នៅថ្ងៃទី២៩ ខែវិច្ឆិកា ឆ្នាំ២០២៣ សិស្សានុសិស្សប្រមាណ ២០០នាក់ មកពីស្រុកពាមរកិ៍ ខេត្តព្រៃវែង បានអញ្ជើញមកចូលរួមក្នុងកម្មវិធីទស្សនកិច្ចសិក្សារៀបចំឡើងដោយ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.)។
ក្នុងដំណើរទស្សនកិច្ចសិក្សានោះ សិស្សានុសិស្សទាំងអស់ត្រូវបាននាំយកទៅទស្សនកិច្ចសិក្សា និងស្ដាប់ការបកស្រាយពីមគ្គុទេសក៏ជំនាញអំពីសំណង់ ខ្លឹមសារ គោលគំនិតនៃការសាងសង់នៃវិមានឈ្នះ-ឈ្នះ ជាពិសេសអំពីប្រវត្តិសាស្ត្រយោធានៅវិមានឈ្នះ-ឈ្នះ។ នៅក្នុងបរិវេណវិមានឈ្នះ-ឈ្នះ សិស្សានុសិស្សទាំងអស់ក៏ទទួលបានការធ្វើបទបង្ហាញរបស់មន្ដ្រីមកពីសាលាក្ដីខ្មែរក្រហមផងដែរ អំពីដំណើរការជំនុំជម្រះក្ដី និងសមិទ្ធផលដែលទទួលបានពីការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហម។ សិស្សានុសិស្សក៏ត្រូវបាននាំយកទៅទស្សនកិច្ចសិក្សាស្វែងយល់អំពី ស្លាកស្នាម និងសោកនាដកម្មរបស់ប្រជាជនកម្ពុជានៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯកផងដែរ។
លោកគ្រូ អ្នកគ្រូ ដែលបានដឹកនាំសិស្សានុសិស្សមកចូលរួមក្នុងទស្សនកិច្ចសិក្សានេះ បានលើកឡើងថា ដំណើរទស្សនកិច្ចនេះជាផ្នែកមួយដ៏សំខាន់សម្រាប់សិស្សានុសិស្សស្វែងយល់ពីប្រវត្តិសាស្រ្ត ជាពិសេស របបកម្ពុជាប្រជាធិបតេយ្យ ការកាត់ទោសមេដឹកនាំខ្មែរក្រហម។ លោកបន្ដថា ចំណែកការទស្សនាវិមាន ឈ្នះ-ឈ្នះ ក៏ជាចំណែកមួយដែលឲ្យសិស្សានុសិស្សយល់ដឹងពីប្រភពនៃការកើតឡើងនៃរបបខ្មែរក្រហម ការតស៊ូរបស់ថ្នាក់ដឹកនាំក្នុងការរំដោះប្រទេសពីគុកឥតជញ្ជាំងមួយនេះ។
លោកគ្រូអ្នកគ្រូ ក៏បានថ្លែងនូវការកោតសរសើរ និងដឹងគុណដល់គោលនយោបាយ ឈ្នះ-ឈ្នះ របស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព ស្ថេរភាពសង្គម និងរីកចម្រើនគ្រប់វិស័យ។ លោកគ្រូអ្នកគ្រូក៏សូមអរគុណដល់ អ.វ.ត.ក. ផងដែរ ដែលបានរៀបចំកម្មវិធីនេះឡើង ដើម្បីឲ្យយុវជនបានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះ។
សូមបញ្ជាក់ថា កម្មវិធីទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ២០០៩ រហូតមកដល់ឆ្នាំ ២០២៣ នេះ មានសាធារណៈជនជាតិ និងអន្តរជាតិ ជាង ៦០ ម៉ឺននាក់ហើយដែលបានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
