ថ្ងៃនេះ តំណាងក្រុមប្រទេសផ្តល់ជំនួយសំខាន់ៗ (PDG) ដល់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ដែលមានទីស្នាក់ការនៅទីក្រុងញូវយ៉ក បានបញ្ចប់ដំណើរទស្សនកិច្ចដ៏សំខាន់មួយដែលមានរយៈពេលបីថ្ងៃមកកាន់រាជធានីភ្នំពេញ។ PDG ជាក្រុមប្រទេសផ្តល់ជំនួយសំខាន់ៗ ដែលបំពេញកិច្ចការជាមួយអង្គការសហប្រជាជាតិដើម្បីជួយដល់ អ.វ.ត.ក ពង្រឹងការប្តេជ្ញាចិត្តរបស់ខ្លួនចំពោះអ.វ.ត.ក និងការស្វែងរកយុត្តិធម៌សម្រាប់ជនរងគ្រោះដោយអំពើឃោរឃៅនៃរបបខ្មែរក្រហម។
តំណាងក្រុមប្រទេសផ្តល់ជំនួយបានកត់សម្គាល់ឃើញ ជាដំបូងថា មានកិច្ចសហប្រតិបត្តិការដ៏ទូលំទូលាយរវាងរាជរដ្ឋាភិបាលកម្ពុជា និងសហគមន៍អន្តរជាតិចំពោះ អ.វ.ត.ក។ PDG សូមគាំទ្រយ៉ាងពេញទំហឹងដល់អាណត្តិរបស់ អ.វ.ត.ក ដែលចូលរួមចំណែកដ៏សំខាន់ និងអស្ចារ្យដល់ការទទួលខុសត្រូវ និងការផ្សះផ្សាជាតិនៅក្នុងប្រទេសកម្ពុជា។
ការរីកចម្រើនសំខាន់ៗកំពុងតែសម្រេចបាន។ សាលក្រមសំណុំរឿង ០០២/០១ ប្រឆាំងនឹងមេដឹកនាំជាន់ខ្ពស់នៃរបបខ្មែរក្រហមដែលនៅរស់រានមានជីវិត នឹងត្រូវប្រកាសនៅថ្ងៃទី ០៧ ខែ សីហា ខាងមុខនេះ នឹងស្តែងឲ្យឃើញនូវកិច្ចការដ៏សំខាន់នៅ អ.វ.ត.ក។ ដំណាក់កាលបន្ទាប់នៃសំណុំរឿងដដែលនេះ នឹងគ្របដណ្តប់ទៅលើបទចោទសំខាន់ៗបំផុតដែល អ.វ.ត.ក មិនទាន់បានយកមកជំនុំជម្រះនៅឡើយ រួមមាន អំពើប្រល័យពូជសាសន៍ និងឧក្រិដ្ឋកម្មធ្ងន់ធ្ងរផ្សេងៗទៀត ដែលបានប្រព្រឹត្តនៅទូទាំងប្រទេស។ អង្គជំនុំជម្រះសាលាដំបូងបានកំណត់កាលបរិច្ឆេទសម្រាប់សវនាការបឋមនៅថ្ងៃទី ៣០ ខែ
កក្កដា ឆ្នាំ ២០១៤ ហើយសវនាការសួរដេញដោលទៅលើភស្តុតាងត្រូវរំពឹងថានឹងអាចចាប់ផ្តើមនៅក្នុង
រយៈពេលប៉ុន្មានខែខាងមុខនេះ។ ចំពោះសំណុំរឿង ០០៣ និង ០០៤ កិច្ចស៊ើបសួរពាក់ព័ន្ធនឹងទីតាំងឧក្រិដ្ឋកម្មសំខាន់ៗយ៉ាងច្រើនកំពុងតែបន្តធ្វើ។ ភារកិច្ចទាំងអស់នេះត្រូវបានសម្រេចឡើង ដោយសារបុគ្គលិកប្រកបដោយវិជ្ជាជីវៈ និងប្រកបដោយការប្តេជ្ញាចិត្តរបស់ អ.វ.ត.ក។
អ.វ.ត.ក សម្រេចបានកិច្ចការដ៏លេចធ្លោជាច្រើន។ ជនរងគ្រោះជាង ៤.០០០ នាក់ បានចូលរួមយ៉ាងសកម្មនៅក្នុងកិច្ចដំណើរការនីតិវិធី តាមរយៈការធ្វើជាតំណាងឲ្យដើមបណ្តឹងរដ្ឋប្បវេណីទាំងអស់។ តាមរយៈកម្មវិធីផ្សព្វផ្សាយរបស់ខ្លួន ប្រជាជនកម្ពុជាជាង ២៤០ ០០០ នាក់ បានមកធ្វើទស្សនកិច្ចនៅ
