សហចៅក្រមរបាយការណ៍ដាក់ជូនរបាយការណ៍របស់ខ្លួន ស្តីពីមុខងារនៅសេសសល់ពាក់ព័ន្ធនឹងជនរងគ្រោះ

នៅ​ថ្ងៃនេះ សហចៅក្រមរបាយការណ៍​ស្តីពី​មុខងារ​នៅសេសសល់​​ពាក់ព័ន្ធ​នឹង​ជនរងគ្រោះ គឺលោកចៅក្រម យូ ឧត្តរា និង លោកស្រីចៅក្រម Claudia Fenz បាន​ដាក់ជូន​របាយការណ៍ដែល​មាន​មតិ​យោបល់ និង​អនុសាសន៍​នានា ស្តីពី​គំនិតផ្តួចផ្តើម​សមស្រប​នានា​ពាក់ព័ន្ធ​នឹង​ជនរងគ្រោះ​នៃ​របប​ខ្មែរ​ក្រហម ដែលអ.វ.ត.ក អាច​បំពេញ​ជា​ផ្នែក​នៃ​មុខងារ​របស់​ខ្លួន​ដែល​សេសសល់។

នា​ឱកាស​នេះ មាន​ការប្រគល់​ជូនរបាយការណ៍ផ្លូវ​ការដល់ឯកឧត្តម ក្រាញ់ តូនី ​ប្រធានស្តីទី​ការិយាល័យ​រដ្ឋបាល និង​លោក Knut Rosandhaug អនុប្រធាន​ការិយាល័យ​រដ្ឋបាល និង​ដោយ​មាន​វត្តមាន​ពី​លោក ហង្ស វណ្ណៈ ប្រធាន​អង្គភាពគាំពារជន​រង​គ្រោះ នៅ​អង្គជំនុំជម្រះ​វិសាមញ្ញ។

លោកចៅក្រម យូ ឧត្តរា បានកោតសរសើរការិយាល័យរដ្ឋបាល ចំពោះការចាប់ផ្តើមដំណើរការនេះ និងបានថ្លែងអំណរគុណដល់អ្នកចូលរួមចំណែកនានាដែលបានដាក់សារណាដ៏មានតម្លៃរបស់ខ្លួន៖ “យើងទទួលបាន​នូវការលើកទឹកចិត្ត តាមរយៈការបង្ហាញនូវការចាប់អារម្មណ៍យ៉ាងទូលំទូលាយ។ ឆ្លៀតឱកាសនេះ ខ្ញុំសូម​​លើកទឹកចិត្តភាគីពាក់ព័ន្ធដទៃទៀត ដោយរម្លឹកប្រាប់ពួកគាត់ថា ពួកគាត់នៅមានឱកាស និងពេលវេលា​ក្នុងការចូលរួមចំណែកក្នុងដំណើរការនេះ ដោយសារតែដំណើរការនេះទើបតែចាប់ផ្តើមប៉ុណ្ណោះ”។ ចៅក្រម យូ ឧត្តរា បានបន្ថែមទៀតថា សន្ទុះជុំវិញជនរងគ្រោះ អាចជា “យុត្តិសាស្រ្តដ៏គួរឲ្យរំភើបមួយសម្រាប់តុលាការនាពេល​អនាគត”។

