អង្គភាពគាំពារជនរងគ្រោះនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នឹងរៀបចំវេទិកាថ្នាក់តំបន់លើកទី៤ ក្នុងឆ្នាំ២០១២ នៅខេត្តព្រះសីហនុ សម្រាប់ដើមបណ្តឹងរដ្ឋប្បវេណីចំនួន ២០០ នាក់ ក្នុងសំណុំរឿង០០២។ វេទិកាថ្នាក់តំបន់នេះនឹងធ្វើនៅសណ្ឋារគារឆ្នេរជលសារ នៅថ្ងៃសុក្រ ទី១៦ ខែវិច្ឆិកា ឆ្នាំ២០១២ វេលាម៉ោង ៨:០០ព្រឹក ដល់ម៉ោង ៤:០០ រសៀល។ (អត្តសញ្ញាណរបស់ដើមបណ្តឹងរដ្ឋប្បវេណីនឹងត្រូវរក្សាជាសម្ងាត់) ។
វេទិកាថ្នាក់តំបន់នេះមានគោលបំណង (១) ផ្តល់ព័ត៌មានថ្មីៗអំពីដំណើរវិវឌ្ឍន៍របស់ អ.វ.ត.ក ទាក់ទងនឹងសំណុំរឿង ០០២ ដល់ដើមបណ្តឹងរដ្ឋប្បវេណី (២) ដើម្បីឲ្យដើមបណ្តឹងរដ្ឋប្បវេណីទទួលបានការពន្យល់ពីមេធាវីរបស់ខ្លួននូវដំណើការនៃការបំបែកនីតិវីធីសំណុំរឿង ០០២ ដែលកំពុងជម្រះក្តីជាផ្នែកតូចៗដាច់ពីគ្នានិង (៣) ដើម្បីឲ្យដើមបណ្តឹងរដ្ឋប្បវេណីទាំងនោះប្រើប្រាស់សិទ្ធិរបស់ខ្លួន។
ដើមបណ្តឹងរដ្ឋប្បវេណីទាំង ២០០នាក់ ធ្វើដំណើរមកពីខេត្តព្រះសីហនុ កំពត កោះកុង និងកំពង់ស្ពឺ និងស្ថិតក្នុងចំណោមដើមបណ្តឹងរដ្ឋប្បវេណីទាំង ៣ ៨៦៤ នាក់ ដែលមិនធ្លាប់បានចូលរួមស្តាប់សវនាការនៃសំណុំរឿង០០២ ក្នុងឆ្នាំ២០១២ នេះទេ។ វេទិកាថ្នាក់តំបន់នេះនឹងផ្តល់ឱកាសពិសេសសម្រាប់មេធាវីដើមបណ្តឹងរដ្ឋប្បវេណី និងដើមបណ្តឹងរដ្ឋប្បវេណីទាំង ២០០នាក់ បានជួបគ្នាដើម្បីពិភាក្សាពន្យល់អំពីដំណើរវិវឌ្ឍន៍របស់សំណុំរឿង ០០២ និងស្វែងយល់អំពីដំណាក់កាលដែលដើមបណ្តឹងរដ្ឋប្បវេណី ទទួលរងគ្រោះដោយឧក្រិដ្ឋកម្មផ្សេងៗគ្នា ត្រូវរួមនៅក្នុងដំណើរការជំនុំជម្រះសេចក្តីជាផ្នែកៗដាច់ពីគ្នានេះ។
អង្គភាពគាំពារជនរងគ្រោះមានផែនការរៀបចំវេទិកាថ្នាក់តំបន់ចំនួន ៨ ក្នុងឆ្នាំ២០១២-២០១៣ ក្នុងគម្រោង “ការចូលរួមរបស់ជនរងគ្រោះប្រកបដោយអត្ថន័យក្នុងដំណើការនីតិវិធី អ.វ.ត.ក”។ ចន្លោះឆ្នាំ ២០០៩-២០១១ អង្គភាព គាំពារជនរងគ្រោះបានរៀបចំវេទិកាថ្នាក់តំបន់ចំនួន ១៤ ក្នុងក្របខ័ណ្ឌគម្រោង “ការធ្វើឲ្យប្រសើរឡើងដល់ការចូលរួមរបស់ជនរងគ្រោះក្នុងដំណើការនីតិវិធី អ.វ.ត.ក”។