គរុសិស្សចំនួន ៣០០ នាក់ មកពីវិទ្យាស្ថានជាតិអប់រំ ក្នុងទីក្រុងភ្នំពេញ បានមកធ្វើទស្សនកិច្ចសិក្សា នៅអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។ ទស្សនកិច្ចនេះបានប្រព្រឹត្តទៅនៅថ្ងៃទី ១១ ខែ មិថុនា ឆ្នាំ ២០១៩។ ទស្សនកិច្ចដែលរៀបចំដោយផ្នែកកិច្ចការសាធារណៈនេះ ធ្វើឡើងក្នុងគោលបំណងផ្ដល់ចំណេះដឹងដល់ សិស្សានុសិស្សទាំងអស់ អំពីដំណើរការរបស់សាលាក្ដីខ្មែរក្រហមក្នុងការជំនុំជម្រះក្តីលើអតីតមេដឹកនាំជាន់ខ្ពស់ និងអ្នកទទួលខុសត្រូវខ្ពស់ក្នុងឧក្រិដ្ឋកម្មធ្ងន់ធ្ងរបំផុតប្រព្រឹត្តនៅក្នុងអំឡុងពេលនៃរបបខ្មែរក្រហម ក៏ដូចជាការសិក្សាស្វែងយល់បន្ថែមអំពីប្រវត្តិសាស្ដ្រនៃរបបកម្ពុជាប្រជាធិបតេយ្យ។ ក្រៅពី ទស្សនកិច្ចនៅសាលាក្ដីខ្មែរក្រហម សិស្សានុសិស្សទាំងអស់ ក៏បានទៅទស្សនកិច្ចនៅមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលតម្កល់ឯកសារច្បាប់នៃអង្គជំនុំជម្រះវិសាមញ្ញក្នុងតុលាការផងដែរ៕
