ផ្នែកគាំពារការការពារក្តី (DSS) នៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានតែងតាំងលោក អាង ឧត្តម ជាសហមេធាវីកម្ពុជា និងលោក Michael G. Karnavas ជាសហមេធាវីបរទេស ដើម្បីតំណាងជនសង្ស័យមួយរូបដែលមានឈ្មោះនៅក្នុងដីកាសន្និដ្ឋានបញ្ជូនរឿងឲ្យស៊ើបសួរទីពីរ ដែលសហព្រះរាជអាជ្ញាអន្តរជាតិបានដាក់ទៅការិយាល័យសហចៅក្រមស៊ើបអង្កេតកាលពីថ្ងៃទី ២០ ខែ វិច្ឆិកា ឆ្នាំ ២០០៨។ ដីកាសន្និដ្ឋានបញ្ជូនរឿងឲ្យស៊ើបសួរទីពីរនេះ គឺជាផ្នែកមួយនៃសំណុំឯកសារក្នុងសំណុំរឿង ០០៣។
អត្តសញ្ញាណរបស់ជនសង្ស័យ ដែលមានឈ្មោះនៅក្នុងដីកាសន្និដ្ឋានបញ្ជូនរឿងឲ្យស៊ើបសួរទីពីរនេះ នៅតែត្រូវបានរក្សាទុកជាសម្ងាត់។
លោក អាង ឧត្តម និងលោក Michael G. Karnavas គឺជាមេធាវីការពារក្តីដ៏មានបទពិសោធន៍ក្នុងរឿងក្តីព្រហ្មទណ្ឌ និងកំពុងបំពេញការងារនៅ អ.វ.ត.ក នាពេលបច្ចុប្បន្ន។ នៅ អ.វ.ត.ក ពួកគាត់តំណាងលោក អៀង សារី ដែលជាជនជាប់ចោទមួយរូបក្នុងសំណុំរឿង ០០២។
នេះគឺជាលើកដំបូងបង្អស់ក្នុងប្រវត្តិសាស្រ្តនៃ អ.វ.ត.ក ដែលផ្នែកគាំពារការការពារក្តីបានតែងតាំងមេធាវីដើម្បីតំណាងជនសង្ស័យ ឬជនជាប់ចោទ ជាច្រើនរូបក្នុងពេលដំណាលគ្នា។ នៅក្នុងការតែងតាំងនេះ ផ្នែកគាំពារការការពារក្តីបានពិនិត្យពិចារណាទៅលើជម្រើសរបស់ជនសង្ស័យ បទពិសោធន៍ទូទៅរបស់មេធាវីក្នុងវិស័យច្បាប់មនុស្សធម៌និងឧក្រិដ្ឋកម្មអន្តរជាតិ, កម្រិតនៃការយល់ដឹងរបស់ពួកគាត់អំពីវិធានជាមូលដ្ឋាន, ទម្លាប់អនុវត្តន៍ និងនីតិវិធីនៅ អ.វ.ត.ក, ចំណេះដឹងរបស់ពួកគាត់អំពីបរិបទប្រវត្តិសាស្រ្ត និងនយោបាយនៃរបបកម្ពុជាប្រជាធិបតេយ្យ និងលិខិតបដិសេធអំពីទំនាស់ផលប្រយោជន៍ទាំងអស់ជាធរមាន។ អង្គភាពគាំពារការការពារក្តីក៏បានពិនិត្យពិចារណាអំពីអំណះអំណាងរបស់ជនសង្ស័យអំពីភាពក្រីក្រផងដែរ។
សេចក្តីប្រកាសព័ត៌មានក្នុងទម្រង់ជា PDF