អង្គភាពគាំពារការការពារក្តីនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានតែងតាំងលោក Göran Sluiter ជាមេធាវីអន្តរជាតិតំណាងឲ្យជនសង្ស័យមួយរូបនៅក្នុងដីកាបញ្ជូនរឿងឲ្យស៊ើបសួរទីបី ដែលសហព្រះរាជអាជ្ញាអន្តរជាតិបានដាក់ជូនការិយាល័យសហចៅក្រមស៊ើបអង្កេតនៅថ្ងៃទី៧ ខែកញ្ញា ឆ្នាំ២០០៩។ ដីកាបញ្ជូនរឿងឲ្យស៊ើបសួរទីបីគឺជាផ្នែកមួយនៃសំណុំឯកសារក្នុងសំណុំរឿង ០០៤។
លោក Göran Sluiter ជាជនជាតិហូល្លង់ ជាមេធាវីការពារក្តីឧក្រិដ្ឋកម្មនៅទីក្រុងអាមស្ទើដាម និងជាសាស្រ្តាចារ្យផ្នែកឧក្រិដ្ឋកម្មអន្តរជាតិនៅសាកលវិទ្យាល័យអាមស្ទើដាម។ លោកមានបទពិសោធន៍ជ្រៅជ្រះលើផ្នែកឧក្រិដ្ឋកម្មអន្តរជាតិ ធ្លាប់បម្រើការជាចៅក្រមនៅក្នុងរឿងក្តីឧក្រិដ្ឋកម្មអន្តរជាតិជាច្រើននៅប្រទេសហូល្លង់ និងធ្លាប់បម្រើការនៅក្នុងក្រុមការពារក្តីនៅតុលាការឧក្រិដ្ឋកម្មអន្តរជាតិសម្រាប់អតីតប្រទេសយូហ្គោស្លាវី (ICTY) និងនៅតុលាការឧក្រិដ្ឋកម្មអន្តរជាតិ (ICC)។
ឈ្មោះជនសង្ស័យនៅក្នុងដីកាបញ្ជូនរឿងឲ្យស៊ើបសួរទីបីនៅតែត្រូវបានរក្សាជាការសម្ងាត់។