នៅថ្ងៃទី០៧ ខែមេសា ឆ្នាំ២០២១ អង្គបុរេជំនុំជម្រះនៃអង្គជំនុំជម្រះវិសាមញ្ញក្នុងតុលាការកម្ពុជា នឹងចេញសាលដីការបស់ខ្លួនលើបណ្តឹងឧទ្ធរណ៍ប្រឆាំងនឹងដីកាដំណោះស្រាយរបស់សហចៅក្រមស៊ើបអង្កេតក្នុងសំណុំរឿង ០០៣។
កាលពីថ្ងៃទី២៨ ខែវិច្ឆិកា ឆ្នាំ២០១៨ សហចៅក្រមស៊ើបអង្កេតអន្តរជាតិ បានចេញដីកាដំណោះស្រាយរបស់ខ្លួន (ដីកាបញ្ជូនរឿងទៅជំនុំជម្រះ) ដោយបានបញ្ជូន មាស មុត ទៅជំនុំជម្រះ ដោយឡែកក្នុងថ្ងៃដដែលនោះដែរ សហ ចៅក្រមស៊ើបអង្កេតជាតិ បានចេញដីកាសម្រេចលើកលែងចោទប្រកាន់ប្រឆាំងនឹង មាស មុត (ដីកាសម្រេចលើកលែងការចោទប្រកាន់) ។
អង្គបុរេជំនុំជម្រះបានទទួលបណ្តឹងឧទ្ធរណ៍ ដែលសហព្រះរាជអាជ្ញាជាតិ និងសហមេធាវីជនត្រូវចោទ បានប្តឹងកាលថ្ងៃទី០៥ ខែមេសា ឆ្នាំ២០១៩ និងថ្ងៃទី០៨ ខែមេសា ឆ្នាំ២០១៩ ដាច់ដោយឡែកពីគ្នា ប្រឆាំងនឹងដីកាបញ្ជូនរឿងទៅជំនុំជម្រះរបស់សហចៅក្រមស៊ើបអង្កេតអន្តរជាតិ និងបណ្តឹងឧទ្ធរណ៍ ដែលសហព្រះរាជអាជ្ញាអន្តរជាតិបានប្តឹងកាលពីថ្ងៃទី០៨ ខែមេសា ឆ្នាំ២០១៩ ប្រឆាំងនឹងដីកាសម្រេចលើកលែងការចោទប្រកាន់របស់សហចៅក្រមស៊ើបអង្កេតជាតិ។
កាលពីថ្ងៃទី២៧, ២៨ និង ២៩ ខែវិច្ឆិកា ឆ្នាំ២០១៩ អង្គបុរេជំនុំជម្រះបានបើកសវនាការលើសំណុំរឿង ០០៣ ដើម្បីស្តាប់អំណះអំណាងរបស់ភាគីនានា។
សាលដីការបស់អង្គបុរេជំនុំជម្រះ នឹងផ្សព្វផ្សាយនៅលើគេហទំព័រ៖ www.eccc.gov.kh