បន្ទាប់ពីសវនាការនៅថ្ងៃទី១៨ ទី២០ និងទី២១ ខែកុម្ភៈ អង្គជំនុំជម្រះសាលាដំបូងបានជម្រាបជូនភាគីពាក់ព័ន្ធ អំពីសក្ខីកម្មរបស់សាក្សីជំនាញពីររូបនាពេលខាងមុខ និងអំពីនីតិវិធី ដូចខាងក្រោម៖
អង្គជំនុំជម្រះនឹងស្តាប់សក្ខីកម្មរបស់លោក ហ្វ៊ីលីព ស្សត ចាប់ពីថ្ងៃច័ន្ទ ទី៤ ខែមីនា ឆ្នាំ២០១៣ និងសក្ខីកម្មរបស់លោកស្រី អេលីហ្សាប៊ែត ប៊ែកកឺ ចាប់ពីថ្ងៃទី១១ ខែមីនា ឆ្នាំ២០១៣។ ដោយអនុវត្តទៅតាមសេចក្តីណែនាំរបស់អង្គជំនុំជម្រះសាលាដំបូងនាពេលកន្លងមក សាក្សីទាំងពីររូបអាចនឹងត្រូវសួរដេញដោលពាក់ព័ន្ធនឹងសំណុំរឿង ០០២ ទាំងមូល ទៅតាមសមត្ថភាពដែលសាក្សីមានការយល់ដឹងនៅក្នុងជំនាញរបស់ខ្លួន ហើយភាគីទាំងអស់ត្រូវបានលើកទឹកចិត្តឲ្យផ្តោតសំណួររបស់ខ្លួនទៅលើអង្គហេតុដែលទាក់ទិននៅក្នុងសំណុំរឿង ០០២ ដំណាក់កាលទី១។
អង្គជំនុំជម្រះសាលាដំបូងនឹងចេញសេចក្តីសម្រេចប្រកបដោយហេតុផលជាក់លាក់ អំពីការបំបែកដំណាក់កាលនីមួយៗនៃសំណុំរឿង ០០២ បន្ទាប់ពីស្តាប់សក្ខីកម្មជំនាញរបស់វេជ្ជបណ្ឌិត ដែលនឹងពិនិត្យវាយតម្លៃទៅលើស្ថានភាពសុខភាព និងស្ថានភាពបញ្ញាស្មារតីក្នុងការចូលរួមការជំនុំជម្រះ របស់ នួន ជា និង អៀង សារី នៅខែមីនា ឆ្នាំ២០១៣។