រដ្ឋមន្ត្រីកិច្ចការបរទេសអង់គ្លេស​ធ្វើ​ទស្សនកិច្ច​នៅ​ អ.វ.ត.ក

សមាជិកសភាអង់គ្លេស​និង​ជា​រដ្ឋមន្ត្រី​ទទួល​បន្ទុក​ការិយាល័យ​កិច្ចការបរទេស​នៃ​ចក្រភពអង់គ្លេស លោក ជេរេមី ប្រោន បាន​ធ្វើ​ទស្សនកិច្ច​រយៈពេល​មួយ​ម៉ោង នៅ​អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅ​រសៀល​ថ្ងៃនេះ​ ដែល​ជា​ផ្នែកមួយ​នៃ​ដំណើរ​ទស្សនកិច្ច​ផ្លូវការ​រយៈពេល​១ថ្ងៃ​នៅ​ព្រះរាជាណាចក្រកម្ពុជា។

គោលបំណង​នៃ​ទស្សនកិច្ច​នេះ​គឺ​ដើម្បី​ស្វែងយល់​អំពីការ​វិវឌ្ឃ​ថ្មីៗ​នៃ​ដំណើរការ​របស់ អ.វ.ត.ក អំពី ​ឧបសគ្គ​ចំពោះមុខ​ដែល​តុលាការ​ប្រឈម និង​អំពីការ​យល់ឃើញ​របស់​ជនរងគ្រោះ​ចំពោះ​ដំណើរការ​ សំណុំរឿង ០០១ ដែល​ទើបតែ​ត្រូវបាន​បញ្ចប់​កាលពី​ដើមឆ្នាំ២០១២នេះ  ក៏​ដូចជា​អំពី​ឥទ្ធិពល​នៃការ ព្យាបាល​របួស​ផ្លូវចិត្ត​ដែល​តុលាការ​អាចមាន​ទៅលើ​ជនរងគ្រោះ​ផ្ទាល់​ និង​ទៅលើ​ប្រជាជនកម្ពុជា​ជា ទូទៅ ព្រមទាំង​ស្វែងយល់​អំពី​ស្ថានភាព​ជាក់ស្តែង​នៃ​ដំណើរការ​សវនាការ​ក្នុង​សំណុំរឿង ០០២ ដែល​កំពុងតែ​ប្រព្រឹត្ត​ទៅ។

លោក ប្រោន បាន​ជួបប្រជុំ​ជាមួយ​ថ្នាក់ដឹកនាំ​រដ្ឋបាល​នៃ អ.វ.ត.ក ព្រម​ទាំង​ចៅក្រម​នៃ​អង្គជំនុំជម្រះសាលាដំបូង  ដើម្បី​ស្វែងយល់​អំពី​ការងារ​ ឧបសគ្គ​ចំពោះមុខ​នៅ​ផ្នែក​នីមួយៗ​នៃ​តុលាការ និង ជា​ពិសេស ការ​ប្រឈមមុខ​នឹង​កង្វះខាត​ថវិការ​របស់ អ.វ.ត.ក។ ជាង​នេះ​ទៅទៀត លោក ប្រោន ក៏​បាន​ជួប​ជាមួយ​ដើមបណ្តឹង​រដ្ឋប្បវេណី​ក្នុង​សំណុំរឿង ០០១ និង ០០២ ចំនួន​៦រូប​ផងដែរ ដែល​នៅ​ទីនោះ លោក​បាន​ស្តាប់​ជនរងគ្រោះ​សម្តែង​ការយល់ឃើញ​អំពីការ​ ចូលរួម​របស់​ពួកគាត់ នៅក្នុង​ដំណើរការ​របស់​ អ.វ.ត.ក  និង​កម្រិត​នៃ​ការផ្សះ​របួស​ផ្លូវចិត្ត​ដែល​គាត់​អាច ទទួល​បាន​បន្ទាប់ពី ការ​បញ្ចប់​សំណុំរឿង ០០១។

ជនរងគ្រោះ​ដែល​ជា​ដើមបណ្តឹងរដ្ឋប្បវេណី សុទ្ធតែ​បាន​សម្តែង​ការយល់ឃើញ​អំពី​សារៈសំខាន់​នៃ ការ​កាត់ទោស​អតីតមេដឹកនាំ​ជាន់ខ្ពស់ខ្មែរក្រហម និង​ក្តី​រំភើបរីករាយ​របស់គាត់​ដែល​មិន​នឹក​ស្មានថា នឹង​មាន​តុលាការខ្មែរក្រហម​កើតឡើង។ ពួកគាត់​ក៏បាន​សម្តែង​អំណរគុណ​ចំពោះ​ចក្រភពអង់គ្លេស ដែល​បាន​ចូលរួម​ចំណែក​ក្នុង​ដំណើរការ​របស់​ អ.វ.ត.ក ដោយ​បាន​ឧបត្ថម្ភ​គាំទ្រ​ទាំងផ្លូវចិត្ត​និង ហិរញ្ញវត្ថុ ដើម្បី​ឲ្យ​តុលាការ​នេះ​មាន​ដំណើរ​ទៅមុខ។

