នាយករដ្ឋមន្ត្រីនូវែលហ្សេឡង់ ឯកឧត្តម ចន ឃី បានប្រកាសនៅក្នុងដំណើរទស្សនកិច្ចរបស់ឯកឧត្តមនៅអង្គជំនុំជម្រះវិសាមញ្ញក្នុងតុលាការកម្ពុជានៅព្រឹកនេះ សន្យាផ្តល់ជំនួយថ្មីបន្ថែមដល់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នូវថវិកាចំនួន ២០០ ០០០ ដុល្លារនូវែលហ្សេឡង់។
ឯកឧត្តមនាយករដ្ឋមន្ត្រីបានដឹកនាំគណៈប្រតិភូចំនួន ៨រូប មកធ្វើទស្សនកិច្ចនៅ អ.វ.ត.ក នៅមុនពេលបញ្ចប់ដំណើរ ទស្សនកិច្ចជាផ្លូវការរបស់ឯកឧត្តមមកកាន់កម្ពុជាដើម្បីចូលរួមក្នុងកិច្ចប្រជុំកំពូលអាស៊ាន។ នេះគឺជាលើកទី១ហើយ ដែល អ.វ.ត.ក បានទទួលដំណើរទស្សនកិច្ចរបស់ប្រមុខរដ្ឋាភិបាល។
ឯកឧត្តម ចន ឃី ប្រកាសអំពីការសន្យាផ្តល់ជំនួយថ្មីនេះនៅក្នុងជំនួបពិភាក្សាជាមួយប្រធានការិយាល័យរដ្ឋបាលស្តីទីនៃ អ.វ.ត.ក ឯកឧត្តម ក្រាញ់ តូនី និងលោក ឃ្នុត រ៉ូសិនហក ជាអនុប្រធាន។
ឯកឧត្តម បានមានប្រសាសន៍ថា “នូវែលហ្សេឡង់នឹងបន្តគាំទ្រសាលាក្តីខ្មែរក្រហម ដើម្បីឲ្យតុលាការនេះអាចបញ្ចប់កិច្ចការរបស់ខ្លួនក្នុងការជំនុំជម្រះក្តីអតីតមេដឹកនាំជាន់ខ្ពស់ខ្មែរក្រហម”។
ក្នុងឧិកាសនេះដែរ ឯកឧត្តមនាយករដ្ឋមន្ត្រីនូវែលហ្សេឡង់ ក៏បានជួបជាមួយលោកចៅក្រម និល ណុន ប្រធានអង្គជំនុំជម្រះសាលាដំបូងនៃ អ.វ.ត.ក និងលោកស្រីចៅក្រម ស៊ីលវៀរ ខាតរ៉ាយ ដែលជាជនជាតិនូវែលហ្សេឡង់ និងបានទស្សនាសាលសវនាការផងដែរ។
ឆ្លើយតបនឹងជំនួយសប្បុរសនេះ ឯកឧត្តម ក្រាញ់ តូនី និងលោក ឃ្នុតរ៉ូសិនយក បានថ្លែងថា “យើងសូមថ្លែងអំណរគុណចំពោះរដ្ឋាភិបាលនូវែលហ្សេឡង់ដែលបន្តផ្តល់ជំនួយថវិកាដល់ អ.វ.ត.ក”។
ប្រទេសនូវែលហ្សេឡង់បានផ្តល់ការគាំទ្រចំពោះ អ.វ.ត.ក តាំងពីការបង្កើតឡើងដំបូង និងបានផ្តល់ជំនួយថវិកាជិត ១លាន ដុល្លារនូវែលហ្សេឡង់ហើយ។ ជំនួយថវិកាលើកចុងក្រោយនេះ នឹងធ្វើឲ្យជំនួយសរុបរបស់ប្រទេសនូវែលហ្សេឡង់ កើនដល់ ១.២ លាន ដុល្លារនូវែលហ្សេឡង់។