លោក ម៉ាទីន ខា​រ៉ុប​គីន ​ត្រូវ​បាន​តែង​តាំង​ជា​ចៅ​ក្រុម​អន្តរ​ជាតិ​បម្រុង​ថ្មី​នៃ​អង្គ​ជំនុំ​ជម្រះ​សាលា​ដំបូង​

បន្ទាប់ពីត្រូវបានជ្រើសតាំងដោយឯកឧត្តម បាន គីមូន អគ្គលេខាធិការអង្គការសហប្រជាជាតិ និងទទួលបានការអនុម័តយល់ព្រមពីឧត្តមក្រុមប្រឹក្សានៃអង្គចៅក្រម សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់បានតែងតាំងលោក ម៉ាទីន ខារ៉ុបគីន (ជនជាតិអាមេរិក) ជាចៅក្រមអន្តរជាតិបម្រុងថ្មី បម្រើការងារនៅអង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។ លោកជំនួស លោកស្រី ក្លូឌៀ ហ្វិន (ជនជាតិអូទ្រីស)ដែលត្រូវបានតែងតាំងជាចៅក្រម
អន្តរជាតិ នៅអង្គជំនុំជម្រះសាលាដំបូងនិងបានចូលកាន់តំណែងនេះតាំងពីថ្ងៃទី១ ខែកញ្ញា ឆ្នាំ ២០១៤ មក។

ចៅក្រម ខារ៉ុបគីន បានទទួលសញ្ញាប័ត្រថ្នាក់បណ្ឌិតផ្នែកច្បាប់ពីសាលាច្បាប់ Brooklyn។ ចាប់ពីឆ្នាំ ២០០៦ ដល់ឆ្នាំ ២០១៤ ចៅក្រម ខារ៉ុបគីន គឺជាអនុប្រធានគណៈកម្មការ
ជំនុំជម្រះនៃនាយកដ្ឋាននគរបាលទីក្រុងញូវយ៉ក ដោយនៅក្នុងតួនាទីនេះ គាត់ជាប្រធានចៅក្រមមួយចំនួនផ្សេងទៀតដែលគាត់បានគ្រប់គ្រងដំណើរការជំនុំជម្រះលើបញ្ហា
វិន័យនៅក្នុងជួរកម្លាំងនគរបាលនៅទីនោះ។ ចៅក្រមខារ៉ុបគីន ក៏ធ្លាប់ជាចៅក្រមបម្រុងនៃអង្គជំនុំជម្រះតុលាការកំពូលនៃ អ.វ.ត.ក នៅកម្ពុជា នៅក្នុងដំណាក់កាលបង្កើត
វិធានផ្ទៃក្នុងរបស់ អ.វ.ត.ក ក្នុងអំឡុងពីឆ្នាំ ២០០៦ ដល់ឆ្នាំ ២០០៨។ ពីឆ្នាំ ២០០៤ ដល់ឆ្នាំ ២០០៥ គាត់បានបំពេញតួនាទីជាចៅក្រមអន្តរជាតិនៃក្រុមបំពេញបេសកកម្ម
រដ្ឋបាលបណ្តោះអាសន្នរបស់អង្គការសហប្រជាជាតិនៅ Kosovo។ ចៅក្រម ខារ៉ុបគីន ត្រូវបានតែងតាំងដោយចៅហ្វាយក្រុង Edward I. Koch នៅឆ្នាំ ១៩៨៦ ឲ្យបំពេញ
តួនាទីជាចៅក្រមនៃតុលាការព្រហ្មទណ្ឌក្រុងញូវយ៉ក ហើយគាត់ក៏ត្រូវបានតែងតាំងបន្តម្តងទៀតនៅឆ្នាំ ១៩៩៤ ដោយចៅហ្វាយក្រុង Rudolph Giuliani។ ចៅក្រម Karopkin ក៏បានបំពេញតួនាទីជាចៅក្រមស្តីទីនៃតុលាការកំពូល និងជាចៅក្រមស្តីទីនៃតុលាការគ្រួសាររហូតទល់ពេលគាត់ចាកចេញពីតុលាការក្រុងញូវយ៉កនៅឆ្នាំ ២០០៣។ ចៅក្រម Karopkin ធ្លាប់បំពេញតួនាទីជាមេធាវីរងនៅស្រុក Brooklyn ក្នុងទីក្រុងញូវយ៉កពីឆ្នាំ ១៩៧២ ដល់ឆ្នាំ ១៩៧៨ និងមានតួនាទីជាអគ្គអធិការនៃនាយក
ដ្ឋានឧទ្យានទីក្រុងញូវយ៉ក ពីឆ្នាំ ១៩៧៨ ដល់ឆ្នាំ ១៩៨១ និងមានតួនាទីជាអគ្គអធិការនៃនាយកដ្ឋានអគ្គីភ័យទីក្រុងញូវយ៉ក ពីឆ្នាំ ១៩៨១ ដល់ឆ្នាំ ១៩៨៦។

ចៅក្រម Karopkin ក៏បានបង្រៀននៅមហាវិទ្យាល័យចិត្តសាស្រ្តនៃសាកលវិទ្យាល័យញូយ៉កក្នុងឋានៈជាសាស្រ្តាចារ្យផ្នែកនីតិចិត្តសាស្រ្តផងដែរ។