ប្រទេសអូស្រ្តាលីបានផ្តល់ជំនួយថវិកាបន្ថែមចំនួន ១,៤ លានដុល្លារអូស្រ្តាលី (ប្រមាណ ១,៤៦ លានដុល្លារអាមេរិក) ដល់ភាគីអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។ ជំនួយថវិកាថ្មីនេះ ដែលត្រូវបានប្រកាសដោយឯកឧត្តម បប់ ខារ រដ្ឋមន្ត្រីការបរទេស និងជាសមាជិកសភាអូស្រ្តាលី ក្នុងអំឡុងដំណើរទស្សនកិច្ចជាផ្លូវការរបស់ឯកឧត្តមនៅរាជធានីភ្នំពេញកាលពីខែកក្កដា ឆ្នាំ២០១២ ត្រូវបានផ្ទេរទៅអង្គការសហប្រជាជាតិរួចហើយ។
ជំនួយថវិកាលើកនេះគឺបន្ថែមទៅលើជំនួយថវិកាចំនួន ១,៦១ លានដុល្លារអូស្រ្តាលី ដែលប្រទេសអូស្រ្តាលីបានផ្តល់ដល់ភាគីទាំងពីរនៃ អ.វ.ត.ក កាលពីដើមឆ្នាំ២០១២នេះ។ បូករួមទាំងជំនួយលើកនេះផង ប្រទេសអូស្រ្តាលីបានផ្តល់ជំនួយថវិកាដល់ អ.វ.ត.ក សរុបចំនួន ១៩,៧១ លានដុល្លារអូស្រ្តាលី ហើយ។
ឆ្លើយតបនឹងជំនួយដ៏មានតម្លៃនេះ ឯកឧត្តម ក្រាញ់ តូនី ប្រធានការិយាល័យរដ្ឋបាលស្តីទី និងលោក ឃ្នុត រ៉ូសិនហក អនុប្រធានការិយាល័យរដ្ឋបាលនៃ អ.វ.ត.ក បានថ្លែងថា៖ “ក្នុងនាម អ.វ.ត.ក យើងសូមថ្លែងអំណរគុណចំពោះទឹកចិត្តសប្បុរសរបស់រដ្ឋាភិបាលអូស្រ្តាលី ដែលបន្តផ្តល់ការគាំទ្រដល់ដំណើរការរបស់ អ.វ.ត.ក។ ក្នុងកាលៈទេសៈដែល អ.វ.ត.ក កំពុងតែជួបប្រទះការលំបាកផ្នែកថវិកា ជំនួយនេះមានតម្លៃថ្លៃថ្លាជាទីបំផុត ក្នុងការធានាថា អ.វ.ត.ក អាចបន្តបេសកកម្មរបស់ខ្លួនដោយពុំមានភាពរអាក់រអួល”។