមនុស្សរាប់សែននាក់បានស្លាប់ដោយសារកង្វះអាហារូបត្ថម្ភ និង​​ការហត់នឿយដែលជៀសមិនអាចចៀសបាន។

ទំហំ​នៃ​ឧក្រិដ្ឋកម្ម​ទាំង​នេះ​មាន​ទំហំ​ធំធេង​មិន​អាច​វាស់វែង​បាន។ នៅចំពោះមុខឧក្រិដ្ឋកម្មបែបនេះ គ្មានតុលាការ​ណា​អាចផ្តល់​យុត្តិធម៌ពេញលេញដល់ជនរងគ្រោះទាំងអស់ ហើយក៏មិនអាចដាក់​អ្នកដែលទទួល​ខុសត្រូវទាំងអស់​ឲ្យទទួល​ខុស​ត្រូវចំពោះឧក្រិដ្ឋកម្មទាំងនោះបានដែរ។ ប៉ុន្តែដោយសារការខិតខំប្រឹងប្រែងរបស់សហការីជាតិ និង អន្តរ​ជាតិ​ជា​ច្រើន ដែលបានខិតខំធ្វើការដើម្បីជួយចៅក្រម និងតំណាងភាគីការពារក្តី ភាគីអយ្យការ និងដើមបណ្តឹងរដ្ឋ ប្បវេណី អស់​រយៈ​ពេល​ជាច្រើនឆ្នាំមកនេះ ទើបមានវិធានការយុត្តិធម៌សម្រាប់មនុស្សរាប់លាននាក់ដែលបានទទួល រងគ្រោះ និង​បាត់បង់ជីវិតដោយសាររបបខ្មែរក្រហម។

នៅថ្ងៃប្រវត្តិសាស្ត្រនេះ យើងទទួលស្គាល់នូវភាពក្លាហានរបស់សាក្សី និងជនរងគ្រោះជាដើមបណ្តឹងរដ្ឋប្បវេណី​រាប់​រយ​នាក់ ដែលបានចេញមកផ្តល់ភ័ស្តុតាងដល់តុលាការនេះ។ ក្នុង​ការ​ធ្វើ​ដូច្នេះ មនុស្ស​ជា​ច្រើន​ត្រូវ​រំឮកឡើងវិញ​​នូវ​ព្រឹត្តិ​ការណ៍​​ដែល​ធ្វើឲ្យ​ពួក​គេ​មាន​ការ​ឈឺ​ចាប់ និង​ទុក្ខ​វេទនា​ជា​ខ្លាំង។ ជាពិសេស យើងទទួល​ស្គាល់​អ្នក​រស់​រាន​មាន​ជីវិតពី​អំពើ​ហឹង្សាផ្លូវភេទ ដែលយល់ព្រមផ្តល់ភ័ស្តុតាង ហើយត្រូវរំឮកឡើងវិញនូវការឈឺចាប់ដែលបាន​រំលោភយ៉ាងធ្ងន់ធ្ងរ​ដល់​សេចក្តីថ្លៃថ្នូរផ្ទាល់ខ្លួនរបស់ពួកគេ។ បើគ្មានភាពក្លាហានរបស់ពួកគេទេ ចៅក្រមនៃតុលាការនេះនឹងមិន​ទទួលបាន​ភ័ស្តុតាងគ្រប់គ្រាន់ដែលមានសារៈសំខាន់ក្នុងការបង្ហាញការពិតទាក់ទងនឹងឧក្រិដ្ឋកម្មដែលបានប្រព្រឹត្តឡើងដោយខ្មែរក្រហមនោះឡើយ។

យើងសូមអរគុណចំពោះប្រជាជនកម្ពុជាទាំងអស់ សម្រាប់ការចូលរួមរបស់ពួកគេក្នុងកិច្ចដំណើរការនីតិវិធី ដែលមាន​ចំនួន​ជាង ២៣០ ០០០ នាក់ ក្នុងចំណោមពួកគេទាំងនោះ បានមកតុលាការនេះដោយផ្ទាល់ ដើម្បីតាមដាន​កិច្ចដំណើ​ការ​នីតិ​វិធីពីសាលសាធារណៈ។

