ដោយមានសំណើពីជនជាប់ចោទ ខៀវ សំផន សុំឲ្យដោះលែងគាត់នៅក្រៅឃុំ អង្គជំនុំជម្រះសាលាដំបូងកោះអញ្ជើញភាគីដែលពាក់ព័ន្ធ រួមមាន មេធាវីការពារក្តី សហព្រះរាជអាជ្ញា និងដើមបណ្តឹងរដ្ឋប្បវេណី ចូលរួមក្នុងសវនាការពិភាក្សាអំពីបញ្ហានេះនៅថ្ងៃព្រហស្បតិ៍ ទី១១ ខែមេសា ឆ្នាំ២០១៣.
ការឃុំខ្លួនបណ្តោះអាសន្ននៅអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ត្រូវបានចែងនៅក្នុង វិធានផ្ទៃក្នុងនៃ អ.វ.ត.ក។ ដើម្បីឃុំខ្លួនជនណាម្នាក់ជាបណ្តោះអាសន្ន លក្ខខណ្ឌចាំបាច់ទី១គឺ “មានមូលហេតុដែលត្រូវបានរកឃើញនិងជឿជាក់យ៉ាងច្បាស់”ថា ជននោះធ្លាប់បានប្រព្រឹត្តបទល្មើសមួយឬច្រើន ដូចមានចែងក្នុងដីកាសន្និដ្ឋានបញ្ជូនរឿងឲ្យស៊ើបសួរ ឬដីកាសន្និដ្ឋានបញ្ជូនរឿងឲ្យស៊ើបសួរបន្ថែម (វិធានទី៦៣(៣)ក)។ ពីដំបូងឡើយ អង្គជំនុំជម្រះសាលាដំបូងបានរកឃើញថា លក្ខខណ្ឌនេះនឹងឆ្លើយតបនៅក្នុងអំឡុងសវនាការ នៅពេលដែលជនជាប់ចោទត្រូវចោទប្រកាន់និងបញ្ជូនទៅជំនុំជម្រះ។ ក្នុងអំឡុងពេលមុនសវនាការ អង្គបុរេជំនុំជម្រះយល់ថា អាចរកបាន “មូលហេតុដែលត្រូវបានរកឃើញនិងជឿជាក់” ប្រសិនបើមានព័ត៌មានគ្រប់គ្រាន់នៅក្នុងសំណុំឯកសារនៃសំណុំរឿង ដែលបង្ហាញថា ជនជាប់ចោទប្រហែលជាអាចមានការទទួលខុសត្រូវ ឬធ្លាប់បានប្រព្រឹត្ត បទឧក្រិដ្ឋដែលគាត់ត្រូវចោទប្រកាន់។ ក្នុងករណីនេះ វាមានសារសំខាន់ណាស់ក្នុងការពិនិត្យមើលទាំងភ័ស្តុតាងដាក់បន្ទុក និងភ័ស្តុតាងដោះបន្ទុកនៅក្នុងសំណុំឯកសារ។
បន្ទាប់ពីរកបាន “មូលហេតុដែលត្រូវបានរកឃើញនិងជឿជាក់” ហើយ លក្ខខណ្ឌបន្ថែមមួយចំនួនទៀតត្រូវតែអនុវត្តក្នុងការឃុំខ្លួនជនជាប់ចោទជាបណ្តោះអាសន្ន៖
- រារាំងកុំឲ្យជនដែលត្រូវចោទនោះគាបសង្កត់ទៅលើសាក្សី ឬជនរងគ្រោះ ឬរារាំងកុំឲ្យមានការត្រូវរូវគ្នារវាងជនត្រូវចោទនិងអ្នកសមគំនិត ចំពោះបទឧក្រិដ្ឋដែលស្ថិតនៅក្រោមយុត្តាធិការរបស់អង្គជំនុំជម្រះវិសាមញ្ញ
- ថែរក្សាភ័ស្តុតាង ឬការពារមិនឲ្យបំផ្លាញភ័ស្តុតាង
- ធានាអំពីវត្តមានរបស់ជនត្រូវចោទនៅក្នុងដំណើរការនីតិវិធី
- ការពារសន្តិសុខដល់ជនដែលត្រូវចោទ
- រក្សាសណ្តាប់ធ្នាប់សាធារណៈ។
ឲ្យតែមានលក្ខខណ្ឌណាមួយក្នុងចំណោមលក្ខខណ្ឌទាំង៥ខាងលើ នោះគឺគ្រប់គ្រាន់ក្នុងការឃុំខ្លួនបុគ្គលម្នាក់។ បច្ចុប្បន្ន ខៀវ សំផន កំពុងជាប់ក្នុងមន្ទីរឃុំឃាំងបណ្តោះអាសន្ន ដោយសារការណ៍នេះត្រូវបានចាត់ទុកជាតម្រូវការចាំបាច់ក្នុងការធានាវត្តមានរបស់គាត់ក្នុងដំណើរការនីតិវិធី។ នៅក្នុងសេចក្តីសម្រេចចិត្តរបស់ខ្លួន ឆ្លើយតបទៅនឹងបណ្តឹងសាទុក្ខប្រឆាំងនឹងការឃុំខ្លួនពីលើកមុនរបស់ ខៀវ សំផន អង្គជំនុំជម្រះតុលារកំពូលបានអះអាងថា៖
