មន្ត្រីមកពីទីភ្នាក់ងារអភិវឌ្ឃន៍អន្តរជាតិស៊ុយអែដ (SIDA) បានចំណាយពេលពេញមួយព្រឹកនៅ អ.វ.ត.ក នៅថ្ងៃអង្គារ៍ ទី៩ ខែតុលា ឆ្នាំ២០១២ ដើម្បីស្វែងយល់អំពីការងាររបស់ អ.វ.ត.ក។ គណៈប្រតិភូមានសមាជិក១៧រូប និងដឹកនាំដោយលោកស្រី Charlotte Petri-Gornitzka អគ្គនាយកអង្គការ SIDA បានចូលស្តាប់សវនាការនៅពេលព្រឹក ដើម្បីស្តាប់សក្ខីកម្មរបស់អតីតមេបញ្ជាការកងទ័ពខ្មែរក្រហម បន្ទាប់មកស្តាប់បទឧទ្ទេសនាមរបស់មន្ត្រីតុលាការ។
បន្ទាប់មក គណៈប្រតិភូក៏បានជួបជាមួយឯកឧត្តម ក្រាញ់ តូនី ប្រធានការិយាល័យរដ្ឋបាលស្តីទី និងមន្ត្រីរដ្ឋបាលជាន់ខ្ពស់ដទៃទៀត និងបានជួបជាមួយលោកចៅក្រម រ៉ូវ៉ាន់ ដោននីង នៃអង្គបុរេជំនុំជម្រះ ដើម្បីពិភាក្សាអំពីជោគជ័យនានាដែលតុលាការសម្រេចបាន និងអំពីឧបសគ្គចំពោះមុខដែលតុលាការកំពុងតែប្រឈម។ លោកស្រី Petri-Gornitzka បានមានប្រសាសន៍នៅពេលបញ្ចប់ដំណើរទស្សនកិច្ចថា "ដំណើរទស្សនកិច្ចនេះមានសារសំខាន់សម្រាប់យើងខ្ញុំ ក្នុងការស្វែងយល់អំពី អ.វ.ត.ក"។