នៅថ្ងៃទី០៦ ខែមីនា ឆ្នាំ២០២៤ សិស្សស្ដ្រីខ្មែរឥស្លាមប្រមាណ ១៥០នាក់ មកពីវិទ្យាស្ថានអន្ដរជាតិ អ៊ិនតាច ក្នុងខេត្តកំពង់ចាម បានអញ្ជើញមកចូលរួមក្នុងកម្មវិធីទស្សនកិច្ចសិក្សារៀបចំឡើងដោយ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.)។
ក្នុងដំណើរទស្សនកិច្ចសិក្សានោះ សិស្សានុសិស្សទាំងអស់ត្រូវបាននាំយកទៅទស្សនកិច្ចសិក្សា និងស្ដាប់ការបកស្រាយពីមគ្គុទេសក៍ជំនាញអំពីសំណង់ ខ្លឹមសារ គោលគំនិតនៃការសាងសង់នៃវិមានឈ្នះ-ឈ្នះ ជាពិសេសអំពីប្រវត្តិសាស្ត្រយោធានៅវិមានឈ្នះ-ឈ្នះ។ នៅក្នុងបរិវេណវិមានឈ្នះ-ឈ្នះ សិស្សទាំងអស់ក៏ទទួលបានការធ្វើបទបង្ហាញរបស់មន្ដ្រីមកពីសាលាក្ដីខ្មែរក្រហម អំពីដំណើរការជំនុំជម្រះក្ដី និងសមិទ្ធផលដែលទទួលបានពីការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហម។ បន្ទាប់មកពួកគេក៏ត្រូវបាននាំយកទៅទស្សនកិច្ចសិក្សាស្វែងយល់អំពីស្លាកស្នាម និងសោកនាដកម្មរបស់ប្រជាជនកម្ពុជានៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែងផងដែរ។
នាយកវិទ្យាស្ថាន លោក ស្លេះ ណាវ៉ាវី បានលើកឡើងថា ទស្សនកិច្ចនេះពិតជាមានសារៈសំខាន់ណាស់ដើម្បីឱ្យសិស្សានុសិស្សទាំងអស់ទទួលបានចំណេះដឹងអំពីប្រវត្តិសាស្ដ្រកម្ពុជាកាន់តែច្បាស់ទាក់ទងនឹងការប្រព្រឹត្តរបស់ខ្មែរក្រហមលើប្រជាពលរដ្ឋកម្ពុជា ដំណើរការរំដោះជាតិចេញពីរបបប្រល័យពូជសាសន៍ និងការជំនុំជម្រះក្ដីលើមេដឹកនាំនៃរបបនោះ។ លោកបន្ថែមថា សិស្សានុសិស្សបានចាប់អារម្មណ៍យ៉ាងខ្លាំងចំពោះបទបង្ហាញដែលបានធ្វើឡើងដោយមគ្គុទ្តេសក៍របស់វិមានឈ្នះឈ្នះ និងមន្ដ្រីសាលាក្ដីខ្មែរក្រហម ព្រោះលោកថា បទបង្ហាញនោះ បានផ្ដល់មេរៀនថ្មីៗដ៏ច្រើនដល់ពួកគេ បន្ថែមពីអ្វីដែលពួកគេបានសិក្សានៅក្នុងថ្នាក់រៀនរបស់ពួកគេ។
អាមីរ៉ា ជាសិស្សម្នាក់ក្នុងចំណោមនោះ បានលើកឡើងថា នាងពិតជាសប្បាយចិត្តណាស់ដែលបានមកចូលរួមក្នុងកម្មវិធីទស្សនកិច្ចសិក្សារៀបចំដោយសាលាក្ដីខ្មែរក្រហមនេះ។ សម្រាប់ អាមីរ៉ា ទស្សនកិច្ចសិក្សានេះ បានជួយឱ្យរូបនាង និងមិត្តភ័ក្ដិទាំងអស់ ទទួលបានចំណេះដឹងយ៉ាងច្រើនទាក់ទងគោលនយោបាយឈ្នះឈ្នះ ដំណើរការជំនុំជម្រះក្ដីលើមេដឹកនាំខ្មែរក្រហម និងបានឃើញស្លាកស្នាមបន្សល់ទុកពីរបបខ្មែរក្រហមនៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែងផងដែរ។
សូមបញ្ជាក់ថា កម្មវិធីទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ២០០៩ រហូតមកដល់ឆ្នាំ ២០២៤ នេះ មានសាធារណៈជនជាតិ និងអន្តរជាតិជាង ៦៥ ម៉ឺននាក់ហើយដែលបានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
