តំណាងក្រសួង មន្ទីរ ស្ថាប័នរដ្ឋាភិបាល សាកលវិទ្យាល័យ បណ្ណាល័យ និង និសិ្សត ប្រមាណជាង៤០០នាក់ បានចូលរួមក្នុងពិធីចែកចាយសៀវភៅសាលដីកាស្ថាពរនៃសំណុំរឿង00១ ដែលប្រព្រឹត្តទៅនៅអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ព្រឹកថ្ងៃទី១១ ខែកក្កដា ឆ្នាំ២០១២ នេះ ក្រោមអធិបតីភាពឯកឧត្តម ក្រាញ់ តូនី ប្រធានការិយាល័យរដ្ឋបាលស្តីទីនៃ អ.វ.ត.ក។ ពិធីនេះគឺជានិមិត្តរូបនៃការផ្សព្វផ្សាយនិងចែកចាយជាផ្លូវការដល់សាធារណជន នូវសាលដីកាស្ថាពរនៃសំណុំរឿង ០០១ ប្រឆាំងនិង កាំង ហ្កេកអ៊ាវ ហៅ ឌុច ដែលត្រូវបានអង្គជំនុំជម្រះតុលាការកំពូលផ្តន្ទាទោសដាក់ពន្ធនាគារអស់មួយជីវិត។
ឆ្លៀតក្នុងឧិកាសនេះដែរ ឯកឧត្តម ក្រាញ់ តូនី ក៏បានផ្តល់បទឧទ្ទេសនាមដល់អ្នកចូលរួម អំពីប្រវត្តិ នៃការបង្កើត អ.វ.ត.ក និង អំពីដំណើវិវត្តន៍បច្ចុប្បន្នទាក់ទងនឹងសំណុំរឿង០០១ ដែលទើបតែត្រូវបានបញ្ចប់ជាស្ថាពរនៅដើមឆ្នាំ២០១២នេះ និងសំណុំរឿង ០០២ ដែលកំពុងតែដំណើរការ។
ការបោះពុម្ពផ្សាយសៀវភៅសាលក្រមរបស់អង្គជំនុំជម្រះសាលាដំបូង និងសៀវភៅសាលដីកា របស់អង្គជំនុំជម្រះតុលាការកំពូល ក្នុងសំណុំរឿង ០០១ គឺជាគោលបំណងរបស់ អ.វ.ត.ក ក្នុងការផ្តល់ ព័ត៌មាននិងចំណេះដឹងដល់សាធារណជនអំពីដំណើរការសំណុំរឿង ក៏ដូចជាអំពីទម្រង់នៃការសរសេរ សាលក្រមទាក់ទងនឹងសំណុំរឿងក្តីធំៗដែលមានលក្ខណៈអន្តរជាតិ។
និសិ្សត ហាង គឹមហួន មកពីសាកលវិទ្យាល័យមេគង្គកម្ពុជា បានបង្ហាញក្តីសប្បាយរីករាយដោយបានទទួលសៀវភៅសាលក្រមសង្ខេប ហើយបង្ហាញថាប្អូនពេញចិត្តចំពោះដំណើរការរបស់ អ.វ.ត.ក និងការផ្សព្វផ្សាយរបស់ អ.វ.ត.ក ដល់ប្រជាពលរដ្ឋឲ្យមានការយល់ដឹងអំពីដំណើរការនេះ។
និស្សិត គឹមហួន ថ្លែងថា៖ “សាលាក្តីជួយឲ្យយុវជនជំនាន់ក្រោយដូចជារូបខ្ញុំបានយល់ដឹងអំពីការពិតដែលបានកើតឡើងនៅក្នុងរបបខ្មែរក្រហម។ ពួកខ្ញុំជាក្មេងជំនាន់ក្រោយ ដែល មានការយល់ដឹងតិចតួចអំពីរបបខ្មែរក្រហម”។
ជានិសិ្សតនៅសាកលវិទ្យាល័យមេគង្គកម្ពុជាដូច គឹមហួរដែរ កញ្ញា ពេជ្រ សោភ័ណ្ឌ មានមតិទាក់ទងនឹងការចែក ជូនសាលដីកាស្ថាពរក្នុងសំណុំរឿង០០១នេះថា វាបានធ្វើអោយនាងដឹងច្រើនជាងមុនអំពីរបបខ្មែរក្រហម ។
លោក ពៅ សាវុធ អ្នកគ្រប់គ្រងវគ្គបណ្តុះបណ្តាលនៃវិទ្យាស្ថានកម្ពុជាសំរាប់ការសិក្សារផ្នែកសារពត៌មាន បានមានប្រសាសន៍ថា ការចែកចាយសៀវភៅសាលដីកាស្ថាពរនេះជួយអោយប្រជាជនដែលចង់ដឹងពីដំណើរការការកាត់ក្តីរបស់ឌុចដឹងកាន់តែច្បាស់។ លោកមានជំនឿជឿជាក់ថា ដំណើរការជំនុំជម្រះក្តីនៅ អ.វ.ត.ក មានភាពត្រឹមត្រូវ ដោយហេតុថាតុលាការនេះជាតុលាការកូនកាត់ដែលមានការសហការចូលរួមពីបរទេស។