អ.វ.ត.ក ហើយប្រជាជនរាប់លាននាក់ផ្សេងទៀតបានតាមដានកិច្ចដំណើរការនីតិវិធី តាមរយៈទូរទស្សន៍ និងប្រព័ន្ធវិទ្យុផ្សាយសំឡេង។ កិច្ចសហប្រតិបត្តិការរវាងបុគ្គលិកជាតិ និងបុគ្គលិកអន្តរជាតិត្រូវបានធ្វើ
ឡើងដើម្បីធានាថា អ.វ.ត.ក នឹងមានកេរដំណែលជាអមតៈ លើកកម្ពស់ដល់សមត្ថភាពរបស់តុលាការជាតិ និងលើកស្ទួយដល់ការអនុវត្តជាក់ស្តែងល្អៗ នៅក្នុងវិស័យយុត្តិធម៌ព្រហ្មទណ្ឌ។ លក្ខណៈពិសេសទាំងអស់នេះមានសារៈសំខាន់បំផុតសម្រាប់ប្រទេសមួយដែលកំពុងតែដោះស្រាយបញ្ហាអតីតកាលរបស់
ខ្លួន។
PDG ទទួលស្គាល់ដំណើរការគាំទ្របន្តដល់ អ.វ.ត.ក ពីសំណាក់រាជរដ្ឋាភិបាលកម្ពុជា។ យើងខ្ញុំសូមស្វាគមន៍ចំពោះវិភាគទានរបស់រាជរដ្ឋាភិបាល ដែលបានផ្តល់ទឹកប្រាក់ចំនួន ១,១ លានដុល្លារ កាលពីខែ មករា សម្រាប់បើកប្រាក់បៀវត្សរ៍ដល់បុគ្គលិកជាតិ និងការប្តេជ្ញារបស់រាជរដ្ឋាភិបាលក្នុងការខិតខំប្រឹងប្រែងកៀងគរថវិកាជាបន្តទៅទៀត។ PDG សូមអំពាវនាវដល់បណ្តាប្រទេសទាំងអស់ មេត្តាជួយផ្តល់ថវិកាជាបន្តទៅទៀតដើម្បីជួយដល់ប្រទេសកម្ពុជា និងអង្គការសហប្រជាជាតិ ដែលជាដៃគូនៅក្នុងការខិតខំប្រឹងប្រែងជាប្រវត្តិសាស្រ្តនេះ។
PDG នឹងចាកចេញពីប្រទេសកម្ពុជា ដោយពាំនាំទៅជាមួយនូវស្មារតីយល់ឃើញយ៉ាងច្បាស់ថា
អ.វ.ត.ក កំពុងបន្តធ្វើឲ្យមានការរីកចម្រើនលេចធ្លោ ក្នុងការនាំខ្លួនអ្នកទទួលខុសត្រូវខ្ពស់បំផុតមកកាត់
សេចក្តីចំពោះឧក្រិដកម្មដែលបានប្រព្រឹត្តឡើងដោយខ្មែរក្រហម។ PDG នឹងបន្តគាំទ្រដល់អាណត្តិការងារដ៏សំខាន់នេះ។
កំណត់សម្គាល់សម្រាប់ប្រព័ន្ធផ្សព្វផ្សាយ៖
• ក្រុមប្រទេសផ្តល់ជំនួយសំខាន់ៗ (PDG) បានបំពេញទស្សនកិច្ចនៅ អ.វ.ត.ក ចាប់ទីថ្ងៃទី ២៥ ដល់ថ្ងៃទី ២៧ ខែ មិថុនា។ នៅក្នុងដំណើរទស្សនកិច្ចរបស់ PDG ក៏មានការចូលរួមផងដែរពីជំនាញការ
ពិសេសរបស់អគ្គលេខាធិការអង្គការសហប្រជាជាតិ ផ្នែកជំនួយរបស់អង្គការសហប្រជាជាតិដល់ការ
ជំនុំជម្រះក្តីខ្មែរក្រហម គឺឯកអគ្គរដ្ឋទូត David Scheffer និងសមាជិកមួយរូបនៃការិយាល័យផ្នែកច្បាប់របស់អង្គការសហប្រជាជាតិ។
