អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) រៀបចំទស្សនកិច្ចសិក្សាជូននិស្សិត និងយុវជនជាង២០០ នាក់មកពីខេត្តកំពង់ចាម។ គោលបំណងនៃការរៀបចំដំណើរទស្សនកិច្ចសិក្សានេះ គឺដើម្បីផ្ដល់ឱ្យយុវសិស្សទាំងអស់បានចងចាំ និងបានឈ្វេងយល់ស៊ីជម្រៅអំពីឧក្រិដ្ឋកម្មដ៏សាហាវយង់ខ្នង ដែលបានកើតឡើងនៅក្នុងរបបឃោរឃៅខ្មៅងងឹត និងដើម្បីរំឮកវិញ្ញាណក្ខ័ណជនរងគ្រោះពីរបបនោះផងដែរ។
ក្នុងដំណើរទស្សនកិច្ចសិក្សានៅថ្ងៃនេះ យុវជន និងនិស្សិតទាំងអស់បានទៅទស្សនកិច្ចសិក្សាសារៈមន្ទីរប្រល័យពូជសាសន៍គុកទួលស្លែង មជ្ឈមណ្ឌលប្រល័យពូជសាសន៍ជើងឯក វិមានឈ្នះឈ្នះ និងមានបទបង្ហាញមន្ដ្រីមកពីសាលាក្ដីខ្មែរក្រហម អំពីដំណើការជំនុំជម្រះក្ដីលើអតីតមេដឹកនាំជាន់ខ្ពស់នៃរបបកម្ពុជាប្រជាធិបតេយ្យ។ ក្រោយពេលបញ្ចប់ទស្សនកិច្ចសិក្សានៅក្នុងមួយថ្ងៃនេះ យុវជនទាំងអស់បានទទួលព័ត៌មាន និងចំណេះដឹងយ៉ាងច្រើនជុំវិញដំណើការជំនុំជម្រះក្តីលើអតីតមេដឹកនាំខ្មែរក្រហម ការធ្វើទារុណកម្មយ៉ាងព្រៃផ្សៃ និងការកាប់សម្លាប់ប្រជាពលរដ្ឋកម្ពុជាដោយពួកខ្មែរក្រហម និងការពលីរបស់ថ្នាក់ដឹកនាំកម្ពុជាក្នុងការរំដោះប្រទេសជាតិចេញពីរបបប្រល័យពូជសាសន៍នោះ។
យុវតីម្នាក់ដែលចូលរួមក្នុងកម្មវិធីនេះបានលើកឡើងថា កម្មវិធីទស្សនកិច្ចសិក្សានេះ មានសារៈសំខាន់ណាស់សម្រាប់រូបគាត់ ក៏ដូចជាយុវជនផ្សេងៗទៀត ព្រោះកញ្ញាយល់ថា ទស្សនកិច្ចសិក្សានេះបានផ្ដល់ជូនចំណេះដឹង និងឃើញផ្ទាល់ភ្នែកអំពីស្លាកស្នាមហេតុការណ៍ដ៏អាក្រក់ដែលដក់ជាប់នៅក្នុងដួងចិត្តខ្មែរគ្រប់រូប។ កញ្ញាបន្ថែមថា ការចូលរួមស្វែងយល់អំពីប្រវត្តិសាស្ដ្រកម្ពុជាប្រជាធិបតេយ្យ គឺជាការចូលរួមទប់ស្កាត់មិនឱ្យរបបប្រល័យពូជសាសន៍ផងដែរកើតឡើងវិញផងដែរ។
យុវជនទាំងនេះក៏បានថ្លែងកោតសរសើរ និងដឹងគុណដល់គោលនយោបាយឈ្នះឈ្នះរបស់រាជរដ្ឋាភិបាលកម្ពុជា ដែលបានដឹកនាំប្រទេសនាំមកនូវសុខសន្ដិភាព និងស្ថេរភាពសង្គម។ ពួកគេក៏បានថ្លែងអំណរគុណសាលាក្ដីខ្មែរក្រហម ដែលបានរៀបចំកម្មវិធីដើម្បីឲ្យពួកគាត់បានយល់ដឹង បានទស្សនាទីតាំងឧក្រិដ្ឋកម្មដែលបន្សល់ទុកពីរបបខ្មែរក្រហម និងបានមកឃើញការអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះផងដែរ។
សូមបញ្ជាក់ថា ដំណើរទស្សនកិច្ចសិក្សានេះ ត្រូវបានរៀបចំរៀងរាល់សប្ដាហ៍ ជូនសិស្សានុសិស្ស និស្សិត យុវជន និងពលរដ្ឋទូទៅ ដើម្បីជួយជម្រុញដល់ការចងចាំ និងការចូលរួមទប់ស្កាត់ការវិលត្រឡប់មកវិញនូវអំពើឃោរឃៅ ដូចក្នុងរបបខ្មែរក្រហមមកលើទឹកដីកម្ពុជាសាជាថ្មី។
ចាប់តាំងពីតុលាការដំណើរការដំបូង រហូតមកដល់ឆ្នាំ២០២៣ នេះ សាធារណជនជាតិ និងអន្តរជាតិជាងកន្លះលាននាក់ហើយ បានចូលរួមក្នុងដំណើរទស្សនកិច្ចសិក្សា ក្រោមការសម្របសម្រួល និងរៀបចំដោយផ្នែកកិច្ចការសាធារណៈនៃសាលាក្តីខ្មែរក្រហម៕