អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានរៀបចំកម្មវិធីទស្សនកិច្ចសិក្សាជូនសិស្សានុសិស្ស និងយុវជនចំនួន ១៥០ នាក់ មកពីវិទ្យាល័យ ហ៊ុន សែន ផ្ដៅជុំ ក្នុងស្រុកជើងព្រៃ ខេត្ដកំពង់ចាម នាថ្ងៃទី១៤ ខែមិថុនា ឆ្នាំ២០២៣ នេះ។ គោលបំណងនៃទស្សនកិច្ចសិក្សានេះ គឺចង់ឱ្យយុវជនជំនាន់ក្រោយទាំងអស់បានយល់ដឹង និងចងចាំអំពីសោកនាដកម្មនៅក្នុងរបបខ្មែរក្រហម ការរំដោះជាតិពីរបបប្រល័យពូជសាសន៍ និងការជំនុំជម្រះក្ដីលើឧក្រិដ្ឋកម្មក្នុងរបបឃោរឃៅនោះ។
ក្នុងពេលមកបំពេញទស្សនកិច្ចសិក្សានេះ លោក វិន វឌ្ឍនា ជាសិស្សថ្នាក់ទី១១ នៃវិទ្យាល័យ ហ៊ុន សែន ផ្ដៅជុំ បានលើកឡើងថា ទស្សនកិច្ចសិក្សាដែលរៀបចំដោយសាលាក្ដីខ្មែរក្រហមនេះ ពិតជាធ្វើឱ្យរូបលោក និងយុវជនផ្សេងៗទៀតបានទទួលចំណេះដឹងយ៉ាងច្បាស់បន្ថែមទៀតអំពីប្រវត្តិសាស្ដ្រនៃរបបប្រល័យពូជសាសន៍ ប៉ុល ពត។ បើតាមការបញ្ជាក់របស់ វឌ្ឍនា លោកធ្លាប់បានដឹងរឿងរ៉ាវខ្លះតាមរយៈក្រុមគ្រួសារ ការអានសៀវភៅ និងតាមបណ្ដាញសង្គម ថា នៅក្នុងសម័យខ្មែរក្រហម ប្រជាពលរដ្ឋកម្ពុជារស់នៅយ៉ាងវេទនាបំផុត និងមានការកាប់សម្លាប់ជាដើម ប៉ុន្ដែលោកមិនបានដឹងរឿងរ៉ាវទាំងនោះដោយលម្អិតនោះទេ។ វឌ្ឃនា បន្ថែមថា វាពិតជាមានសារៈសំខាន់ណាស់ក្នុងការទទួលបានចំណេះដឹងច្បាស់លាស់ពីរបបឃោរឃៅនោះ ព្រោះលោកថា វាអាចចូលរួមចំណែកជួយទប់ស្កាត់កុំឱ្យរបបឃោរឃៅនោះរស់ឡើងវិញបាន។
មិនខុសគ្នាប៉ុន្មាននោះទេ លោក ចាន់ធី តារា ជាសិស្សថ្នាក់ទី១១ ផងដែរ បានលើកឡើងថា ទស្សនកិច្ចសិក្សានៅថ្ងៃនេះ លោកទទួលបានចំណេះដឹងច្រើនអំពីភាពឃោរឃៅដែលខ្មែរក្រហមបានប្រព្រឹត្តមកលើប្រជាពលរដ្ឋកម្ពុជា។ លោកថា មុនពេលលោកបានមកចូលរួមក្នុងទស្សនកិច្ចសិក្សានៅថ្ងៃនេះ រូបលោកក៏ទទួលបានចំណេះដឹងខ្លះៗពីក្រុមគ្រួសារ និងតាមបណ្ដាញសង្គម អំពីរបបខ្មែរក្រហមនេះដែរដោយយលោកបញ្ជាក់ថា នៅក្នុងសម័យខ្មែរក្រហម ប្រជាពលរដ្ឋកម្ពុជាត្រូវបានខ្មែរក្រហមបង្ខំឱ្យធ្វើការហួសកម្លាំង ឱ្យហូបអាហារមិនគ្រប់គ្រាន់ ទទួលរងទារុណកម្ម និងសម្លាប់ជាដើម។ សម្រាប់ តារា វាពិតជាចាំបាច់ណាស់ដែលយុវជនជំនាន់ក្រោយត្រូវសិក្សាឱ្យបានច្បាស់លាស់នូវប្រវត្តិសាស្ដ្ររបស់ប្រទេសកម្ពុជាដើម្បីចូលរួមទប់ស្កាត់កុំឱ្យមានអំពើប្រល័យពូជសាសន៍ជាថ្មីម្ដងទៀត។
សិស្សានុសិ្សសដែលបានចូលរួមក្នុងកម្មវិធីទស្សនកិច្ចសិក្សានេះ ក៏បានថ្លែងកោតសរសើរ និងដឹងគុណដល់គោលនយោបាយ ឈ្នះ ឈ្នះ របស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព និងស្ថេរភាពសង្គម។ ហើយពួកគេក៏មិនភ្លេចថ្លែងអំណរគុណដល់ អ.វ.ត.ក ដែលបានរៀបចំកម្មវិធីនេះឡើង ដើម្បីឲ្យពួកគាត់បានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះផងដែរ។
សូមបញ្ជាក់ថា ក្នុងដំណើរទស្សនកិច្ចសិក្សារៀបចំដោយ អ.វ.ត.ក នៅថ្ងៃនេះ សិស្សទាំងអស់បានទៅទស្សនកិច្ចសិក្សានៅវិមាន ឈ្នះ ឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក និងទទួលបានការបទបង្ហាញអំពីសមិទ្ធផលនៃការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហមផងដែរ។
កម្មវិធីទស្សនកិច្ចសិក្សានេះ ត្រូវបាន អ.វ.ត.ក រៀបចំឡើងរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ ២០០៩ រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