សិស្សានុសិស្សចំនួនប្រហែល ៤០០ នាក់ មកពីស្រុកមេមត់ ក្នុងខេត្តត្បូងឃ្មុំ និងប្រហែល៣០០នាក់ផ្សេងទៀតមកពីស្រុកកំចាយមា ខេត្តព្រៃវែង នៅថ្ងៃទី២៦ ខែមេសា ឆ្នាំ ២០១៨ បានមកបំពេញទស្សនកិច្ចសិក្សានៅអង្គជំនុំជម្រះវិសាមញ្ញក្នុងតុលាការកម្ពុជា។ ទស្សនកិច្ចដែលរៀបចំឡើងដោយផ្នែកកិច្ចការសាធារណៈ នេះ ធ្វើឡើងក្នុងគោលបំណងដើម្បីសិក្សាស្វែងយល់អំពីដំណើការរបស់សាលាក្ដីខ្មែរក្រហមក្នុងការជំនុំជម្រះក្តីលើអតីតមេដឹកនាំជាន់ខ្ពស់ និងអ្នកទទួលខុសត្រូវខ្ពស់ក្នុងឧក្រិដ្ឋកម្មធ្ងន់ធ្ងរបំផុតប្រព្រឹត្តនៅក្នុងអំឡុងពេលនៃរបបខ្មែរក្រហម ក៏ដូចជាការសិក្សាស្វែងយល់បន្ថែមអំពីប្រវត្តិសាស្ដ្រនៃរបបកម្ពុជាប្រជាធិបតេយ្យ។ បន្ទាប់ពីបំពេញទស្សនកិច្ចនៅតុលាការខ្មែរក្រហម សិស្សានុសិស្សទាំងអស់ ក៏បន្ដទៅទស្សនកិច្ចនៅមន្ទីរឧក្រិដ្ឋកម្មប្រល័យពូជសាសន៍ទួលស្លែង និងវាលពិឃាតបឹងជើងឯកផងដែរ៕