ថ្ងៃនេះ យើងក៏ទទួលស្គាល់ផងដែរនូវការខិតខំប្រឹងប្រែងរបស់ប្រជាជនកម្ពុជា និងបរទេសជាច្រើននាក់ ដែលបាន​ធ្វើ​ការ​ដោយមិនចេះនឿយហត់ ទាំងមុន និងក្នុងអំឡុងពេលដំណើរការទាំងមូលនៃតុលាការនេះ ដើម្បីកំណត់ទីតាំង រក្សា​ទុក និងវិភាគបញ្ជីឈ្មោះអ្នកទោសរាប់ពាន់នាក់ កំណត់ហេតុកិច្ចប្រជុំ ការទំនាក់ទំនងផ្ទៃក្នុង ការបោះពុម្ពផ្សាយ និង​រូប​ថត ដែលបង្កើតឡើងដោយអាជ្ញាធរខ្មែរក្រហមខ្លួនឯង។ កំណត់ត្រាសហសម័យទាំងនោះត្រូវបានដកស្រង់ និង​ពឹង​ផ្អែកលើដោយគ្រប់ភាគីទាំងអស់។ ពួកវាគឺជាប្រភពនៃភ័ស្តុតាងមានតម្លៃមិនអាចគណនាបាន ដែលតុលា ការនេះ​អាចពឹងផ្អែកដោយសុវត្ថិភាពក្នុងកិច្ចខិតខំប្រឹងប្រែងរបស់ខ្លួនដើម្បីបង្ហាញការពិតអំពីឧក្រិដ្ឋកម្មដែលមានការរៀបចំ ដោយ​ចេតនា និងជាប្រព័ន្ធរបស់ថ្នាក់ដឹកនាំនៃរបបខ្មែរក្រហម។ ភ័ស្តុតាងសហសម័យនោះ គឺជាឧបសគ្គ​ដែលមិន​អាច​កាត់ថ្លៃបានចំពោះអ្នកទាំងឡាយណាដែលថ្ងៃណាមួយអាចស្វែងរកការកាត់បន្ថយទំហំ និងលក្ខណៈ​ជាប្រព័ន្ធ​នៃ​ឧក្រិដ្ឋកម្ម​ទាំងនោះ។ សាលដីកាស្ថាពរថ្ងៃនេះ និងសាលក្រមផ្សេងទៀតក្នុងរឿងក្តីនេះ និងនៅក្នុង​សំណុំរឿង​មុនៗ​របស់​វា គឺសំណុំរឿង ០០២/០១ និងសំណុំរឿង ០០១ នឹងឈរជារៀងរហូតធ្វើជាកំពែងប្រឆាំងនឹងសើរើនិយម។

តុលាការ​នេះបានរួមចំណែកដែលមិនអាចកាត់ថ្លៃបានដល់កិច្ចខិតខំប្រឹងប្រែងជាសកល ក្នុងការប្រយុទ្ធប្រឆាំង​នឹង​និទណ្ឌ​ភាព​ចំពោះឧក្រិដ្ឋកម្មទ្រង់ទ្រាយធំដ៏ឃោរឃៅ។ វា​បាន​ពង្រឹង​ការគោរពនីតិរដ្ឋនៅកម្ពុជា និងបានជួយ​ព្យាបាល​របួស​ពីអតីតកាល ដែលអនុញ្ញាតឲ្យប្រជាជននៃប្រទេសនេះសំឡឹងឆ្ពោះទៅអនាគតប្រកបដោយសុទិដ្ឋិនិយម។​ វាបាន​ពង្រឹង​គោលការណ៍​ដែល​ថា អ្នកទាំងឡាយ​ដែលទទួល​ខុសត្រូវចំពោះអំពើឃោរឃៅ​ មិនអាចគេច​ផុតពីយុត្តិធម៌​ជា​រៀង​រហូតបានឡើយ​ ហើយនឹងត្រូវដាក់ឲ្យទទួលខុសត្រូវ៕

Most read