យុវជន ពៅ ជីវ័ន ជាសិស្សមួយរូបក្នុងចំណោមយុវសិស្សប្រមាណ ២២០ នាក់ មកពីវិទ្យាល័យ ក្នុងស្រុកមេសាង ខេត្តព្រៃវែង ដែលបានមកចូលរួមក្នុងកម្មវិធីទស្សនកិច្ចសិក្សារៀបចំឡើងដោយអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នាថ្ងៃទី៧ ខែមិថុនា ឆ្នាំ២០២៣ នេះ។
ក្នុងពេលចូលរួមក្នុងកម្មវិធីទស្សនកិច្ចសិក្សានេះ លោក ជីវ័ន បានលើកឡើងថា “ខ្ញុំអត់បានដឹងរឿងរ៉ាវច្រើនពីសម័យខ្មែរក្រហមទេ ប៉ុន្ដែខ្ញុំគ្រាន់តែដឹងថាក្នុងសម័យនោះប្រជាជនវេទនាខ្លាំង” ហើយប្រជាជនកម្ពុជារស់នៅយ៉ាងលំបាកវេទនា និងត្រូវបានបំបិទសិទ្ធិគ្រប់បែបយ៉ាងទាំងអស់។ ជីវ័ន បន្ថែមថា លោកបានដឹងរឿងរ៉ាវទាំងអស់នេះ តាមរយៈជីដូនរបស់លោក តាមការអានសៀវភៅ និងតាមបណ្ដាញសង្គមជាដើម។
លោក ជីវ័ន បញ្ជាក់បន្ថែមថា បើតាមការនិយាយប្រាប់ពីជីដូនរបស់លោក ក្នុងគ្រួសាររបស់លោក មានជីតា និងបងប្អូនសាច់ញាតិរបស់លោកជាច្រើននាក់ត្រូវបានខ្មែរក្រហមយកទៅសម្លាប់។ លោកថា “លោកយាយគាត់ថា សម័យហ្នឹងគេយកមនុស្សទៅសម្លាប់ជាច្រើននាក់ របបហ្នឹងឃោរឃៅ ដូចជាជីតាខ្ញុំចឹង យាយខ្ញុំគាត់ធ្លាប់ប្រាប់ថា ឪពុកគាត់ត្រូវបានគេយកទៅសម្លាប់ចោល ហើយបងប្អូនគាត់ក៏ត្រូវគេយកទៅសម្លាប់ដែរ ប៉ុន្ដែខ្ញុំក៏អត់សូវដឹងច្បាស់ដែរ (ថាមូលហេតុអី) ដោយសារអត់សូវដែលបានជួបគាត់។”
សម្រាប់ ជីវ័ន ដើម្បីចូលរួមទប់ស្កាត់របបឃោរឃៅនោះកុំឱ្យកើតមានឡើងជាថ្មីម្ដងទៀត “ក្មេងជំនាន់ក្រោយត្រូវរៀនសូត្រឱ្យដឹងច្រើនពីប្រវត្តិសាស្ដ្រ និយាយទៅត្រូវចងចាំឱ្យបានច្រើនកុំឱ្យភ្លេច។”
សូមបញ្ជាក់ថា ក្នុងដំណើរទស្សនកិច្ចសិក្សារៀបចំដោយ អ.វ.ត.ក នៅថ្ងៃនេះ សិស្សទាំងអស់ទទួលបានការស្វាគមន៍ និងបទបង្ហាញអំពីសមិទ្ធផលនៃការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហម ទស្សនកិច្ចសិក្សានៅវិមានឈ្នះ ឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក។
កម្មវិធីទស្សនកិច្ចសិក្សានេះ ត្រូវបាន អ.វ.ត.ក រៀបចំឡើងរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ ២០០៩ រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