អ្នករស់រានមានជីវិតពីមន្ទីរ ស-២១ បីរូប គឺលោក ប៊ូ ម៉េង លោក ជុំ ម៉ី និងលោក នង ចាន់ផល និងដើមបណ្តឹងរដ្ឋប្បវេណីប្រាំរូប បានទទូលសៀវភៅសាលដីការបស់អង្គជំនុំជម្រះតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ក្នុងសំណុំរឿង ០០១ ប្រឆាំងនឹង កាំង ហ្កេកអ៊ាវ ហៅ ឌុច នៅថ្ងៃទី១៨ ខែឧសភា ឆ្នាំ២០១២ នៅសារមន្ទីរឧក្រិដ្ឋកម្មប្រល័យពូជសាសន៍ទួលស្លែង នៅទីក្រុងភ្នំពេញ។ នេះគឺជាការចាប់ផ្តើមយុទ្ធនាការរបស់ផ្នែកកិច្ចការសាធារណៈនិងអង្គភាពគាំពារជនរងគ្រោះនៃ អ.វ.ត.កក្នុងការចែកផ្សាយសាលដីកាស្ថាពររបស់អង្គជំនុំជម្រះតុលាការកំពូល និងសៀវភៅចងក្រងពាក្យសុំអភ័យទោសរបស់ ឌុច ក្នុងអំឡុងពេលសវនាការ ដល់សាធារណជនទូទាំងប្រទេសកម្ពុជា។
ទទួលសៀវភៅដោយក្តីរំភើប លោក ប៊ូ ម៉េង បានសម្តែងពីអារម្មណ៍របស់លោកប្រាប់អ្នកសារព័ត៌មាននៅក្នុងឧិកាសនោះថា “ខ្ញុំមានសេចក្តីរីករាយណាស់ដែលបានទទួលសៀវភៅសាលក្រមចុងក្រោយនេះ។ សាលក្រមនេះគឺជាអ្វីដែលខ្ញុំបានរង់ចាំអស់រយៈពេល៣៥ឆ្នាំមកហើយ។ នេះជាសក្ខីកម្មបញ្ជាក់ថាតុលាការបានរកយុត្តិធម៌ឲ្យខ្ញុំនិងជនរងគ្រោះទាំងអស់នៃមន្ទីរ ស-២១ ហើយ។ សៀវភៅសាលក្រមនេះគឺជាប្រវត្តិសាស្រ្តសម្រាប់ពិភពលោកទាំងមូល។ វាគឺជាសារទៅដល់អ្នកដឹកនាំដទៃទៀត និងមនុស្សជំនាន់ក្រោយថា កុំសម្លាប់មនុស្ស កុំធ្វើបាបមនុស្ស ដូចខ្មែរក្រហមទៀត”។
ដោយឡែក លោក ជុំ ម៉ី ក៏មានទឹកចិត្តរីករាយដែរដោយបានទទួលសៀវភៅសាលដីកា ប៉ុន្តែបានបង្ហាញភាពអាក់អន់ស្រពន់ចិត្តដែល អ.វ.ត.ក មិនបានផ្តល់សំណងសមូហភាពដល់ជនរងគ្រោះនៃមន្ទីរ ស-២១។ លោកបញ្ជាក់ថា “ខ្ញុំទទួលស្គាល់ហើយថាសាលាក្តីខ្មែរក្រហមធ្វើការងារប្រកបដោយយុត្តិធម៌ ក៏ប៉ុន្តែខ្ញុំនៅមិនទាន់អស់ចិត្តដែលតុលាការមិនទាន់ផ្តល់សំណងសមូហភាពដល់ជនរងគ្រោះ។ សាលក្រមនេះគ្រាន់តែជាសំណងផ្លូវចិត្តប៉ុណ្ណោះ តុលាការនៅមិនទាន់ផ្តល់សំណងសមូហភាពដល់ជនរងគ្រោះនៅឡើយទេ។ សមាគមជនរងគ្រោះ “ក្សេមក្សាន្ត” ចង់បានស្តូបមួយសាងសង់នៅក្នុងបរិវេណសារមន្ទីរទួលស្ឡែងនេះ ដែលចារឈ្មោះជនរងគ្រោះទាំងអស់នៅមន្ទីរ ស-២១ ដើម្បីជាការចងចាំដល់ជនរងគ្រោះ និងដើម្បីទុកជាភ័ស្តុតាងប្រវត្តិសាស្រ្តដល់មនុស្សជំនាន់ក្រោយផង។ ខ្ញុំសុំតែប៉ុណ្ណឹងទៀតទេ ខ្ញុំអស់ចិត្តហើយ”។
ផ្នែកកិច្ចការសាធារណៈនៃ អ.វ.ត.ក បានបោះពុម្ពសាលដីកាទាំងស្រុងជាភាសាខ្មែរចំនួន ៥០០០ច្បាប់ និងសង្ខេបចំនួន ១៥ ០០០ច្បាប់ និងសាលដីកាទាំងស្រុងភាសាអស់គ្លេសចំនួន ១ ៦០០ច្បាប់ សម្រាប់ចែកជូនបណ្ណាល័យ មហាវិទ្យាល័យ សាកលវិទ្យាល័យ តុលាការខេត្តក្រុង ក្រសួង មន្ទីរ ក្នុងរដ្ឋាភិបាល និងអង្គការក្រៅរដ្ឋាភិបាល។ តំណាងអង្គការឬស្ថាប័នណាមួយក្នុងជួររដ្ឋាភិបាល ដែលមានបំណងស្នើសុំសៀវភៅសាលដីកាទាំងស្រុងឬសង្ខេប សូមទាក់ទងផ្នែកកិច្ចការសាធារណៈនៃ អ.វ.ត.ក តាមរយៈសារអេឡិកត្រូនិក www.pas@eccc.gov.kh ។