ជំនួយថវិកាបន្ថែមចំនួន ២០០ ០០០ ដុល្លារនូវែលហ្សេឡង់ ដល់អង្គជំនុំជម្រះវិសាមញ្ញក្នុងតុលាការកម្ពុជា ដែលឯកឧត្តមនាយករដ្ឋមន្ត្រីនូវែលហ្សេឡង់បានសន្យាពីម្សិលមិញ ជាសញ្ញាវិជ្ជមាននិងលើកទឹកចិត្តចំពោះបុគ្គលិកនិងមន្ត្រីនៃ អ.វ.ត.ក ក៏ដូចជាចំពោះប្រជាជនកម្ពុជាទាំងអស់ ដែលបង្ហាញពីការបន្តការគាំទ្ររបស់រដ្ឋាភិបាលនូវែលហ្សេឡង់ ចំពោះដំណើរការស្វែងរកយុត្តិធម៌ជូនជនរងគ្រោះនៃឧក្រិដ្ឋកម្មធ្ងន់ធ្ងរដែលជឿថាត្រូវបានប្រព្រឹត្តដោយរបបកម្ពុជាប្រជាធិបតេយ្យ។
ការសន្យាផ្តល់ជំនួយបន្ថែមនេះធ្វើឡើងក្នុងអំឡុងទស្សនកិច្ចរយៈពេលជាង ១ម៉ោង របស់ ឯកឧត្តមនាយករដ្ឋមន្ត្រីនូវែលហ្សេឡង់និងមន្ត្រីជាន់ខ្ពស់៨រូបនៅ អ.វ.ត.ក នៅព្រឹកថ្ងៃទី២១ ខែវិច្ឆិកា ឆ្នាំ២០១២ ជាកិច្ចបញ្ចប់ដំណើរទស្សនកិច្ចជាផ្លូវការនៅកម្ពុជាដើម្បីចូលរួមកិច្ចប្រជុំកំពូលអាស៊ាន លើកទី២១ និងមុននឹងបន្តដំណើរទៅប្រទេសភូមា។
ឯកឧត្តម ចន ឃី បានថ្លែងប្រាប់អ្នកសារព័ត៌មានថា “យើងយល់អំពីសារសំខាន់នៃការងារដែល អ.វ.ត.ក បាននិងកំពុងធ្វើ ហើយយើងអបអរសាទ អ.វ.ត.ក ចំពោះការបញ្ចប់សំណុំរឿង ០០១ ដោយជោគជ័យ។ សម្រាប់ប្រជាជនកម្ពុជា នេះគឺជាដំណើរការដែលប្រកបដោយសារសំខាន់មួយ គឺការដាក់ឲ្យទទួលខុសត្រូវចំពោះឧក្រិដ្ឋកម្មដែលត្រូវបានប្រព្រឹត្ត មួយទៀតគឺការផ្សះផ្សាជាតិដែលកើតចេញពីដំណើរការនេះ។”
ឯកឧត្តមបានបន្ថែមថា “យើងអាចមើលឃើញយ៉ាងច្បាស់នូវដំណើរការផ្សះផ្សាជាតិចេញពីតុលាការខ្មែរក្រហម តាមរយៈការចូលរួមរបស់ប្រជាពលរដ្ឋជាង ១៦ម៉ឺននាក់ ដែលបានមកមើលតុលាការ ស្វែងយល់អំពីតុលាការ និងចូលរួមក្នុងដំណើរការរបស់តុលាការ និងតាមរយៈប្រព័ន្ធសារព័ត៌មាននានាដែលផ្សព្វផ្សាយជាប្រចាំអំពីតុលាការនេះ”។
