សិស្សានុសិស្សប្រមាណ ១៥០ នាក់ មកពីស្រុកគងពិសី ចូលរួមកម្មវិធីទស្សនកិច្ចសិក្សារៀបចំដោយ អ.វ.ត.ក.

នៅថ្ងៃទី២៨ ខែកញ្ញា ឆ្នាំ២០២៣ សិស្សានុសិស្សប្រមាណ ១៥០នាក់ នៃវិទ្យាល័យ ហ៊ុន សែន ជ្រៃអូព្នៅ ស្រុកគងពិសី ​ខេត្តកំពង់ស្ពឺ បានមកចូលរួមក្នុងកម្មវិធីទស្សនកិច្ចសិក្សា​រៀបចំឡើងដោយ អង្គជំនុំ​ជម្រះវិសាមញ្ញ​ក្នុង​តុលាការ​កម្ពុជា (អ.វ.ត.ក.)​ ដើម្បីសិក្សាស្វែងយល់ប្រវត្តិសាស្ដ្ររបស់ប្រទេសកម្ពុជាទាក់ទងនឹង​របប​កម្ពុ​ជាប្រជាធិបតេយ្យ។​

ក្នុងដំណើរទស្សនកិច្ចសិក្សានោះ​ សិស្សានុសិស្សទាំងអស់ត្រូវបាននាំយកទៅទស្សនកិច្ចសិក្សា និង​ស្ដាប់​បទបង្ហាញអំពីសោកនាដកម្ម​របស់ប្រជាជនកម្ពុជានៅក្នុងសារៈមន្ទីរ​ឧក្រិដ្ឋកម្មប្រល័យ​ពូជ​សាស​ន៍​​ទួល​ស្លែង និងមជ្ឈមណ្ឌល​ប្រល័យពូជ​សាសន៍​ជើងឯក និងប្រវត្តិសាស្ដ្រនៅក្នុងវិមានឈ្នះ-ឈ្នះ។  ​នៅក្នុងបរិវេណវិមានឈ្នះ-ឈ្នះ សិស្សានុសិស្សទាំងអស់​ក៏ទទួលបាន​ការ​ធ្វើបទ​បង្ហាញ​​របស់​​មន្ដ្រីមក​ពី​សាលាក្ដីខ្មែរក្រហមផងដែរ អំពីពីដំណើរការជំនុំជម្រះក្ដី និងសមិទ្ធផល​ដែល​ទទួល​បាន​ពីការ​ជំនុំ​ជម្រះ​ក្ដីលើ​អតី​ត​មេដឹក​នាំ​ជាន់​ខ្ពស់​​នៃរបបខ្មែរក្រហម​។

លោកគ្រូអ្នកគ្រូដែលបានដឹកនាំសិស្សានុសិស្សមកចូលរួមក្នុងទស្សនកិច្ចសិក្សានេះ បាន​​​ថ្លែងនូវការ​​កោត​សរ​សើរ និង​ដឹង​គុណ​ដល់​គោល​នយោ​បាយ​ឈ្នះ-ឈ្នះ​ ​របស់​រាជ​រដ្ឋា​ភិបាល​កម្ពុជា ​ដែល​បាន​ដឹក​នាំប្រទេស​នាំ​មក​នូវ​សុខ​សន្ដិភាព ស្ថេរ​ភាព​សង្គម និងរីកចម្រើនគ្រប់វិស័យ​។ លោកគ្រូអ្នកគ្រូក៏សូម​អរ​​គុណដល់ អ.វ.ត.ក. ផងដែរ ដែល​បាន​រៀបចំ​កម្មវិធីនេះឡើង ដើម្បី​ឲ្យ​យុវជន​បាន​យល់​ដឹង បាន​ទស្សនា​ទីតាំង​​ឧក្រិដ្ឋកម្ម​ដែល​បន្សល់​ទុកពី​របប​ខ្មែរក្រហម និង​បាន​មក​ឃើញ​ការ​អភិវឌ្ឍ​ន៍​នៅ​ក្នុង​រាជ​ធានីភ្នំ​ពេញ​​​នាពេលបច្ចុប្បន្ននេះ។

​សូមបញ្ជាក់​ថា កម្មវិធីទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុ​សិស្ស និស្សិត យុវជន និង​ពលរដ្ឋទូទៅ ដោយចាប់តាំង​ពីឆ្នាំ២០០៩ រហូតមកដល់ឆ្នាំ ​២០២៣ នេះ មាន​សា​ធារណៈជនជាតិ និង​អន្តរ​ជាតិ​​ជាង ៦០ ម៉ឺននាក់​ហើយដែលបានចូលរួមក្នុងដំណើរ​ទស្សន​កិច្ច​សិក្សា ក្រោមការសម្រប​សម្រួល និង​រៀបចំ​ដោយ​ផ្នែក​កិច្ច​ការសាធារណៈនៃសា​លា​ក្តីខ្មែរក្រហម៕

eccc

eccc

eccc

eccc

eccc

 

Most read

Related Documents

ព័ត៌មានថ្មីៗ