រដ្ឋាភិបាលអូស្ត្រាលីបានប្រកាសសន្យាផ្តល់ជំនួយថវិកាបន្ថែមចំនួន ១,៦១ លានដុល្លារអូស្ត្រាលី (ប្រមាណ ១,៧៣ លានដុល្លារអាមេរិក) ដល់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។ ថវិកាចំនួន ១ លានដុល្លារអូស្ត្រាលី នឹងត្រូវផ្តល់ជូនទៅភាគីអន្តរជាតិ ហើយ ០,៦១ លានដុល្លារអូស្ត្រាលី នឹងត្រូវផ្តល់ជូនទៅភាគីជាតិនៃ អ.វ.ត.ក។
ការសន្យាផ្តល់ជំនួយបន្ថែមនេះត្រូវបានប្រកាសដោយរដ្ឋមន្ត្រីក្រសួងការបរទេសអូស្ត្រាលី និងជាសមាជិកព្រឹទ្ធសភា ឯកឧត្តម បប់ ខារ នៅក្នុងដំណើរទស្សនកិច្ចរបស់ឯកឧត្តមនៅ អ.វ.ត.ក នៅថ្ងៃទី២៦ ខែមីនា ឆ្នាំ២០១២។
ឆ្លើយតបនឹងជំនួយសប្បុរសនេះ ឯកឧត្តម ក្រាញ់ តូនី ប្រធានការិយាល័យរដ្ឋបាលស្តីទី និងលោក ឃ្នុត រ៉ូសិនហក អនុប្រធានការិយាល័យរដ្ឋបាលនៃ អ.វ.ត.ក បានថ្លែងថា៖ “អ.វ.ត.ក សូមសម្តែងអំណរគុណដល់រដ្ឋាភិបាលអូស្ត្រាលី ដែលមានទឹកចិត្តសប្បុរសបន្តការគាំទ្រចំពោះ អ.វ.ត.ក ក្នុងការស៊ើបអង្កេតនិងជំនុំជម្រះសេចក្តីលើឧក្រិដ្ឋកម្មក្នុងរបបខ្មែរក្រហម។ ជំនួយរបស់អូស្ត្រាលីនៅពេលនេះគឺជាអំណោយដ៏ថ្លៃថ្លា ដែលចូលរួមចំណែកឲ្យ អ.វ.ត.ក អាចបន្តការងារដើម្បីបំពេញអាណត្តិរបស់ខ្លួនក្នុងការនាំយកយុត្តិធម៌ជូនប្រជាជនកម្ពុជា។”
អូស្ត្រាលីគឺជាប្រទេសម្ចាស់ជំនួយធំមួយក្នុងចំណោមប្រទេសម្ចាស់ជំនួយធំៗនានា ដែលបានផ្តល់ការគាំទ្រយ៉ាងពេញទំហឹងដល់ដំណើរការរបស់ អ.វ.ត.ក តាំងពីចាប់ផ្តើមបង្កើតដំបូង។
