អង្គភាពគាំពារការការពារក្តីនៃអង្គជំនុំជម្រះវិសាមញ្ញក្នុងតុលាការកម្ពុជា សូមជូនដំណឹងពីមរណភាពរបស់ លោក Jacques Verges សហមេធាវីអន្តរជាតិការពារក្តីជនជាប់ចោទ ខៀវ សំផន កាលពីថ្ងៃទី១៥ ខែសីហា ឆ្នាំ២០១៣ ។ លោក Jacques Verges បានធ្វើមរណភាពនៅប្រទេសបារាំងក្នុងអាយុ ៨៨ ឆ្នាំ ក្រោយពីបានប្រកបវិជ្ជាជីវៈយ៉ាងយូរក្នុងរឿងក្តីព្រហ្មទណ្ឌ ដែលបានការពារកូនក្តីមានឈ្មោះបោះសំឡេងជាច្រើននៅជុំវិញពិភពលោក។ លោក Verges បានការពារក្តីលោក ខៀវ សំផន ចាប់តាំងពីខែវិច្ឆិកា ឆ្នាំ២០០៧ នៅពេលដែលជនជាប់ចោទរូបនេះត្រូវបានឃុំខ្លួនបណ្តោះអាសន្ន នៅ អ.វ.ត.ក ។ ប៉ុន្មានឆ្នាំចុងក្រោយនេះ លោក Verges មិនសូវបង្ហាញវត្តមាននៅ អ.វ.ត.ក ទេ ។ លោក ខៀវ សំផន ត្រូវបានការពារដោយសហមេធាវីអន្តរជាតិ ជនជាតិបារាំងពីររូប គឺអ្នកស្រី Anta Guisse និងលោក Arthur Vercken និងដោយសហមេធាវីកម្ពុជាមួយរូប គឺលោក គង់ សំអុន ដោយមានការជួយជ្រោមជ្រែងពីក្រុមអ្នកច្បាប់ជាតិ និងអន្តរជាតិមួយក្រុម។ អង្គភាពគាំពារការការពារក្តីសូមឆ្លៀតឱកាសនេះចូលរួមមរណទុក្ខដល់គ្រួសារលោក Verges និងដឹងគុណចំពោះការរួមចំណែករបស់លោកដល់ដំណើរការតុលាការនៅចំពោះមុខ អ.វ.ត.ក ។