ប្រជាជនជាច្រើននាក់នៅខេត្តសៀមរាប បានស្គាល់លោក ខាំ លន់ អាយុ៦៩ឆ្នាំ ជាអតីតមន្ត្រីរាជការមួយរូបដែលបានស្ម័គ្រចិត្តផ្សព្វផ្សាយព័ត៌មានអំពីអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅក្នុងចំណោមប្រជាជន និងដែលបានដឹកនាំប្រជាជនជាង ៦០០០នាក់ មកធ្វើទស្សនកិច្ចសិក្សានៅ អ.វ.ត.ក។
លោក ខាំ លន់ បានសម្តែងអារម្មណ៍របស់លោកថា “ខ្ញុំមានមោទនភាពខ្លាំងណាស់ដែលបានបម្រើប្រជាពលរដ្ឋនិងប្រទេសរបស់ខ្ញុំ។ ខ្ញុំខិតខំចំណាយកម្លាំងកាយ កម្លាំងចិត្ត និងពេលវេលា ដោយមិនស្តាយនេះ គឺថាចំណុចទីមួយ គឺខ្ញុំមានមនោសញ្ចេតនាចង់ឲ្យប្រជាជនបានស្គាល់ពីកន្លែងកាត់ក្តី ហើយបានមកស្តាប់ការកាត់ក្តីផ្ទាល់”។
លោក ខាំ លន់ បានជូនដំណឹងដល់ប្រជាជនក្នុងឃុំស្រុករបស់គាត់អំពីកម្មវិធីទស្សនកិច្ចសិក្សារបស់ អ.វ.ត.ក ដែលនាំប្រជាពលរដ្ឋពីតាមបណ្តាខេត្តមកកាន់រាជធានីភ្នំពេញដើម្បីទស្សនាសារមន្ទីរប្រល័យពូជសាសន៍ទួលស្លែង វាលពិឃាតជើងឯក និងសាលសវនាការនៃ អ.វ.ត.ក។ នៅក្នុងដំណើរទស្សនកិច្ចមួយចំនួន លោកបានចូលរួមពិធីបង្សុកូលរំឭកដល់វិញ្ញាណក្ខ័ន្ធជនរងគ្រោះដែលបានបាត់បង់ជីវិត។ នៅក្នុងដំណើរទស្សនកិច្ចលើកចុងក្រោយ លោកត្រូវបានអញ្ជើញចូលរួមក្នុងពិធីសូត្រមន្តបង្សុកូលនៅជើងឯក ដែលចូលរួមដោយព្រះសង្ឃចំនួន ៧៩អង្គ។
លោក ខាំ លន់ បានផ្តោតសកម្មភាពរបស់លោកជាពិសេសទៅលើការអប់រំយុវវ័យនៅក្នុងខេត្តសៀមរាប អំពីប្រវត្តិសាស្ត្ររបបខ្មែរក្រហម និងអំពីសវនាការជំនុំជម្រះក្តីអតីតមេដឹកនាំខ្មែរក្រហម។ លោកមានប្រសាសន៍ថា “ខ្ញុំចង់ឲ្យយុវជនខ្មែរបានឃើញតុលាការនេះ និងឃើញជនជាប់ចោទត្រូវគេនាំមកអង្គុយនៅមុខរង្វង់ក្រចកសេះដោយផ្ទាល់ភ្នែក ដើម្បីពេលដែលពួកគេក្លាយជាអ្នកដឹកនាំប្រទេស ពួកគេនឹងមិនធ្វើដូចមេដឹកនាំខ្មែរក្រហមទាំងនេះ”។
គេជឿជាក់ថា ប្រជាជនប្រមាណ ១លាន៧សែននាក់ បានស្លាប់នៅក្នុងរបបខ្មែរក្រហម ដោយការសម្លាប់ ទារុណកម្ម ការបង្អត់អាហារ ជំងឺ និងធ្វើការងារបាក់កម្លាំង។ លោក ខាំ លន់ បានបាត់បង់សមាជិក៥នាក់នៃគ្រួសាររបស់លោក ហើយខ្លួនលោកផ្ទាល់ក៏ត្រូវបានខ្មែរក្រហមបង្ខំឲ្យធ្វើពលកម្មធ្ងន់ធ្ងរដែរ។ លោកបានបន្ថែមថា “ការតាមដានដំណើរការសវនាការ អ.វ.ត.ក និងស្តាប់ការសួរដេញដោលនៅក្នុងសំណុំរឿង ០០១ និង ០០២ ធ្វើឲ្យលោកយល់បានច្រើនជាងមុន អំពីអ្វីដែលបានកើតឡើងនៅក្នុងអំឡុងរបបខ្មែរក្រហម។
