នាថ្ងៃទី២ ខែមីនា ឆ្នាំ២០២៣ នេះ មានយុវជនប្រមាណ ២៥០នាក់ មកពីខេត្តកំពង់ចាម បានមកចូលរួមក្នុងកម្មវិធីទស្សនកិច្ចសិក្សារបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ឬសាលាក្ដីខ្មែរក្រហម។ យុវជនដែលបានចូលរួមក្នុងកម្មវិធី ស្វែងយល់អំពីរឿងរ៉ាវដ៏ជូរចត់របស់កម្ពុជានេះ មានមកពីស្ថាប័នផ្សេងៗគ្នា រួមមាន លោកគ្រូ អ្នកគ្រូ និងក្រុមការងារយុវជនស្ថតិក្នុងស្រុកកំពង់សៀម និងក្រុមយុវជនសាលាមធ្យមសិក្សាសុខាភិបាលភូមិភាគកំពង់ចាម។
កញ្ញា ជាង សុខលីន បានលើកឡើងថា ការចូលរួមក្នុងកម្មវិធីទស្សនកិច្ចសិក្សានៅក្នុងថ្ងៃនេះ កញ្ញាបានយល់ដឹងបន្ថែមច្រើនអំពីដំណើការជំនុំជម្រះក្ដីដោយសាលាក្ដីខ្មែរក្រហម លើអតីតមេដឹកនាំជាន់ខ្ពស់ខ្មែរក្រហម ការឈឺចាប់ដែលខ្មែរក្រហមបានប្រព្រឹត្តិមកលើប្រជាជនកម្ពុជានៅក្នុងរបបកម្ពុជាប្រជាធិបតេយ្យ និងការពលីរបស់ប្រមុខរាជរដ្ឋាភិបាលកម្ពុជាក្នុងការដឹកនាំប្រទេសនាំមកនូវសន្ដិភាព។ យុវតីរូបនេះបន្ថែមថា កញ្ញាមានអារម្មណ៍ខ្លោចផ្សារនៅពេលបានឃើញរូបភាព និងបានស្ដាប់ឮមគ្គុទេសក៍បានពន្យល់ពួកគាត់ទាក់ទងនឹងការធ្វើទារុណកម្មយ៉ាងព្រៃផ្សៃ ការបង្អត់អាហារ និងការសម្លាប់ប្រជាជនទាំងចាស់ទាំងក្មេង នៅក្នុងសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង។ កញ្ញា ជាង សុខលីន បញ្ជាក់ថា វាពិតជាមានសារៈសំខាន់ណាស់ក្នុងនាំយកមេដឹកនាំនៃរបបឃោរឃៅនោះមកកាត់ទោស ដើម្បីផ្ដល់យុត្តិធម៌ជូនក្រុមគ្រួសារ និងជនរងគ្រោះនៃរបបនោះ ដើម្បីឱ្យពួកគាត់បានអស់ចិត្ត និងស្លាប់ទៅបានបិទភ្នែកជិតផងដែរ។
រីឯលោក ឈួន វិបុល ប្រធានក្រុមដឹកនាំយុវជនមកពីស្រុកកំពង់សៀម បានលើកឡើងថា ចំណេះដឹងដែលទទួលបានក្នុងដំណើរទស្សនកិច្ចសិក្សានៅថ្ងៃនេះ ពិតជាមានសារៈសំខាន់ណាស់សម្រាប់ក្រុមយុវជនរបស់លោក ព្រោះលោកយល់ថា ចំណេះដឹងនេះអាចចូលរួមក្នុងការទប់ស្កាត់អំពើប្រល័យពូជសាសន៍បាន។ ដូច្នេះលោកបានអំពាវនាវដល់យុវជនទាំងនោះ ត្រូវយកចិត្តទុកដាក់ស្វែងយល់អំពីរឿងរ៉ាវនៅតាមទីតាំងនីមួយៗ។
ចំពោះលោក ជួន រតនាវង្ស ជាយុវជនមួយរូបដែលបានចូលរួមក្នុងកម្មវិធីទស្សនកិច្ចសិក្សានៅថ្ងៃនេះដែរ បានលើកឡើងថា លោកសូមអរគុណដល់សាលាក្ដីខ្មែរក្រហមដែលបានរៀបចំកម្មវិធីទស្សនកិច្ចសិក្សានេះឡើង ដើម្បីឱ្យយុវជនជំនាន់ក្រោយបានយល់ដឹងអំពីរឿងរ៉ាវដែលកើតមានឡើងនៅក្នុងរបបខ្មែរក្រហម និងផលប៉ះពាល់ទាំងឡាយដោយសារតែរបបនោះទៅលើប្រជាជន និងប្រទេសកម្ពុជាទាំងមូល។ យុវជនដែលមានវ័យប្រមាណជាង ៣០ ឆ្នាំ រូបនេះក៏បានសូមអរគុណដល់រាជរដ្ឋាភិបាល ផងដែរ ដែលបានដឹកនាំប្រទេសកម្ពុជាឱ្យទទួលបានសុខសន្ដិភាព និងបានរីកចម្រើនគ្រប់វិស័យរហូតមកដល់សព្វថ្ងៃនេះ។ លោក ជួន រតនាវង្ស ក៏ស្នើដល់យុវជនទាំងអស់ចូលរួមរក្សាការពារសន្ដិភាព និងជួយទប់ស្កាត់កុំឱ្យមានសង្គ្រាម ដើម្បីបញ្ចៀសប្រទេសកម្ពុជាកុំឱ្យកើតមានវាលពិឃាតជាថ្មីម្ដងទៀតបាន។
ក្នុងដំណើរទស្សនកិច្ចសិក្សាដែលរៀបចំឡើងដោយអង្គជំនុំជម្រះវិសាមញ្ញក្នុងតុលាការកម្ពុជា នៅថ្ងៃនេះ យុវជនទាំងអស់ បានទស្សនកិច្ចសិក្សាសារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង មជ្ឈមណ្ឌលប្រល័យពូជសាសន៍ជើងឯក វិមានឈ្នះឈ្នះ រួមនឹងមានបទបង្ហាញមន្ដ្រីមកពីសាលាក្ដីខ្មែរក្រហម អំពីដំណើការជំនុំជម្រះក្ដីលើអតីតមេដឹកនាំជាន់ខ្ពស់នៃរបបកម្ពុជាប្រជាធិបតេយ្យផងដែរ។ ក្រោយពេលបញ្ចប់ទស្សនកិច្ចសិក្សានៅក្នុងមួយថ្ងៃនេះ យុវជនទាំងអស់បានទទួលព័ត៌មាន និងចំណេះដឹងយ៉ាងច្រើនជុំវិញដំណើការជំនុំជម្រះក្តីលើអតីតមេដឹកនាំខ្មែរក្រហម ការធ្វើទារុណកម្មយ៉ាងព្រៃផ្សៃ ការកាប់សម្លាប់ប្រជាពលរដ្ឋកម្ពុជាដោយពួកខ្មែរក្រហម និងការពលីរបស់ថ្នាក់ដឹកនាំកម្ពុជាក្នុងការរំដោះប្រទេសជាតិចេញពីរបបប្រល័យពូជសាសន៍នោះ។
សូមបញ្ជាក់ថា ដំណើរទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីតុលាការដំណើការដំបូង រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕
