អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានបញ្ចប់សវនាការធ្វើសេចក្តីសន្និដ្ឋានបញ្ចប់កិច្ចពិភាក្សាដេញដោលលើសំណុំរឿង ០០២/០១ ដែលមានរយៈពេល ១០ ថ្ងៃ ពាក់ព័ន្ធនឹងជនជាប់ចោទ នួន ជា និង ខៀវ សំផន នៅថ្ងៃទី ៣១ ខែ តុលា ឆ្នាំ ២០១៣។ នាពេលនេះ អង្គជំនុំជម្រះត្រូវធ្វើការពិភាក្សាដើម្បីសម្រេច ហើយរំពឹងថា សាលក្រមលើសំណុំរឿងនេះនឹងត្រូវចេញនៅក្នុងអំឡុងពេលឆមាសទីមួយឆ្នាំ ២០១៤។
សវនាការលើផ្នែកអង្គសេចក្តីនៃការជំនុំជម្រះនេះ បានចាប់ផ្តើមដំណើរការ ដោយមានការធ្វើសេចក្តីសន្និដ្ឋាន ចោទប្រកាន់នៅថ្ងៃទី ២១ ខែ វិច្ឆិកា ឆ្នាំ ២០១១ ហើយសវនាការពិនិត្យភស្តុតាងបានបញ្ចប់នៅថ្ងៃទី ២៣ ខែ កក្កដា ឆ្នាំ ២០១៣។ សវនាការជំនុំជម្រះ រួមទាំងការធ្វើសេចក្តីសន្និដ្ឋានបញ្ចប់កិច្ចពិភាក្សាដេញដោល មានរយៈពេលសរុបចំនួន ២២២ ថ្ងៃ។
បុគ្គលចំនួន ៩២ រូប បានមកផ្តល់ភស្តុតាងក្នុងអំឡុងពេលសវនាការជំនុំជម្រះក្តីនេះ ដែលរួមមាន សាក្សីជំនាញចំនួន ៣ រូប សាក្សីបញ្ជាក់អង្គហេតុចំនួន ៥៣ រូប សាក្សីបញ្ជាក់ពីអត្តចរិតជនជាប់ចោទចំនួន ៥ រូប និង ដើមបណ្តឹងរដ្ឋប្បវេណីចំនួន ៣១ រូប។ លើសពីនេះទៀត គ្រូពេទ្យព្យាបាលជនជាប់ចោទចំនួន ២ រូប និងអ្នកជំនាញផ្នែកវេជ្ជសាស្រ្តចំនួន ២ រូប ក៏បានមកផ្តល់សក្ខីកម្មអំពីស្ថានភាពសុខភាពរបស់ជនជាប់ចោទដែរ។
ការជំនុំជម្រះត្រូវបានសាធារណជនមានការចាប់អារម្មណ៍យ៉ាងខ្លាំងដែលពុំធ្លាប់មានពីមុនមក ដោយមានអ្នកចូលរួមចំនួន ១០៣ ២៧៤ នាក់ បានមកតាមដានសវនាការចំនួន ២២២ ថ្ងៃនេះ ដោយផ្ទាល់។
ជនជាប់ចោទដែលត្រូវជំនុំជម្រះក្នុងសំណុំរឿង ០០២/០១ មាន នួន ជា ដែលជាអនុលេខាបក្សកុម្មុយនីស្តកម្ពុជា និង ខៀវ សំផន ជាប្រមុខរដ្ឋនៃរបបកម្ពុជាប្រជាធិបតេយ្យ។ បទចោទនៅក្នុងសំណុំរឿង ០០២/០១ ផ្តោតទៅលើឧក្រិដ្ឋកម្មប្រឆាំងនឹងមនុស្សជាតិពាក់ព័ន្ធនឹងការផ្លាស់ទីលំនៅប្រជាជនដោយបង្ខំចេញពីក្រុងភ្នំពេញនៅ ខែ មេសា ឆ្នាំ ១៩៧៥ និងការផ្លាស់ទីលំនៅប្រជាជនចេញពីតំបន់ផ្សេងៗនៅពេលក្រោយមកទៀត (ដំណាក់កាលទី១ និងទី២) និងការសម្លាប់ទាហានរបបសាធារណរដ្ឋខ្មែរនៅទួលពោធិ៍ជ្រៃក្នុងខេត្តពោធិ៍សាត់។
ង្គជំនុំជម្រះសាលាដំបូងក៏បានធ្វើសវនាការពិនិត្យលើភស្តុតាងស្តីពីសាវតារប្រវត្តិសាស្រ្ត និងការបង្កើតរដ្ឋាភិបាលកម្ពុជាប្រជាធិបតេយ្យ និងតួនាទីរបស់ជនជាប់ចោទនៅក្នុងរដ្ឋាភិបាល រួមទាំង ភស្តុតាងស្តីពីរចនាសម្ព័ន្ធរដ្ឋបាល និងទំនាក់ទំនងនៅក្នុងរបបកម្ពុជាប្រជាធិបតេយ្យ។
Photos from closing statements is available on our Flickr channel: www.flickr.com/krtribunal