លោក ខាំ លន់ និងប្រជាពលរដ្ឋនៅខេត្តសៀមរាប មកធ្វើទស្សនកិច្ចនៅសាលាក្តីខ្មែរក្រហមក្នុងគោលបំណងច្រើន។ លោក ខាំ លន់ មានប្រសាសន៍ថា “ទីមួយ យើងខ្ញុំចង់ឲ្យតុលាការដឹងថា ប្រជាជនច្រើនណាស់ដែលគាំទ្រដំណើរការរបស់តុលាការ និងចង់ចូលរួមនៅក្នុងដំណើរការរបស់តុលាការ។ ទីពីរ យើងខ្ញុំចង់ឃើញដោយផ្ទាល់ភ្នែកនូវដំណើរការជំនុំជម្រះក្តីអតីតមេដឹកនាំខ្មែរក្រហម ដើម្បីឲ្យដឹងថាតើតុលាការពិតជាបានដំណើរការដោយយុត្តិធម៌ពិតមែនឬទេ។ ដូច្នេះហើយបានជាយើងខ្ញុំចង់តាមដានដំណើរការនេះ ព្រោះចង់ដឹងថាតើតុលាការកូនកាត់នេះមានសមត្ថភាពជំនុំជម្រះដូចដែលខ្ញុំនិងប្រជាជនកម្ពុជាដទៃទៀតចង់បានដែរឬទេ”។
លោក ខាំ លន់ បន្ថែមថា រហូតមកដល់ពេលនេះ សាលាក្តីខ្មែរក្រហមទទួលបានជំនឿទុកចិត្តទាំងស្រុងរបស់ប្រជាជន ហើយលោកបានសម្តែងការពេញចិត្តពេញថ្លើមដែលតុលាការបានផ្តល់មធ្យោបាយនានា ដើម្បីអនុញ្ញាតឲ្យប្រជាជននៅទូទាំងប្រទេសមានឧិកាសមកតាមដានដំណើរការតុលាការដោយផ្ទាល់។
ជាមួយនឹងមោទនភាពរបស់ខ្លួនដែលមានក្នុងការបំពេញការងារសម្រាប់ជាផលប្រយោជន៍សាធារណជន និងសម្រាប់ប្រទេសជាតិ លោកខាំ លន់ បានថ្លែងថា លោកនឹងបន្តការងារផ្សព្វផ្សាយអំពីសាលាក្តីខ្មែរក្រហមដល់ប្រជាពលរដ្ឋ និងបន្តនាំប្រជាពលរដ្ឋឲ្យបានកាន់តែច្រើនថែមទៀតមកកាន់សាលាក្តីខ្មែរក្រហម រហូតដល់តុលាការនេះបញ្ចប់បេសកកម្មរបស់ខ្លួន។
“ការខិតខំប្រឹងប្រែងរបស់ខ្ញុំនឹងបន្តរហូតដល់សាលាក្តីបញ្ចប់។ គឺខ្ញុំចង់បានយុត្តិធម៌សម្រាប់ប្រជាពលរដ្ឋដែលបានបាត់បង់ជីវិតទៅ និងអ្នកដែលនៅរស់រានមានជីវិត”។
តាំងពីឆ្នាំ២០០៩ រហូតដល់បច្ចុប្បន្ន មានសាធារណជនជាង ១២ម៉ឺននាក់ ហើយដែលបានមកធ្វើទស្សនកិច្ចនៅ អ.វ.ត.ក ឬបានតាមដានដំណើរការនីតិវិធីរបស់តុលាការ ក្នុងនេះបូករួមទាំងប្រជាជនកម្ពុជាដែលមកពីទូទាំងប្រទេស និងភ្ញៀវអន្តរជាតិដែលមកពីគ្រប់ទិសទីទូទាំងពិភពលោក៕