នេះជាលើកទី១ហើយដែល អ.វ.ត.ក បានទទួលស្វាគមន៍ដំណើរទស្សនកិច្ចរបស់ថ្នាក់ដឹកនាំរដ្ឋាភិបាលនៃប្រទេសមួយ។ ដំណើរទស្សនកិច្ចរបស់ឯកឧត្តមនាយករដ្ឋមន្ត្រី ចន ឃី គឺជាការទទួលស្គាល់ថា អ្វីដែល អ.វ.ត.ក បាននិងកំពុងខិតខំប្រឹងប្រែងធ្វើ មានសារសំខាន់សម្រាប់ប្រទេសកម្ពុជា សម្រាប់ជនរងគ្រោះនៃរបបខ្មែរក្រហម ដែលមិនត្រឹមតែជាប្រជាជនកម្ពុជាប៉ុណ្ណោះទេ តែក្នុងនោះក៏មានជនរងគ្រោះម្នាក់ជាជនជាតិនូវែលហ្សេឡង់ និងមានជនរងគ្រោះជាជនជាតិដទៃផងដែរ។
ឯកឧត្តមនាយករដ្ឋមន្ត្រីបានសង្កត់ធ្ងន់ថា “សារសំខាន់នៃការងាររបស់ អ.វ.ត.ក គឺ អ្នកដែលប្រព្រឹត្តបទឧក្រិដ្ឋត្រូវតែទទួលខុសត្រូវចំពោះមុខច្បាប់។ នូវែលហ្សេឡង់ជាប្រទេសដែលលើកកម្ពស់ការគោរពសិទ្ធិមនុស្ស ដូច្នេះហើយបានជាយើងគាំទ្រដំណើរការរបស់ អ.វ.ត.ក។ ប្រជាជនកម្ពុជាច្រើនណាស់បានបាត់បង់ជីវិតក្នុងរបបខ្មែរក្រហម ហើយនូវែលហ្សេឡង់មិនអាចឈរឧិបដៃមើលបានទេ។ យើងត្រូវតែធានាថា អ្នកដែលបានប្រព្រឹត្តបទឧក្រិដ្ឋត្រូវតែប្រឈមមុខនឹងច្បាប់”។
នៅក្នុងដំណើរទស្សនកិច្ចនេះ ឯកឧត្តមនាយករដ្ឋមន្ត្រីក៏បានជួបពិភាក្សាជាមួយប្រធានការិយាល័យរដ្ឋបាលស្តីទីនៃ អ.វ.ត.ក ឯកឧត្តម ក្រាញ់ តូនី និងលោក ឃ្នុត រ៉ូសិនហក ជាអនុប្រធាន ព្រមទាំងបានជួបពិភាក្សាជាមួយលោកស្រីចៅក្រម ស៊ីលវៀរ ខាតរ៉ាយ ដែលមកពីប្រទេសនូវែលហ្សេឡង់ និងលោកចៅក្រម និល ណុន ជាប្រធានអង្គជំនុំជម្រះសាលាដំបូង ដើម្បីស្វែងយល់អំពីការងារចំពោះមុខ និងឧបសគ្គនានាដែល អ.វ.ត.ក ត្រូវជំនះដើម្បីបំពេញឈានទៅបញ្ចប់បេសកកម្មរបស់ខ្លួនដោយជោគជ័យ។
ក្នុងចំណោមជនរងគ្រោះជាង ១ម៉ឺន២ពាន់នាក់ ដែលត្រូវធ្វើទារុណកម្មនិងសម្លាប់នៅមន្ទីរសន្តិសុខ ស-២១ (គុកទួលស្លែង) ក៏មានជនបរទេសមួយចំនួន ក្នុងនោះ ជនរងគ្រោះមួយរូបជាជនជាតិនូវែលហ្សេឡង់ គឺលោក ឃែរី ហាមីល ដែលបច្ចុប្បន្ននេះ ប្អូនប្រុសរបស់គាត់ រ៉ប ហាមីល ត្រូវបានទទួលស្គាល់ជាដើមបណ្តឹងរដ្ឋប្បវេណីក្នុងសំណុំរឿង ០០១ និង ០០២។ នេះក៏ជាហេតុផលមួយនៃទស្សនកិច្ចរបស់ឯកឧត្តមនាយករដ្ឋមន្ត្រីនូវែលហ្សេឡង់នៅ អ.វ.ត.ក ផងដែរ។
