លោកស្រី Falguni DEBNATH មកពីប្រទេសកាណាដា ត្រូវបានជ្រើសរើសជាសហមេធាវីនាំមុខអន្តរជាតិថ្មី តំណាងដើមបណ្តឹងរដ្ឋប្បវេណី នៅអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ចាប់ពីថ្ងៃទី២៩ ខែសីហា ឆ្នាំ២០២២ តទៅ។ លោកស្រី DEBNATH ចូលមកជំនួសលោកស្រី Megan HIRST ដែលបានលាឈប់ ពីមុខតំណែងចាប់ពីថ្ងៃទី៣០ ខែមិថុនា ឆ្នាំ២០២២។
លោកស្រី Debnath មានបទពិសោធន៍ជាង ២០ ឆ្នាំលើកិច្ចការវិវាទកម្ម ធ្លាប់ជាតំណាងអគ្គរដ្ឋអាជ្ញា (Attorney-General) ប្រទេសកាណាដាក្នុងកិច្ចការវិវាទកម្ម ដែលពាក់ព័ន្ធនឹងការវាយប្រហារផ្លូវភេទ និងសំណុំរឿងកំហុសរដ្ឋប្បវេណីទ្រង់ទ្រាយធំ ដែលមានជនរងគ្រោះរាប់ពាន់នាក់។ ពីមុនមក គាត់ធ្លាប់បានបំពេញការងារជាមន្រ្តីច្បាប់ប្រតិបត្តិ (Executive Legal Officer) នៅសាលាឧទ្ធរណ៍ធំជាងគេនៅកាណាដា ដោយផ្តល់សេវាកម្មផ្នែកច្បាប់ និងភាពជាអ្នកដឹកនាំប្រតិបត្តិ ព្រមទាំងជាជំនួយការជាន់ខ្ពស់របស់ព្រះរាជអាជ្ញានៅ អ.វ.ត.ក។ នាពេលថ្មីៗនេះ លោកស្រី Debnath កាន់មុខតំណែងជាអនុប្រធានស្តីទី (Associate Deputy Minister) និងជានាយកប្រតិបត្តិនៃគណៈកម្មការស៊ើបអង្កេតនៅខេត្ត Ontario ដែលស៊ើបអង្កេតទៅលើគម្រោងសាងសង់ហេដ្ឋារចនាសម្ព័ន្ធដែលមានទឹកប្រាក់រាប់ពាន់លានដុល្លារ។
លោកស្រី Debnath នឹងបំពេញការងាររួមជាមួយសហមេធាវីនាំមុខជាតិតំណាងដើមបណ្តឹងរដ្ឋប្បវេណី លោក ពេជ្ញ អង្គ នៅក្នុងកិច្ចដំណើរការនីតិវិធីក្នុងសំណុំរឿង ០០២/០២។ សហមេធាវីនាំមុខទាំងពីររូបធានានូវការរៀបចំតំណាងដើមបណ្តឹងរដ្ឋប្បវេណីយ៉ាងមានប្រសិទ្ធភាព ដែលពួកគេជាជនរងគ្រោះនៃឧក្រិដ្ឋកម្មស្ថិតក្រោមយុត្តាធិការរបស់ អ.វ.ត.ក ដែលអាចចូលរួមក្នុងកិច្ចដំណើរការនីតិវិធី និងបន្តការស្នើសុំសំណងផ្លូវចិត្ត និងសំណងសមូហភាព។ ការទទួលខុសត្រូវចម្បងៗរបស់សហមេធាវីនាំមុខតំណាងដើមបណ្តឹងរដ្ឋប្បវេណី រួមមាន ធ្វើជាតំណាងផលប្រយោជន៍របស់ក្រុមដើមបណ្តឹងរដ្ឋប្បវេណីរួមគ្នា ការតស៊ូមតិជាទូទៅ យុទ្ធសាស្រ្ត និងការធ្វើជាតំណាងឲ្យផលប្រយោជន៍របស់ដើមបណ្តឹងរដ្ឋប្បវេណីក្នុងពេលសវនាការ ដោយមានទំនាក់ទំនងយ៉ាងជិតស្និទ្ធជាមួយមេធាវីតំណាងដើមបណ្តឹងរដ្ឋប្បវេណីនីមួយៗ។