• សមាជិក PDG រួមមាន ប្រទេសអូស្រ្តាលី បារាំង អាល្លឺម៉ង ជប៉ុន ស៊ុយអែត រួមជាមួយសហភាពអឺរុបជាអ្នកសង្កេតការណ៍។ PDG គឺជាយន្តការត្រួតពិនិត្យ សម្រាប់ប្រទេសផ្តល់ជំនួយដល់ អ.វ.ត.ក ដែលមានទីស្នាក់ការនៅទីក្រុងញូវយ៉ក ដែលរួមមានបណ្តារដ្ឋនានាដែលបានរួមចំណែកផ្នែកថវិកាដ៏សំខាន់ និងបានបញ្ជាក់នូវការប្តេជ្ញាចិត្តផ្នែកនយោបាយយ៉ាងច្បាស់លាស់ ដើម្បីគាំទ្រអង្គការសហ
ប្រជាជាតិ នៅក្នុងតួនាទីរបស់ខ្លួនក្នុងការផ្តល់នូវជំនួយផ្នែកបច្ចេកទេសដល់តុលាការ។
• PDG ត្រូវបានបង្កើតឡើងជាយន្តការត្រួតពិនិត្យសម្រាប់ប្រទេសផ្តល់ជំនួយដល់ អ.វ.ត.ក ដើម្បីតាម
ដានជាប្រចាំលើដំណើរការវិវឌ្ឍន៍របស់តុលាការ និងផ្តល់នូវការណែនាំលើកិច្ចការនានាក្រៅពីកិច្ចការតុលាការ។ PDG ត្រួតពិនិត្យលើការអនុវត្តផែនការការងាររបស់តុលាការ ផ្តល់ការណែនាំជាយុទ្ធសាស្រ្ត ក្នុងករណីចាំបាច់ ពិនិត្យលើតម្រូវការផ្នែកថវិការបស់តុលាការ និងជួយដល់តុលាការនៅក្នុងកិច្ចខិតខំ
ប្រឹងប្រែងគាំទ្រ និងរៃអង្គាសថវិកា។
• PDG ជួបប្រជុំនៅក្នុងទីក្រុងញូវយ៉ក។ សមាជិក PDG ត្រូវបានតំណាងដោយមន្រ្តីមកពីគណៈ
បេសកកម្មនីមួយៗរបស់ខ្លួនប្រចាំអង្គការសហប្រជាជាតិនៅក្នុងទីក្រុងញូវយ៉ក។
• កម្មវិធីរបស់ PDG រួមមាន ការជួបប្រជុំជាមួយតំណាងរបស់អង្គជំនុំជម្រះតុលាការកំពូល អង្គជំនុំជម្រះសាលាដំបូង អង្គបុរេជំនុំជម្រះ សហចៅក្រមស៊ើបអង្កេត និងសហព្រះរាជអាជ្ញាអន្តរជាតិរបស់ អ.វ.ត.ក។ PDG ក៏បានជួបប្រជុំផងដែរជាមួយសមាជិកនៃការិយាល័យរដ្ឋបាល ផ្នែកគាំពារការការ
ពារក្តី និងផ្នែកសហមេធាវីនាំមុខតំណាងដើមបណ្តឹងរដ្ឋប្បវេណី។ PDG ក៏បានរៀបចំកិច្ចប្រជុំរួមផង
ដែរជាមួយបុគ្គលិក អ.វ.ត.ក និងបានជួបជាមួយបុគ្គលិកសមាជិកសហជីព (Field Staff Union)។
• PDG ក៏បានជួបប្រជុំផងដែរជាមួយលោក កែវ រ៉េមី រដ្ឋលេខាធិការទីស្តីការគណៈរដ្ឋមន្រ្តីនៃរាជរដ្ឋា
ភិបាលកម្ពុជា។
• PDG បានជួបជាមួយតំណាងសហគមន៍ទូតកម្ពុជា (មិត្តរបស់ អ.វ.ត.ក) សង្គមស៊ីវិល និង
ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំប្រទេសកម្ពុជា។