“សំអាងហេតុនេះមិនជាប់ពាក់ព័ន្ធនឹងហានិភ័យដែលជនជាប់ចោទរត់គេចខ្លួនក្នុងករណីផ្តន្ទាទោសធ្ងន់ធ្ងរ ប៉ុន្តែជាប់ពាក់ព័ន្ធនឹងហានិភ័យដែលជនជាប់ចោទនឹងមិនអាចមានវត្តមាននៅក្នុងដំណាក់កាលជំនុំជម្រះ។ អង្គហេតុដែលមាននៅក្នុងសំណុំរឿងបង្ហាញថា ការជំនុំជម្រះក្នុងសំណុំរឿងលេខ០០២ គឺជាកិច្ចការដែលត្រូវត្រៀមរៀបចំយ៉ាងធំធេង និងភ័ស្តុភារយ៉ាងច្រើនដែលទាក់ទងនឹងជនជាប់ចោទទាំងបួនរូប ដែលអ្នកទាំងនោះភាគច្រើនមានបញ្ហាសុខភាព និងដើមបណ្តឹងរដ្ឋប្បវេណីយ៉ាងច្រើនសន្ធឹកសន្ធាប់ និងក្រុមមេធាវីជាច្រើននាក់។ សូម្បីតែករណីមួយគត់ដែលជនជាប់ចោទខកខានមិនបានបង្ហាញខ្លួននៅចំពោះមុខតុលាការ អាចនឹងធ្វើឲ្យមហន្តរាយដល់លទ្ធភាពនៃការចេញសាលក្រមក្នុងរយៈពេលវេលាសមស្រប។ គោលបំណងនៃកិច្ចដំណើរការនីតិវិធីឲ្យបានឆាប់រហ័ស អាចនឹងត្រូវបានធ្វើឲ្យរាំងស្ទះដោយងាយស្រួល ប្រសិនបើជនជាប់ចោទលាក់ខ្លួន សម្រេចចិត្តមិនគោរពតាមដីកាកោះ ឬក៏អាចនឹងត្រូវបានរារាំងជាបណ្តោះអាសន្នមិនឲ្យចូលរួមក្នុងសវនាការ។”
ខៀវ សំផន ត្រូវបានឃុំខ្លួនជាបណ្តោះអាសន្នតាំងពីថ្ងៃទី១៩ ខែវិច្ឆិកា ឆ្នាំ២០០៧។ ខាងក្រោមនេះគឺប្រវត្តិនៃដំណើរការនីតិវិធីពាក់ព័ន្ធនឹងការឃុំខ្លួនគាត់៖
១៩ វិច្ឆិកា ២០០៧៖ សហចៅក្រមស៊ើបអង្កេតចេញដីកាឃុំខ្លួន ខៀវ សំផន ជាបណ្តោះអាសន្ន សម្រាប់រយៈពេល១ឆ្នាំ។ ក្រោយមក សហចៅក្រមស៊ើបអង្កេតបដិសេធបណ្តឹងសាទុក្ខរបស់ ខៀវ សំផន ប្រឆាំងនឹងការឃុំខ្លួនគាត់។
១៨ វិច្ឆិកា ២០០៨៖ សហចៅក្រមស៊ើបអង្កេតចេញដីកាពន្យារពេលឃុំខ្លួន ខៀវ សំផន រយៈពេល១ឆ្នាំទៀត។ ក្រោយមក អង្គបុរេជំនុំជម្រះរកឃើញថា សំណើសុំនៅក្រៅឃុំរបស់ ខៀវ សំផន មិនអាចទទួលយកបាន និងបានបដិសេធបណ្តឹងសាទុក្ខរបស់ ខៀវ សំផន ប្រឆាំងនឹងការពន្យារពេលឃុំខ្លួនគាត់។
១៨ វិច្ឆិកា ២០០៩៖ សហចៅក្រមស៊ើបអង្កេតចេញដីកាពន្យារពេលឃុំខ្លួន ខៀវ សំផន រយៈពេល១ឆ្នាំទៀត។ ក្រោយមក អង្គបុរេជំនុំជម្រះបដិសេធបណ្តឹងសាទុក្ខរបស់ ខៀវ សំផន ប្រឆាំងនឹងការពន្យារពេលឃុំខ្លួនគាត់។
១៥ កញ្ញា ២០១០៖ ខៀវ សំផន ត្រូវចោទប្រកាន់ ហើយសហចៅក្រមស៊ើបអង្កេតចេញដីកាសម្រេចថា គាត់គួរតែត្រូវបន្តឃុំខ្លួននៅក្នុងមន្ទីរឃុំឃាំងបណ្តោះអាសន្នរហូតដល់ពេលបង្ហាញខ្លួននៅ ចំពោះមុខអង្គជំនុំជម្រះសាលាដំបូង។
១៦ កុម្ភៈ ២០១១៖ អង្គជំនុំជម្រះសាលាដំបូងបដិសេធសំណើសុំនៅក្រៅឃុំរបស់ ខៀវ សំផន។
៦ មិថុនា ២០១១៖ អង្គជំនុំជម្រះតុលាការកំពូលធ្វើវិសោធនកម្មលើមូលហេតុមួយចំនួន នៅក្នុងសេចក្តីសម្រេចចិត្តរបស់អង្គជំនុំជម្រះសាលាដំបូងថ្ងៃទី១៦ ខែកុម្ភៈ ឆ្នាំ២០១១ និងបដិសេធបណ្តឹងសាទុក្ខដែលនៅសេសសល់របស់ ខៀវ សំផន។