ជាងនេះទៅទៀត ចៅក្រមមួយរូបក្នុងចំណោមចៅក្រមទាំង៥រូបនៅអង្គជំនុំជម្រះសាលាដំបូង គឺជាជនជាតិនូវែលហ្សេឡង់ គឺលោកស្រីចៅក្រម ស៊ីលវៀរ ខាតរ៉ាយ ដែលទទួលបានការគោរពយ៉ាងខ្ពស់ខ្ពស់នៅក្នុងប្រទេសរបស់លោកស្រី ជាស្ត្រីទីមួយដែលត្រូវបានទទួលស្គាល់និងផ្តល់តំណែងខ្ពស់ បំផុតខាងវិស័យច្បាប់នៅប្រទេសនូវែលហ្សេឡង់។ ឯកឧត្តម ចន ឃី បានប្រាប់អ្នកសារព័ត៌មានថា “វាមានសារសំខាន់ណាស់ដែលយើងផ្តល់ជំនួយថវិកាដល់ អ.វ.ត.ក ម្យ៉ាងគឺដើម្បីរួមចំណែកកាត់បន្ថយបន្ទុកចំណាយរបស់តុលាការ ម្យ៉ាងទៀតគឺដើម្បីបង្ហាញការគាំទ្ររបស់យើងចំពោះលោកស្រី ស៊ីលវៀរ ខាតរ៉ាយ ដែលបម្រើការនៅទីនេះក្នុងឋានៈជាចៅក្រមនៅអង្គជំនុំជម្រះសាលាដំបូង។”
ជាងនេះទៅទៀត ឯកឧត្តម ចន ឃី សង្ឃឹមថា ប្រជាជននូវែលហ្សេឡង់នឹងយល់អំពីសារសំខាន់របស់ អ.វ.ត.ក និងជំនួយរបស់នូវែលហ្សេឡង់ដល់តុលាការនេះ។ ឯកឧត្តមបន្ថែមថា “បន្ទាប់ពីវិលត្រឡប់ទៅប្រទេសនូវែលហ្សេឡង់វិញ ខ្ញុំសង្ឃឹមថានឹងផ្សព្វផ្សាយដល់ប្រជាជននូវែលហ្សេឡង់ ឲ្យយល់ដឹងអំពីរបបប៉ុលពត និងអំពីឧក្រិដ្ឋកម្មដែលបានកើតឡើងនៅទីនេះពីអតីតកាល។ ហើយខ្ញុំសង្ឃឹមថា ប្រជាជននូវែលហ្សេឡង់នឹងយល់អំពីសារសំខាន់នៃការងារដែលកំពុងតែដំណើរការនៅទីនេះ អំពីសារសំខាន់នៃការផ្តល់ជំនួយថវិការបស់នូវែលហ្សេឡង់ និងអំពីការងាររបស់លោកស្រី ស៊ីលវៀរ ខាតរ៉ាយ”។
ប្រទេសនូវែលហ្សេឡង់ស្ថិតក្នុងចំណោមប្រទេសមួយចំនួនដែលផ្តល់ការគាំទ្រទាំងបច្ចេកទេស និងហិរញ្ញវត្ថុ ចាប់តាំងពីពេលបង្កើត អ.វ.ត.ក ជាលើកដំបូងនៅឆ្នាំ ២០០៦។ គិតរហូតមកដល់ពេលនេះ ជំនួយថវិកាដែលប្រទេសនូវែលហ្សេឡង់បានផ្តល់ជូន អ.វ.ត.ក មានចំនួនសរុបប្រមាណ ១លាន២សែន ដុល្លារនូវែលហ្សេឡង់ហើយ៕