លោក សុះ ម៉ីន

ដើមបណ្តឹងរដ្ឋប្បវេណី លោក សុះ ម៊ីន អាយុ៦១ឆ្នាំ បានរៀបរាប់អំពីការប្រព្រឹត្តិលើជនជាតិចាមក្នុងរបបកម្ពុជាប្រជាធិបតេយ្យ។ គាត់បានពន្យល់ពីរបៀបដែលខ្មែរក្រហមហាមឃាត់ជនជាតិចាមមិនអោយគោរពសាសនារបស់ពួកគេ។ ជនជាតិចាមត្រូវបានបង្ខំឱ្យបរិភោគសាច់ជ្រូក ហើយត្រូវបានហាមឃាត់មិនឱ្យតមអាហារ និងអធិស្ឋាន។ លោក សុះ ក៏បានលាតត្រដាងដែរថា គេហាមប្រើភាសារបស់ពួកគេ ហើយស្ត្រីត្រូវបានបង្ខំឱ្យកាត់សក់របស់ពួកគេ។ លោកបានប្រាប់ថា ប្រសិនបើពួកគេប្រឆាំងនឹងគោលការណ៍ណាមួយ នោះគេនឹងត្រូវគេចោទថាជាសត្រូវរបស់អង្គការ។ លោក សុះ បញ្ជាក់ថា មនុស្សត្រូវបានចាប់ខ្លួនដោយគ្មានការពន្យល់សមហេតុផល។ បងប្អូនជីដូនមួយរបស់គាត់បានប្រាប់គាត់ថា មានផែនការចាប់ខ្លួនជនជាតិចាមចំនួន ៨០ នាក់ ហើយលោកសុះ បានរៀបចំការបះបោរជាមួយមនុស្សពីរនាក់ទៀត។ លោកពន្យល់ថា ក្រោយការបង្ក្រាបការបះបោរ ទាហានបានយកជនជាតិចាមចេញពីភូមិ ហើយសួរចម្លើយ និងធ្វើទារុណកម្មពួកគេ។ លោកក៏បានរៀបរាប់ពីស្ថានភាពការងារ និងជីវភាពនៅកន្លែងធ្វើការផងដែរ។ លោកបញ្ជាក់ថា លក្ខខណ្ឌគឺដូចគ្នាសម្រាប់ជនជាតិចាម និងខ្មែរ ហើយលោកបានឃើញសាកសពជាច្រើន ប៉ុន្តែលោកមិនបានឃើញការប្រហារជីវិតអ្វីឡើយ។ លោក សុះ បានបាត់បង់សាច់ញាតិរបស់គាត់ចំនួនប្រាំពីរក្នុងរបបខ្មែរក្រហម។