តំណាងម្នាក់របស់សហគមន៍ជនរងគ្រោះនៃរបបខ្មែរក្រហមដែលកំពុងរស់នៅសហរដ្ឋអាមេរិកបាន ធ្វើដំណើរចម្ងាយ ១៤,០០០គីឡូម៉ែត្រ មកស្តាប់ការប្រកាសសាលក្រម ឌុច កាលពីថ្ងៃទី២៦ ខែកក្កដា កន្លងទៅនេះ គឺលោកអ៊ំ ម៉ម យីន។ លោកអ៊ំ យីន ធ្វើដំណើរពីរដ្ឋផេនសុលវេនៀ សហរដ្ឋអាមេរិក មកប្រទេសកម្ពុជាក្នុងនាមខ្លួនលោកអ៊ំផ្ទាល់ និងក្នុងនាមសហគមន៍ខ្មែរនៅសហរដ្ឋអាមេរិក ដើម្បីជាដកស្រង់បទពិសាធន៍ពីក្នុងសវនាការ និងស្វែងយល់បន្ថែមអំពីអង្គជំនុំជម្រះវិសាមញ្ញក្នុង តុលាការកម្ពុជា (អ.វ.ត.ក) និងអំពីលទ្ធភាពនៃការចូលរួមរបស់ជនស៊ីវីលនៅក្នុងដំណើរការរឿងក្តី។
សហគមន៍ជនរងគ្រោះនៃរបបខ្មែរក្រហមដែលកំពុងរស់នៅក្នុងរដ្ឋចំនួន៨ នៅសហរដ្ឋអាមេរិកបានដាក់ពាក្យបណ្តឹងចំនួន១២៩ ក្នុងនោះ៤១នាក់ ជាដើមបណ្តឹងរដ្ឋប្បវេណី នៅក្នុងរឿងក្តីលេខ ០០២។ ការដាក់ពាក្យនេះគឺធ្វើឡើងតាមរយៈអង្គការ អាស្រ៊ីក (វិទ្យាស្ថានប្រតិបត្តិស្រាវជ្រាវសង្គម នៃកម្ពុជា) ដែលជាអង្គការស្ម័គ្រចិត្តបង្កើតឡើងដោយ លោកស្រីបណ្ឌិត នូ លក្ខិណា សាស្រ្តាចារ្យនៅ សាកលវិទ្យាល័យរដ្ឋកាលីហ្វ័រញ៉ា សហការជាមួយ “វិទ្យាស្ថានអាមេរិកាំង-អាស៊ី ប៉ាស៊ីហ្វិក” នៃសាកលវិទ្យាល័យញូវយ៉ក ក្នុងគោល បំណងអប់រំយុវជនជំនាន់ក្រោយរបស់ កម្ពុជា-អាមេរិកាំង អំពីអង្គជំនុំជម្រះវិសាមញ្ញក្នុងតុលាការ កម្ពុជា (អ.វ.ត.ក) ។
អំពីលោកអ៊ំ ម៉ម យីន
លោកអ៊ំ ម៉ម យីន មានអាយុ៧៨ឆ្នាំ បច្ចុប្បន្នរស់នៅរដ្ឋផេនសុលវេនៀ សហរដ្ឋអាមេរិក។ លោកអ៊ំ គឺជាអតីតសាស្រ្តាចារ្យបច្ចេកទេសនៅសាកលវិទ្យាល័យកំពង់ចាម និងក្រោយមកជានាយទាហាន នៃរបបលន់ណុល។
នៅក្នុងរបបខ្មែរក្រហម លោកអ៊ំ យីន មានវាសនាមិនខុសពីប្រជាជនកម្ពុជាទូទាំងប្រទេសទេ។ គាត់និងក្រុមគ្រួសារត្រូវជម្លៀសចេញពីផ្ទះសម្បែងទៅកាន់តំបន់៣ក្នុងខេត្តបាត់ដំបង និងត្រូវបង្ខំឲ្យ ធ្វើការងារជាទម្ងន់។ សមាជិកគ្រួសាររបស់អ៊ំ យីន បានស្លាប់ជាបន្តបន្ទាប់ដោយមូលហេតុខុសៗគ្នា។លោកអ៊ំ យីន ខ្លួនឯង អាចរក្សាជីវិតរបស់គាត់បានដោយសារតែខិតខំធ្វើការយ៉ាងសកម្មរហូតដល់ ខ្មែរក្រហមទុកចិត្ត និងប្រគល់តួនាទីឲ្យគាត់ធ្វើជាប្រធានកង។ នៅទីបំផុត ក្នុងចំណោមសមាជិក គ្រួសារចំនួន១៥នាក់ដែលចាកចេញពីទីក្រុងភ្នំពេញជាមួយគ្នា មានតែលោកអ៊ំ យីន និងកូនប្រុស២នាក់ ប៉ុណ្ណោះដែលនៅរស់រានមានជីវិត។
