យុវជនប្រមាណ ២០០ នាក់មកពីស្រុកពាមជរ ខេត្តព្រៃវែង បានចូលរួមក្នុងកម្មវិធីទស្សនកិច្ចសិក្សារបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) នៅថ្ងៃទី៩ ខែសីហា ឆ្នាំ២០២៣។ ទស្សនកិច្ចសិក្សានេះមានគោលបំណងឱ្យយុវជនទាំងអស់បានចងចាំ និងស្វែងយល់ឱ្យកាន់តែច្បាស់អំពីសោកនាដកម្មដែលកើតមានឡើងនៅក្នុងរបបឃោរឃៅខ្មែរក្រហម និងចូលរួមទប់ស្កាត់អំពើឃោរឃៅដូចក្នុងរបបខ្មែរក្រហម។
ក្នុងដំណើរទស្សនកិច្ចសិក្សានៅថ្ងៃនេះ យុវជនទាំងអស់ត្រូវបាននាំយកទៅទស្សនកិច្ចសិក្សានូវទីតាំងប្រវត្តិសាស្ដ្រដែលបន្សល់ទុក និងទាក់ទងនឹងរបស់របបកម្ពុជាប្រជាធិបតេយ្យចំនួនបីកន្លែងរួមមាន វិមានឈ្នះ ឈ្នះ សារៈមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលប្រល័យពូជសាសន៍ជើងឯក។ នៅតាមទីតាំងនីមួយៗ យុវជនទាំងអស់ ទទួលបានការស្វាគមន៍ និងពន្យល់យ៉ាងក្បោះក្បាយពីមគ្គុទ្ទេសន៍អំពីរឿងរ៉ាវដែលកើតមាននៅក្នុងសារៈមន្ទីរទាំងនោះ។ យុវជនទាំងអស់ក៏ទទួលបានការធ្វើបទបង្ហាញរបស់មន្ដ្រីមកពីសាលាក្ដីខ្មែរក្រហមផងដែរ អំពីដំណើរការជំនុំជម្រះក្ដី សមិទ្ធផលដែលទទួលបានពីការជំនុំជម្រះក្ដីលើអតីតមេដឹកនាំជាន់ខ្ពស់នៃរបបខ្មែរក្រហម និងដំណើរការងារសេសសល់ដែលអង្គជំនុំជម្រះកំពុងអនុវត្តនាពេលបច្ចុប្បន្ននេះផងដែរ។
អ្នកស្រី ញឹម ផារ៉ា តំណាងក្រុមការងារដឹកនាំយុវជនបានថ្លែងកោតសរសើរ និងដឹងគុណដល់គោលនយោបាយ ឈ្នះ ឈ្នះ របស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព ស្ថេរភាពសង្គម និងរីកចម្រើនគ្រប់វិស័យ។ អ្នកស្រីក៏សូមអរគុណដល់ អ.វ.ត.ក. ផងដែរ ដែលបានរៀបចំកម្មវិធីនេះឡើង ដើម្បីឲ្យយុវជនបានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះ។
សូមបញ្ជាក់ថា កម្មវិធីទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។ ចាប់តាំងពីឆ្នាំ២០០៩ រហូតមកដល់ឆ្នាំ ២០២៣ នេះ មានសាធារណៈជនជាតិ និងអន្តរជាតិ ជាង ៦០ ម៉ឺននាក់ នាក់ហើយ ដែលបានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