សប្តាហ៍ទីពីរនៃខែតុលា៖ សវនាការពាក់ព័ន្ធនឹងឯកសារស្តីអំពីរចនាសម្ព័ន្ធរដ្ឋបាល ដែលមានកាលវិភាគក្នុងលិខិតលេខ E233 នឹងចាប់ផ្តើមបន្ទាប់ពីការបញ្ចប់សក្ខីកម្មរបស់សាក្សី TCW-428។ បន្ទាប់មក អង្គជំនុំជម្រះសាលាដំបូងនឹងឈប់សម្រាកបុណ្យភ្ជុំបិណ្ឌ ពីថ្ងៃព្រហស្បតិ៍ ទី១១ និងថ្ងៃសុក្រ ទី១២ ខែតុលា ឆ្នាំ២០១២។
សប្តាហ៍ទី៣នៃខែតុលា៖ អង្គជំនុំជម្រះសាលាដំបូងនឹងបន្តសវនាការនៅថ្ងៃទី១៨ ខែតុលា ឆ្នាំ២០១២។ សវនាការក៏នឹងត្រូវបន្តធ្វើនៅថ្ងៃសុក្រ ទី១៩ ខែតុលា ដើម្បីឈានទៅធ្វើសេចក្តីសន្និដ្ឋានបញ្ចប់សវនាការអំពីឯកសារនៅក្នុងសប្តាហ៍កន្លងទៅ។
បន្ទាប់ពីការចេញលិខិតលេខ E236/1 អង្គភាពគាំពារសាក្សីនិងអ្នកជំនាញបានចាប់ផ្តើមជ្រើសរើសឈ្មោះសាក្សី ឬដើមបណ្តឹងរដ្ឋប្បវេណី ចេញពីក្នុងបញ្ជីឈ្មោះសាក្សីទាក់ទិននឹងការជម្លៀសប្រជាជន ដែលជនជាប់ចោទ អៀង សារី បានបដិសេធសិទ្ធិមានវត្តមាននៅក្នុងសវនាការ។ អង្គជំនុំជម្រះសាលាដំបូងនឹងចេញដីកាកោះអញ្ជើញសាក្សីទាំងនោះមកផ្តល់សក្ខីកម្មក្នុងពេលដ៏ឆាប់ៗខាងមុខនេះ។ សក្ខីកម្មទី១នៃសាក្សីទាំងនេះត្រូវបានរំពឹងថានឹងចាប់ផ្តើមនៅសប្តាហ៍ទី៤នៃខែតុលា ពោលគឺពីថ្ងៃច័ន្ទ ទី២២ បន្ទាប់ពីការបញ្ចប់សេចក្តីសន្និដ្ឋានលើសវនាការអំពីឯកសារ។