នៅថ្ងៃទី០១ ខែមីនា ឆ្នាំ២០២២ នេះ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ដាក់ឲ្យដំណើរការសេវាកម្មថ្មីចំនួនពីរ ដើម្បីបង្កើនការចូលពិនិត្យមើលកំណត់ហេតុសំណុំរឿងសាធារណៈ។
សាធារណជន ដែលស្វែងរកឯកសារជាក់លាក់ពាក់ព័ន្ធនឹងដំណើរការតុលាការនៅចំពោះមុខ អ.វ.ត.ក នៅពេលនេះអាចដាក់ពាក្យស្នើសុំពិនិត្យឯកសារ បានដោយផ្ទាល់ពីគេហទំព័រ។ អ.វ.ត.ក នឹងជួយក្នុងការស្វែងរកព័ត៌មានដែលបានស្នើសុំ ហើយប្រសិនបើចាត់ប្រភេទជាឯកសារសាធារណៈ ឯកសារពាក់ព័ន្ធទាំងនេះនឹងត្រូវកំណត់អត្តសញ្ញាណ និងបង្ហោះទៅក្នុងគេហទំព័រ អ.វ.ត.ក ប្រសិនបើមិនទាន់មាន។
អ្នកសិក្សាស្រាវជ្រាវ អ្នកស្រាវជ្រាវ និងអ្នកប្រកបវិជ្ជាជីវៈនានា ដែលត្រូវការចូលពិនិត្យមើលកំណត់ត្រា សំណុំរឿងសាធារណៈ នៅក្នុងបណ្ណសារឌីជីថលរបស់ អ.វ.ត.ក អាចដាក់ពាក្យស្នើសុំចូលពិនិត្យមើលមូលដ្ឋានទិន្នន័យ។ បន្ទាប់ពីដំណាក់កាលសាកល្បងដំបូង ការចូលពិនិត្យមើលមូលដ្ឋានទិន្នន័យបែបនេះ នឹងដាក់បញ្ចូលជាបណ្តើរៗផងដែរនូវដៃគូពាក់ព័ន្ធផ្សេងទៀត ហើយដោយមានការបង្កើតគេហទំព័រថ្មីមួយនៅក្នុងឆ្នាំ២០២៣ បុគ្គលគ្រប់រូបនឹងអាចចូលពិនិត្យមើលបាន។
ទិដ្ឋភាពទាំងពីរនេះ ត្រូវបានអនុវត្ត ដោយស្របទៅតាមកិច្ចព្រមព្រៀងបន្ថែមទៅនឹងកិច្ចព្រមព្រៀងរវាងអង្គការសហប្រជាជាតិ និងរាជរដ្ឋាភិបាលកម្ពុជា ដែលតម្រូវឲ្យ អ.វ.ត.ក រក្សា និងគ្រប់គ្រងបណ្ណសាររបស់ខ្លួន ឆ្លើយតបទៅនឹងសំណើសុំចូលពិនិត្យមើលឯកសារ និងផ្សព្វផ្សាយព័ត៌មានទៅដល់សាធារណជន ពាក់ព័ន្ធនឹងអង្គជំនុំជម្រះវិសាមញ្ញ។