នៅខែមករា ឆ្នាំ១៩៧៩ របបខ្មែរក្រហមបានដួលរលំ ក៏ប៉ុន្តែក្នុងចិត្តរបស់លោកអ៊ំ យីន គាត់យល់ថា ប្រទេសកម្ពុជាកំពុងតែធ្លាក់ទៅក្នុងកណ្តាប់ដៃរបស់កុម្មុយនីស្តមួយក្រុមទៀត។ ក្នុងកាលៈទេសៈដែល លោកអ៊ំយល់ថាមិនអំណោយផលដល់រូបលោកអ៊ំផ្ទាល់ លោកអ៊ំ យីន បានរត់គេចខ្លួនទៅជំរំជនភៀសខ្លួននៅតាមព្រំដែនថៃ ហើយក្រាយមកបានចូលរួមក្នុង “រណសិរ្សជាតិរំដោះពលរដ្ឋខ្មែរ” របស់លោកតា សឺនសាន។
នៅក្នុងឆ្នាំ១៩៩៣ មួយខែមុនការបោះឆ្នោតសកលលើកទី១ដែលរៀបចំដោយកងកម្លាំងអ៊ុនតាក់នៅ ប្រទេសកម្ពុជា លោកអ៊ំ យីន បានចាកចេញពីប្រទេសកម្ពុជាទៅរស់នៅសហរដ្ឋអាមេរិក។
ការវិលត្រឡប់មកប្រទេសកម្ពុជានាពេលនេះគឺជាគឺជាលើកទី១របស់លោកអ៊ំ យីន ចាប់តាំងពីការ ចាកចេញរបស់គាត់ក្នុងឆ្នាំ១៩៩៣ និងក៏ជាលើកទី១នៃការវិលត្រឡប់ទៅស្រុកកំណើតរបស់គាត់ នៅខេត្តកំពង់ចាម បន្ទាប់ពីការចាកចេញអស់រយៈពេល៤០ឆ្នាំ។ លោកអ៊ំបានឲ្យដឹងថា ដំណើរវិល ត្រឡប់ទៅស្រុកកំណើតរបស់លោកអ៊ំនៅពេលនេះពោរពេញទៅដោយក្តីរំភើបលាយឡំនឹងទុក្ខសោក។ រំភើបដោយសារបានជួបជុំញាតិសន្តានសាជាថ្មីម្តងទៀតបន្ទាប់ពីព្រាត់ប្រាសគ្នាអស់រយៈកាល៤០ឆ្នាំ និងទុក្ខសោកដោយបានទទួលដំណឹងអំពីមរណភាពរបស់សាច់ញាតិមួយចំនួនទៀតក្រោមរបប ខ្មែរក្រហម។
លោកអ៊ំ ម៉ម យីន បានដាក់ពាក្យបណ្តឹងមក អ.វ.ត.ក ក្នុងនាមជាដើមបណ្តឹងរដ្ឋប្បវេណី តាមរយៈ អង្គការ អាស្រ៊ីក ហើយលោកអ៊ំបានទទួលការជូនដំណឹងថា ពាក្យបណ្តឹងរបស់លោកអ៊ំ រួមជាមួយនឹង ពាក្យបណ្តឹងចំនួន១២៩ទៀតរបស់ប្រជាជនកម្ពុជានៅសហរដ្ឋអាមេរិក ត្រូវបានទទួលយកដោយ អ.វ.ត.ក រួចហើយ សម្រាប់សំណុំរឿង ០០២។
នៅពេលត្រឡប់ទៅសហរដ្ឋអាមេរិកវិញ លោកអ៊ំ ម៉ម យីន នឹងចែករំលែកជាមួយសហគមន៍ជន រងគ្រោះនៃរបបខ្មែរក្រហមដែលកំពុងរស់នៅសហរដ្ឋអាមេរិក អំពីបទពិសោធន៍របស់លោកអ៊ំនៅក្នុង បន្ទប់សវនាការរបស់ អ.វ.ត.ក និងអំពីចំណេះដឹងបន្ថែមពាក់ព័ន្ធនឹង អ.វ.ត.ក ដែលលោកអ៊ំទទួលបាន ព្រមទាំងការអភិវឌ្ឍន៍របស់ប្រទេសកម្ពុជាដែលលោកអ៊ំបានមើលឃើញក្នុងអំឡុងដំណើរទស្សនកិច្ច មាតុភូមិនិវត្តន៍របស់លោកអ៊ំ៕