ឆ្លើយតប​ចំពោះមុខ​ដើមបណ្តឹងរដ្ឋប្បវេណី លោក ប្រោន បាន​សម្តែង​ក្តី​សង្ឃឹម​ថា ដំណើរការ​របស់​ អ.វ.ត.ក នឹង​ជួយ​ព្យាបាល​របួស​ផ្លូវចិត្ត​ជនរងគ្រោះ​កម្ពុជា និង​ជួយ​ឲ្យ​ដំណើរការ​ផ្សះផ្សាជាតិ​នៅ​កម្ពុជា​កើតឡើង​ប្រកប​ដោយ​ប្រសិទ្ធភាព។ លោក​បាន​ថ្លែង​ទៅកាន់​ដើមបណ្តឹងរដ្ឋប្បវេណី​ទាំង​៦រូប​ថា “ខ្ញុំ​សូម​កោតសរសើរ​នូវ​សេចក្តីក្លាហាន របស់​ជនរងគ្រោះ​ដែល​ចូលរួម​ក្នុង​ដំណើរការ​នេះ ដោយ​បាន​ប្រឈមមុខ​នឹង​ការ​រំឭក​ឡើងវិញ​នូវ​ការ​ពិត​ដ៏​គួរ​ឲ្យ​ឈឺចាប់​ដែល​អ្នក​ទាំងអស់​គ្នា​បាន​ឆ្លងកាត់។ ខ្ញុំ​សង្ឃឹម​ថា ដំណើរការ​របស់​ អ.វ.ត.ក នឹង​ជួយ​ព្យាបាល​របួស​ផ្លូវចិត្ត​របស់​អ្នក​ទាំងអស់គ្នា ហើយ​ខ្ញុំ​ក៏​សង្ឃឹម​ថា តាមរយៈ​ដំណើរ​ការ​នេះ ការ​ពិត​នឹង​លាតត្រដាង​អំពី​ប្រវត្តិសាស្រ្ត​ដ៏គួរ​ឲ្យ​រន្ធត់​នេះ ហើយ​ដំណើរការ​ផ្សះផ្សាជាតិ​មួយ​នឹង​កើតឡើង​នៅ​កម្ពុជា”។

លោក ប្រោន ក៏​បាន​ជួបប្រជុំ​ជាមួយ​លោកស្រី​ចៅក្រម ស៊ីលវៀ ខាតរ៉ាយ ចៅក្រម​នៃ​អង្គជំនុំជម្រះ សាលាដំបូង និង​សហព្រះរាជអាជ្ញា លោកស្រី ជា លាង និង​លោក អេនឌ្រូ ខេលី ផងដែរ។

សូម​បញ្ជាក់​ថា តាំងពី​ការ​ចាប់​បដិសន្ធិ​ដំបូង​រហូតមកដល់​បច្ចុប្បន្ន អ.វ.ត.ក បាន​ទទួល​ជំនួយ​ថវិកា​ពី ​ប្រទេសអង់គ្លេស​ចំនួន​ជិត ៧លានដុល្លារ អាមេរិក​ហើយ។ ដំណើរ​ទស្សនកិច្ច​របស់​លោក ជេរេមី ប្រោន មក​កាន់ អ.វ.ត.ក នា​ពេលនេះ បង្ហាញ​ពី​ការ​ប្តេជ្ញាចិត្ត​បន្ត​គាំទ្រ​របស់​ចក្រ​ភពអង់គ្លេស ចំពោះ កិច្ច​ខិតខំ​ប្រឹងប្រែង របស់ អ.វ.ត.ក នៅ​ក្នុង​កាលៈទេសៈ​ដ៏​មាន​សារសំខាន់​បំផុតនេះ ក្នុង​ការ​បំពេញ បេសកកម្ម​ជា​ប្រវត្តិសាស្រ្ត​ដើម្បី​នាំយក​យុត្តិធម៌​មក​ជូន​ប្រជាជនកម្ពុជា ចំពោះ​ឧក្រិដ្ឋកម្ម​ដែល​ត្រូវបាន​ ប្រព្រឹត្ត​ក្នុង​អំឡុង​របបកម្ពុជាប្រជាធិបតេយ្យ​ដែល​បាន​បណ្តាល​ឲ្យ​ប្រជាជនកម្ពុជា​ជិត​២លាននាក់​បាត់បង់​ជីវិត។

នៅ​ក្នុង​សំណុំរឿង ០០១ នៅ អ.វ.ត.ក ដែល​ទើបតែ​បញ្ចប់​នៅ​ដើម​ឆ្នាំ២០១២នេះ អង្គជំនុំជម្រះតុលាការកំពូល​បាន​ផ្ទន្ទាទោស​ជនជាប់ចោទ កាំង ហ្កេកអ៊ាវ ហៅ ឌុច អតីតប្រធានមន្ទីរ ស-២១ ឬ​គុកទួលស្លែង ឲ្យ​ជាប់​ពន្ធនាគារ​អស់​មួយជីវិត ពី​បទឧក្រិដ្ឋកម្មប្រឆាំងនឹងមនុស្សជាតិ និង​ការ​រំលោភបំពាន​ធ្ងន់ធ្ងរ​លើ​អនុសញ្ញា​ទីក្រុងហ្សឺណែវ​ឆ្នាំ១៩៤៩។ ដំណើរការ​នីតិវិធី​ក្នុង​សំណុំរឿង ០០២ ដែល​កំពុង​តែ​ប្រព្រឹត្ត​ទៅ​ប្រឆាំង​នឹង​ជនជាប់ចោទ​បីរូប គឺ នួន ជា អៀង សារី និង ខៀវ សំផន គឺជា​សំណុំរឿង​ដែល​សំខាន់​បំផុត​របស់ ​អ.វ.ត.ក ដែល​សាធារណជន​រំពឹងថា​នឹង​លាតត្រដាង​ការពិត​នូវអ្វី​ដែល​បាន​កើតឡើង​ក្នុង​របបកម្ពុជាប្រជាធិបតេយ្យ៕