នៅថ្ងៃទី១៨ ខែមករា ឆ្នាំ២០២៤ សិស្សានុសិស្សប្រមាណ ១៥០នាក់ មកពីវិទ្យាល័យ ហ៊ុន សែន ចរិយាវង្ស ក្នុងខេត្តកែប បានអញ្ជើញមកចូលរួមក្នុងកម្មវិធីទស្សនកិច្ចសិក្សារៀបចំឡើងដោយ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) ដើម្បីស្វែងយល់ឱ្យច្បាស់អំពីប្រវត្តិសាស្ដ្ររបស់កម្ពុជា គោលនយោបាយឈ្នះ-ឈ្នះ និង កេរដំណែលនៃការជំនុំជម្រះក្ដីក្នុងសាលាក្ដីខ្មែរក្រហម។
ក្នុងដំណើរទស្សនកិច្ចសិក្សានៅវិមានឈ្នះ-ឈ្នះ សិស្សានុសិស្សទាំងអស់ត្រូវបានទទួលស្វាគមន៍យ៉ាងកក់ក្ដៅ និងបទបង្ហាញពីមគ្គុទ្ទេសក៏វិមាន ឈ្នះ-ឈ្នះ អំពីរចនាបថ និងខ្លឹមសារនៃសំណង់ដ៏ធំស្កឹមស្កៃរបស់វិមាន ឈ្នះ-ឈ្នះ ប្រវត្តិនៃការតស៊ូរបស់ឥស្សរជនកម្ពុជាក្នុងការរំដោះប្រទេសជាតិចេញពីរបបប្រល័យពូជសាសន៍ និងការដាក់ចេញគោលនយោបាយ ឈ្នះ-ឈ្នះ ដើម្បីឆ្ពោះទៅការបញ្ចប់សង្គ្រាមទាំងស្រុងក្នុងប្រទេសកម្ពុជា។
នៅក្នុងបរិវេណវិមានឈ្នះ-ឈ្នះផងដែរ មន្ដ្រីផ្នែកកិច្ចការសាធារណៈនៃសាលាក្ដីខ្មែរក្រហម ក៏បានធ្វើបទបង្ហាញដល់សិស្សានុសិស្ស អំពីសមិទ្ធផលដែលទទួលបានពីការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហម និងការអនុវត្តការងារសេសសល់របស់សាលាក្ដីក្រោយពេលជំនុំជម្រះក្ដីចប់។ បន្ទាប់មក សិស្សានុសិស្សបានបន្ដទៅទស្សនកិច្ចនៅសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង ដើម្បីស្វែងយល់អំពីសោកនាដកម្មដែលបានបន្សល់ទុកដោយរបបឃោរឃៅខ្មែរក្រហមផងដែរ។
លោកគ្រូ អ្នកគ្រូ ដែលបានមកចូលរួមក្នុងទស្សនកិច្ចសិក្សានេះ បានលើកឡើងថាដំណើរទស្សនកិច្ចនេះមានសារៈសំខាន់សម្រាប់សិស្សានុសិស្សបានស្វែងយល់ពីប្រវត្តិសាស្រ្តរបស់កម្ពុជាឱ្យបានស៊ីជម្រៅ និងពិតប្រាកដ។ លោកគ្រូអ្នកគ្រូ ក៏សូមថ្លែងអំណរគុណដល់ អ.វ.ត.ក. ផងដែរ ដែលបានរៀបចំកម្មវិធីនេះឡើង ដើម្បីឲ្យយុវជនបានមកទស្សនាដោយផ្ទាល់នូវទីតាំងវិមានឈ្នះ-ឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះ។
សូមបញ្ជាក់ថា កម្មវិធីទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដោយចាប់តាំងពីឆ្នាំ២០០៩ រហូតមកដល់ឆ្នាំ ២០២៤ នេះ មានសាធារណៈជនជាតិ និងអន្តរជាតិ ជាង ៦៥ម៉ឺននាក់ ហើយ ដែលបានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
