នៅថ្ងៃទី២០ ខែធ្នូ ឆ្នាំ២០២៣ សិស្សានុសិស្សប្រមាណ ១៥០នាក់ មកពីវិទ្យាល័យ ហ៊ុន សែន កំពង់ចក ក្នុងស្រុករំដួល នៃខេត្តស្វាយរៀង បានអញ្ជើញមកចូលរួមក្នុងកម្មវិធីទស្សនកិច្ចសិក្សារៀបចំឡើងដោយ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) ដើម្បីសិក្សាស្វែងយល់ប្រវត្តិសាស្ដ្ររបស់ប្រទេសកម្ពុជាទាក់ទងនឹងរបបកម្ពុជាប្រជាធិបតេយ្យនៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក និងកេរដំណែលនៃការជំនុំជម្រះក្ដីក្នុងសាលាក្ដីខ្មែរក្រហម។
ក្នុងដំណើរទស្សនកិច្ចសិក្សានៅសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង មន្ដ្រីផ្នែកកិច្ចការសាធារណៈនៃសាលាក្ដីខ្មែរក្រហម ក៏បានធ្វើបទបង្ហាញដល់សិស្សានុសិស្ស អំពីសមិទ្ធផលដែលទទួលបានពីការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហម និងការអនុវត្តការងារសេសសល់របស់សាលាក្ដីក្រោយពេលជំនុំជម្រះក្ដីចប់។ បន្ទាប់មក សិស្សានុសិស្សបានបន្ដទៅទស្សនកិច្ចនៅមជ្ឈមណ្ឌលឧក្រិដ្ឋកម្មប្រល័យពូជសាសន៍ជើងឯក ដើម្បីស្វែងយល់អំពីសោកនាដកម្មដែលបានបន្សល់ទុកដោយរបបឃោរឃៅខ្មែរក្រហមផងដែរ។
លោកគ្រូ អ្នកគ្រូ ដែលបានមកចូលរួមក្នុងទស្សនកិច្ចសិក្សានេះ បានលើកឡើងថាដំណើរទស្សនកិច្ចនេះមានសារៈសំខាន់សម្រាប់សិស្សានុសិស្សស្វែងយល់ពីប្រវត្តិសាស្រ្ត ជាពិសេស របបកម្ពុជាប្រជាធិបតេយ្យ និងការជំនុំជម្រះក្ដីលើមេដឹកនាំខ្មែរក្រហម។ លោកគ្រូអ្នកគ្រូ ក៏សូមថ្លែងអំណរគុណដល់ អ.វ.ត.ក. ផងដែរ ដែលបានរៀបចំកម្មវិធីនេះឡើង ដើម្បីឲ្យយុវជនបានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះ។
សូមបញ្ជាក់ថា កម្មវិធីទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដោយចាប់តាំងពីឆ្នាំ២០០៩ រហូតមកដល់ឆ្នាំ ២០២៣ នេះ មានសាធារណៈជនជាតិ និងអន្តរជាតិ ជាង ៦០ ម៉ឺននាក់ហើយដែលបានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