លោកស្រី​ចៅក្រម Claudia FENZ បាន​កោតសរសើរចំពោះសមិទ្ធិផលរបស់ អ.វ.ត.ក ពាក់ព័ន្ធនឹងជនរង​គ្រោះ៖ អ.វ.ត.ក អាចមានមោទនភាពចំពោះគម្រោងនៃការចូលរួមរបស់ជនរងគ្រោះ ការតំណាង និងសំណងដែលខ្លួនបានបង្កើតឡើង។ វាមានលក្ខណះពិសេស និងមានការទទួលស្គាល់យ៉ាងទូលំទូលាយថាជាសមិទ្ធិផលដ៏សំខាន់មួយ។​ ខ្ញុំជឿជាក់ថា ដំណាក់កាលនៅសេស ​សេសរបស់ អ.វ.ត.ក ទទួល​ស្គាល់​ដោយ​ខ្លួន​ឯងថាជា​ការ​ចូល​រួម​ចំណែក​ដល់ដំណើរការ​ព្យាបាល​របួសស្នាមរបស់​ជន​រង​គ្រោះ និង​ការ​ជម្រុញ​ជា​ទ្រង់​ទ្រាយ​ធំដល់​ការ​ផ្សះផ្សារ​ជាតិ។ ជាថ្មីម្តងទៀត នៅពេលនេះ អ.វ.ត.ក អាចជាអ្នកនាំផ្លូវ តាមរយៈការបន្តចូលរួមយ៉ាងសកម្មជាមួយជនរងគ្រោះ ភាគីពាក់ព័ន្ធ និងប្រជាជនជាទូទៅ។ មានយុត្តិសាស្រ្តតិចតួចសម្រាប់ករណីនេះ ដែលធ្វើឲ្យវាក្លាយជាកិច្ចការកាន់តែមានអត្ថន័យបន្ថែមទៀត”។

ឯកឧត្តម ក្រាញ់ តូនី និងលោក Knut ROSANDHAUG ស្វាគមន៍ចំពោះរបាយការណ៍របស់សហចៅក្រម​របាយការណ៍ និងបានថ្លែងអំណរគុណយ៉ាងស្មោះសរដល់អ្នកចូលរួមចំណែកទាំងអស់ ចំពោះការចូលរួមយ៉ាងសកម្ម និងសារណារបស់ពួកគាត់។ ប្រធានស្តីទី​ការិយាល័យ​រដ្ឋបាល និង​អនុប្រធាន​ការិយាល័យ​រដ្ឋ  បាល បានគូសបញ្ជាក់អំពីការប្តេជ្ញាចិត្តរបស់ អ.វ.ត.ក ក្នុងការផ្សព្វផ្សាយសម្លេងរបស់ជនរងគ្រោះ​ដោយសារឧក្រិដ្ឋកម្មអន្តរជាតិ លើកទឹកចិត្តភាគីពាក់ព័ន្ធទាំងអស់ឲ្យនៅបន្តចូលរួមជាមួយគំនិតផ្តួចផ្តើម​នេះ និងរង់ចាំតាមដាននូវការវិវឌ្ឍន៍ថ្មីៗបន្ថែមទៀត។ ប្រធានស្តីទី​ការិយាល័យ​រដ្ឋបាល និង​អនុប្រធាន​ការិយាល័យ​រដ្ឋបាលមានប្រសាសន៍ថា “យើងយល់ស្របជាមួយនឹងសហចៅក្រមរបាយការណ៍ដែលថា ដំណាក់កាល​ថ្មីដ៏​គួរ​ឲ្យចាប់អារម្មណ៍នៅក្នុងប្រវត្តិសាស្រ្ត​នៃ អ.វ.ត.ក បានចាប់ផ្តើមបើកចំហចាប់ពីពេលនេះតទៅ”​។

សាវតារ៖ នៅ​ថ្ងៃទី​០២ ខែ​កក្កដា ឆ្នាំ​២០២១ ការិយាល័យ​រដ្ឋបាល​បាន​ចាត់តាំងលោក​ចៅក្រម យូ ឧត្តរា និង​លោកស្រី​ចៅក្រម Claudia Fenz ជាសហចៅក្រម​របាយការណ៍ ដើម្បី​ពិនិត្យ​ទៅលើ សេចក្តីព្រាងកិច្ចព្រម​ព្រៀង​បន្ថែម ទៅលើ​កិច្ចព្រម​ព្រៀង​រវាងអង្គការសហប្រជាជាតិ និង​រាជរដ្ឋាភិបាល​ ស្តីពី​ការ​រៀបចំអន្តរការ និង​ការបញ្ចប់​ការងារ​របស់​អង្គជំនុំជម្រះវិសាមញ្ញ។ ជា​ពិសេស ការិយាល័យ​រដ្ឋបាល​បាន​ស្នើសុំ​ឲ្យសហចៅក្រម​របាយការណ៍​ដាក់ជូនរបាយការណ៍​មួយ​ដែល​មាន​មតិយោបល់ និងអនុ​សាសន៍​របស់​ខ្លួន​អំពីការចាត់​វិធានការ​សមស្រប​ និង​ប្រកបដោយ​អត្ថន័យ ចំពោះ​ជនរងគ្រោះ​នៃ​របប​ខ្មែរ​ក្រហម នៅក្នុង​យុត្តាធិការ​របស់ អ.វ.ត.ក។

