លោក Fergal Gaynor (អៀរឡង់)
នៅថ្ងៃទី១៥ ខែកក្កដា ឆ្នាំ២០២២ លោក ហ្វេហ្គល ហ្គេន័រ (ប្រទេសអៀកឡង់) បានទទួលភារកិច្ចជាសហព្រះរាជអាជ្ញាអន្តរជាតិបម្រុង បន្ទាប់ពីលោកស្រី ប្រិនដា ហូលលីស (សហរដ្ឋអាមេរិច) បានដាក់ពាក្យលាលែងពីតំណែង។
មុនពេលទទួលការតែងតាំង លោក Gaynor មានតួនាទីមួយចំនួននៅតុលាការព្រហ្មទណ្ឌអន្តរជាតិ និងយន្តការស៊ើបអង្កេតអន្តរជាតិ។ ពីឆ្នាំ២០០១ ដល់ឆ្នាំ២០០៧ និងពីឆ្នាំ២០០៩ ដល់ឆ្នាំ២០១៣ គាត់បានបំពេញការងារនៅតុលាការព្រហ្មទណ្ឌអន្តរជាតិសម្រាប់អតីតប្រទេសយូហ្គោស្លាវី ជាមេធាវីអយ្យការនៅក្នុង រឿងក្តី Karadžić, Krajišnik, Plavšić, Deronjić, Ljubičić, Lukić & Lukić, Perišić, Mico Stanišić, Bralo និង Cesić។ ពីឆ្នាំ២០០៧ ដល់ឆ្នាំ២០០៨ គាត់ជាមេធាវីអយ្យការនៅតុលាការព្រហ្មទណ្ឌអន្តរជាតិសម្រាប់ប្រទេសរវ៉ាន់ដា នៅក្នុងរឿងក្តី Nyiramasuhuko et al។ គាត់បានបំពេញការងារនៅទីក្រុងបៃរូតក្នុងនាមជាទីប្រឹក្សាច្បាប់នៃគណៈកម្មការស៊ើបអង្កេតឯករាជ្យអន្តរជាតិនៃអង្គការសហប្រជាជាតិ (ឆ្នាំ២០០៧)។ គាត់គឺជាព្រះរាជអាជ្ញារងជាន់ខ្ពស់នៃ អ.វ.ត.ក ក្នុងឆ្នាំ២០១៥ និងឆ្នាំ២០១៦ មុនពេលផ្លាស់ទីកាន់តំណែងជាប្រធានក្រុមស៊ើបអង្កេតនៅគណៈកម្មការយុត្តិធម៌ និងគណនេយ្យភាពអន្តរជាតិ ពីឆ្នាំ២០១៧ ដល់ឆ្នាំ២០១៩។
លោក Gaynor ធ្លាប់តំណាងឲ្យជនរងគ្រោះនៅតុលាការ ICC។ គាត់គឺជាមេធាវីនាំមុខតំណាងជនរងគ្រោះនៅក្នុង រឿងក្តី Kenyatta ពីឆ្នាំ២០១៣ ដល់ឆ្នាំ២០១៥ និងតំណាងជនរងគ្រោះដែលស្វែងរកការបើកការស៊ើបអង្កេត នៅក្នុងស្ថានភាពនៅប្រទេសអាហ្វហ្កានីស្ថាន និងស្ថានភាពនៅប៉ាឡេស្ទីន។
គាត់ជាសមាជិកគណៈមេធាវីអៀរឡង់។ នៅខែតុលា ឆ្នាំ២០២០ គាត់បានទទួលការតែងតាំងជាចៅក្រមនៅអង្គជំនុំជម្រះពិសេសនៅកូសូវ៉ូ។
- សញ្ជាតិ : ជនជាតិអៀរឡង់
- ការិយាល័យ : ការិយាល័យសហព្រះរាជអាជ្ញា,
- តួនាទី : សហព្រះរាជអាជ្ញាអន្តរជាតិបម្រុង