មានទស្សនៈមិនខុសពីនិស្សិតប៉ុន្មានទេ កម្មសិក្សាការីនិងគ្រូបង្គោលក្នុងជួរកងកម្លាំងប្រដាប់អាវុធក៏បានផ្តល់សារៈសំខាន់ដល់ការជំនុំជម្រះក្តីមេដឹកនាំខ្មែរក្រហមដែរ។
លោកវរសេនីយត្រី សុខ សាន្ត ជាគ្រូឧទ្ទេសនាមអំពីប្រវត្តិសាស្ត្រកម្ពុជាប្រជាធិបតេយ្យ នៃវិទ្យាស្ថានទ័ពជើងគោក បានមានប្រសាសន៍ថា ការយល់ដឹងនេះពិតជាមានសារប្រយោជន៍ណាស់ដល់សិស្សផ្នែកយោធា ពីព្រោះវាបញ្ជាក់ថា នរណាក៏ដោយដែលបានប្រព្រឹត្តអំពើអាក្រក់ចំពោះប្រទេសជាតិរបស់ខ្លួន ត្រូវតែប្រឈមមុខនឹងការផ្តន្ទាទោសនៅចំពោះមុខច្បាប់។
ដូចគ្នានេះដែរ លោក សំ សុខឧត្តម ដែលជានិសិត្សឆ្នាំទី៣ នៃវិទ្យាស្ថានទ័ពជើងគោក មានមតិស្រដៀងគ្នា និងលោក សុខ សាន្ត ថា៖ “ការយល់ដឹងនេះមិនត្រឹមតែធ្វើឲ្យអ្នកដែលធ្វើខុសទទួលទោសនៅចំពោះមុខច្បាប់ប៉ុណ្ណោះទេ លើសពីនេះវាថែមទាំងអាចឲ្យអ្នកជំនាន់ក្រោយដែលកើតមិនទាន់សម័យខ្មែរក្រហមបានយល់ដឹងនិងជៀសវាងប្រព្រឹត្តអំពើដែលខុសឆ្គងនេះទៅថ្ងៃមុខ”។
សំណុំរឿង០០១ ជាសំណុំរឿងដំបូងនៅចំពោះមុខអង្គជំនុំជម្រះវិសាមញ្ញក្នុងតុលាការកម្ពុជា ដែលមានជនជាប់ចោទមួយរូបគឺ កាំង ហ្កេកអ៊ាវ ហៅឌុច អតីតប្រធានមន្ទីរស-២១ ក្នុងទីក្រុងភ្នំពេញ។ ដំណើរការសវនាការលើសំណុំរឿង ០០១ ប្រព្រឹត្តទៅអស់រយៈពេល៧៧ថ្ងៃ នៅក្នុងឆ្នាំ២០០៩។ អង្គជំនុំជម្រះសាលាដំបូងបានប្រកាសសាលក្រមនៅថ្ងៃទី២៦ខែកក្កដា ឆ្នាំ២០១០ ដោយផ្តន្ទាទោស កាំង ហ្កេកអ៊ាវ ហៅ ឌុច ដាក់ពន្ធនាគាររយៈពេល៣៥ឆ្នាំ។
បន្ទាប់ពីគ្រប់ភាគីពាក់ព័ន្ធបានដាក់ពាក្យបណ្តឹងសាទុក្ខប្រឆាំងនឹងសាលក្រមរបស់សាលាដំបូង អង្គជំនុំជម្រះតុលាការកំពូលបានបើកសវនាការលើបណ្តឹងសាទុក្ខនៅសប្តាហ៍ចុងក្រោយនៃខែមីនា ឆ្នាំ២០១១ ហើយនៅថ្ងៃទី៣ ខែកុម្ភៈ ឆ្នាំ២០១២ អង្គជំនុំជម្រះតុលាការកំពូលបានប្រកាសសាលដីកាស្ថាពរដោយផ្តន្ទាទោស ឌុច ដាក់ពន្ធនាគារអស់មួយជីវិត។
ក្រៅពីការបោះពុម្ពសៀវភៅសាលក្រមនិងសៀវភៅសាលដីកាក្នុងសំណុំរឿង ០០១ អ.វ.ត.ក ក៏បានចងក្រងនិងបោះពុម្ពសេចក្តីទទួលស្គាល់កំហុសនិងពាក្យសុំអភ័យទោសរបស់ ឌុច នៅក្នុងអំឡុងពេលសវនាការផងដែរ។ ឯកសារទាំងបីត្រូវបានចែកទៅដល់ក្រសួង មន្ទីរ ស្ថាប័ននានា ក្នុងជួររដ្ឋាភិបាល សាកលវិទ្យាល័យ បណ្ណាល័យ និងការិយាល័យឃុំ សង្កាត់ ដើម្បីជាប្រយោជន៍ដល់ ការសិក្សាស្រាវជ្រាវនិងស្វែងយល់របស់សាធារណជន៕