សហ​ចៅក្រម​របាយការណ៍​បាន​ចេញ ការអំពាវ​នាវ​ឲ្យ​មាន​ការចូលរួម​ចំណែកជា​គំនិត ជាចំហ​មួយ ដើម្បី​ប្រមូល “គំនិត​ឲ្យ​បាន​ទូលំទូលាយ​តាមដែលអាច​ធ្វើ​បាន”។ មតិយោបល់​ដែល​ដាក់ជូន ត្រូវ​បាន​យក​មកពិភាក្សានៅក្នុង​របាយការណ៍​របស់​ខ្លួន។

ការសម្លឹងទៅមុខ៖ ព្រះករុណា​ព្រះបាទ នរោត្តម សីហមុនី ព្រះមហាក្សត្រនៃព្រះរាជាណាចក្រ​កម្ពុជា​បាន​ឡាយព្រះហស្ថ​លេខា​ប្រកាស​ឲ្យ​ប្រើ​កិច្ចព្រមព្រៀង​​បន្ថែម នៅ​ថ្ងៃទី​០៩ ខែវិច្ឆិកា ឆ្នាំ​២០២១ បន្ទាប់ពីរដ្ឋសភា និង​ព្រឹទ្ធសភាបាន​អនុម័ត។ អ.វ.ត.ក នឹងចាប់​ផ្តើមមុខងារ​ដែលនៅសេសសល់​របស់​ខ្លួន​ជា​ផ្លូវ​ការ​សម្រាប់​រយៈ​ពេលបីឆ្នាំដំបូង ក្រោយ​ពេលបំពេញកិច្ចដំណើរ​ការនីតិវិធីតាម​ផ្លូវ​តុលាការ​ចប់សព្វគ្រប់។

ដើម្បីបំពេញ​ទៅតាម​កិច្ចព្រម​ព្រៀង​បន្ថែម និង​អនុសាសន៍​របស់សហ​ចៅក្រម​របាយការណ៍ អ.វ.ត.ក មានបំណង​រៀបចំសិក្ខាសាលា/សន្និសីទ​មួយ ​នៅក្នុងខែឧសភា ឆ្នាំ​២០២២ ដើម្បីឲ្យ​មាន​ការ​ពិភាក្សាបែប​បរិយាប័ន្ន​រវាង​ជនរងគ្រោះ ដៃគូ និង​ភាគីពាក់ព័ន្ធ​ទាំង​អស់​ស្វែងរក​វិធីសាស្រ្តមួយ​ដើម្បី​ដំណើរ​ការ​ទៅ​មុខ។ ព័ត៌មាន​បន្ថែម​អំពី​ព្រឹត្តិការណ៍នេះ​នឹង​ប្រកាសជូនក្នុង​ពេល​សមស្រប។

លក្ខខណ្ឌការងារ​សម្រាប់​មន្រ្តីគ្រប់​គ្រង​កម្មវិធី មជ្ឈន្តិកី និង​មន្រ្តី​សម្របសម្រួល សម្រាប់​ព្រឹត្តិការណ៍​នោះ​​មាន​ផ្សព្វផ្សាយ​នៅលើ គេហទំព័រ UNAKRT

Most read