អង្គជំនុំជម្រះវិសាមញ្ញក្នុងតុលាការកម្ពុជាថ្លែងអំណរគុណចំពោះរដ្ឋាភិបាលនៃចក្រភពអង់គ្លេស ដែលបានសន្យាផ្តល់ជំនួយថវិកាបន្ថែមចំនួន ៦០០.០០០ ផោន (ប្រមាណ ១លាន ដុល្លារអាមេរិក) ដល់ភាគីអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។
រដ្ឋមន្ត្រីក្រសួងការបរទេសនៃចក្រភពអង់គ្លេស លោក វីល្លៀម ហេក (William Hague) បានប្រកាសអំពីវិភាគទានស្ម័គ្រចិត្តនេះ នៅក្នុងសេចក្តីប្រកាសថ្ងៃទី១៣ ខែធ្នូ ដោយលើកឡើងថា ជំនួយថ្មីនេះនឹងធានាឲ្យមានការដាក់ឲ្យទទួលខុសត្រូវចំពោះឧក្រិដ្ឋកម្មប្រឆាំងមនុស្សជាតិនៅក្នុងប្រវត្តិសាស្រ្តដែលទើបតែកន្លងផុតទៅ។
លោក ហេក បានថ្លែងថា “អង្គជំនុំជម្រះវិសាមញ្ញក្នុងតុលាការកម្ពុជាកំពុងតែនាំយកយុត្តិធម៌មកជូនប្រជាជនកម្ពុជារាប់លាននាក់ដែលបានរង់ចាំអស់ពេលជាយូរមកហើយ។ ទំហំនៃឧក្រិដ្ឋកម្មដែលត្រូវបានប្រព្រឹត្ត និងចំនួននៃជនរងគ្រោះ បានធ្វើឲ្យតុលាការនេះក្លាយជាតុលាការដ៏ពិសេសបំផុតចាប់តាំងពីមានតុលាការ នូរិមប៊ឺក មក”។
ចក្រភពអង់គ្លេសបានផ្តល់ជំនួយថវិកាដល់ អ.វ.ត.ក សរុបចំនួន ៦,៩៥ លានដុល្លារអាមេរិក (ក្នុងនោះ ៥,៤លានដុល្លារ សម្រាប់ភាគីអន្តរជាតិ និង ១,៥លានដុល្លារ សម្រាប់ភាគីជាតិ) ចាប់តាំងពីការចាប់បដិសន្ធិនៃតុលាការនេះនៅឆ្នាំ២០០៦មក។ បូករួមទាំងការសន្យាថ្មីនេះ ជំនួយសរុបរបស់ចក្រភពអង់គ្លេសឡើងដល់ ៧,៩ លានដុល្លារ។
ប្រធានការិយាល័យរដ្ឋបាលស្តីទី ឯកឧត្តម ក្រាញ់ តូនី និងមន្ត្រីទទួលបន្ទុកការិយាល័យអនុប្រធានរដ្ឋបាល លោក រ៉ាជីវ គុមរ៉ា បានឆ្លើយតប ចំពោះទឹកចិត្តសប្បុរសនេះថា៖ “តាងនាម អ.វ.ត.ក យើងខ្ញុំសូមសម្តែងអំណរគុណ ចំពោះការសន្យាថ្មីនេះរបស់រដ្ឋាភិបាលចក្រភពអង់គ្លេស ដែលធ្វើឡើងចំពេលដែល អ.វ.ត.ក ជួបប្រទះកង្វះខាតថវិកា”។