នៅថ្ងៃទី ២៣ ខែ កក្កដា ឆ្នាំ ២០១៣ អង្គជំនុំជម្រះតុលាការកំពូលនៃអង្គជំនុំជម្រះវិសាមញ្ញនៅក្នុងតុលាការកម្ពុជា (អ.វ.ត.ក) ចេញសេចក្តីសង្ខេបនៃសេចក្តីសម្រេចរបស់ខ្លួនស្តីពីបណ្តឹងសាទុក្ខភ្លាមៗរបស់សហព្រះរាជអាជ្ញា និង នួន ជា ប្រឆាំងនឹងសេចក្តីសម្រេចទីពីររបស់អង្គជំនុំជម្រះសាលាដំបូងក្នុងការបំបែកសំណុំរឿង ០០២ ទៅជាការជំនុំជម្រះជាបន្តបន្ទាប់ដាច់ដោយឡែកពីគ្នា។
ទោះបីជាបដិសេធបណ្តឹងសាទុក្ខលើអង្គសេចក្តីក៏ដោយ ក៏អង្គជំនុំជម្រះតុលាការកំពូលចេញចំណាត់ការកែតម្រូវ និង បង្គាប់ថា សវនាការលើភស្តុតាងក្នុងការជំនុំជម្រះទីពីរ (សំណុំរឿង ០០២/០២) ត្រូវតែចាប់ផ្តើមឱ្យបានឆាប់ រហ័សតាមដែលអាចធ្វើទៅបាន ក្រោយពីកិច្ចបិទការពិភាក្សាដេញដោលនៅក្នុងការជំនុំជម្រះនាពេលបច្ចុប្បន្នក្នុង សំណុំរឿង ០០២/០១។ លើសពីនេះទៀត អង្គជំនុំជម្រះបង្គាប់ថា សំណុំរឿង ០០២/០២ ត្រូវបញ្ចូលជាអប្បបរមា នូវបទចោទទាក់ទងទៅនឹង ស-២១, ការដ្ឋានធ្វើការ សហករណ៍ និងបទចោទប្រល័យពូជសាសន៍។ អង្គជំនុំ ជម្រះថែមទាំងបានបង្គាប់ឲ្យការិយាល័យរដ្ឋបាលនៃ អ.វ.ត.ក ស្វែងរកលទ្ធភាពក្នុងការបង្កើតនៅក្នុងអង្គជំនុំ ជម្រះសាលាដំបូងដដែលនូវក្រុមប្រឹក្សាជំនុំជម្រះទីពីរ ដែលមានចៅក្រមជាតិនិងអន្តរជាតិ ដើម្បីស្តាប់ និងជំនុំជម្រះ លើសំណុំរឿង ០០២/០២។ អង្គជំនុំជម្រះតុលាការកំពូលយល់ឃើញថា ទោះជាបានផ្តល់នូវការពិចារណាសមស្របទៅលើភាពជាតំណាងនៃដីកាបញ្ជូនរឿងទៅជំនុំជម្រះក្នុងសំណុំរឿង០០២ ទៅជាការជំនុំជម្រះតូចៗយ៉ាងណាក៏ដោយ ការខកខានរបស់អង្គ ជំនុំជម្រះសាលាដំបូងមិនគោរពតាមការបង្គាប់របស់ខ្លួន ស្តីពីការបង្កើតផែនការជាក់លាក់មួយសម្រាប់ការជំនុំជម្រះទៅលើបទចោទទាំងអស់ គឺជាកំហុសផ្នែកអង្គច្បាប់ និងកំហុសក្នុងការអនុវត្តឆន្ទានុសិទ្ធិរបស់ខ្លួន។ អង្គជំនុំជម្រះតុលាការកំពូលកត់សម្គាល់ឃើញថា អង្គជំនុំជម្រះសាលាដំបូងបានបដិសេធក្នុងការកែប្រែគោលជំហរ ពីដំបូងរបស់ខ្លួនលើការបំបែកកិច្ចដំណើរការនីតិវិធី ក្នុងការសម្របសម្រួលទៅតាមសំណើរបស់ភាគី និងដោះស្រាយ ក្តីបារម្ភណាមួយរបស់ភាគីដែលជាបច្ច័យនៃការបំបែកកិច្ចដំណើរការនីតិវិធីជាថ្មីសម្រាប់ការជំនុំជម្រះនាពេលអនាគត ហើយថា នេះបង្ហាញឱ្យឃើញថា អង្គជំនុំជម្រះសាលាដំបូង ប្រហែលជាពុំបានរៀបចំក្នុងការជំនុំជម្រះបទចោទ ដែលនៅសេសសល់នៅក្នុងដីកាដំណោះស្រាយនៅក្នុងការជំនុំជម្រះបច្ចុប្បន្នឡើយ។ អាស្រ័យហេតុនេះ អង្គជំនុំជម្រះ តុលាការកំពូលពិចារណាឃើញថា នៅក្នុងកាលៈទេសៈបច្ចុប្បន្ន ការបង្គាប់ឲ្យពង្រីកវិសាលភាពនៃសំណុំរឿង ០០២/០១ និងតម្រូវឱ្យអង្គជំនុំជម្រះសាលាដំបូងកែប្រែផែនការរបស់ខ្លួន នឹងបណ្តាលឱ្យមានការពន្យារពេល ដែលឥតចាំបាច់។ អង្គជំនុំជម្រះតុលាការកំពូលពិចារណាឃើញថា ចំណាត់ការសមស្របក្នុងកាលៈទេសៈបច្ចុប្បន្ន គឺត្រូវបង្គាប់ថា បទចោទដែលមិនបានដាក់បញ្ចូលនៅក្នុងវិសាលភាពនៃសំណុំរឿង ០០២/០១ នឹងក្លាយជាវិសាលភាពនៃសំណុំរឿង ០០២/០២ ដើម្បីធានាថា ការបូកបញ្ចូលគ្នានៃសំណុំរឿង ០០២/០១ និង ០០២/០២ នឹងក្លាយជាភាពតំណាង សមស្របនៃដីកាបញ្ជូនរឿងទៅជំនុំជម្រះក្នុងសំណុំរឿង ០០២។ បន្ថែមលើនេះទៀត អង្គជំនុំជម្រះតុលាការកំពូល ពិចារណាឃើញថា សំណុំរឿង ០០២/០២ ត្រូវតែចាប់ផ្តើមឱ្យបានឆាប់រហ័សតាមដែលអាចធ្វើទៅបាន និងថា ការបង្កើតក្រុមប្រឹក្សាជំនុំជម្រះទីពីរដើម្បីសម្រេចលើបញ្ហានេះ នាពេលបច្ចុប្បន្ន បានក្លាយជាបញ្ហាសំខាន់។ ជនជាប់ចោទដែលទទួលការជំនុំជម្រះក្នុងសំណុំរឿង ០០២ គឺ នួន ជា ដែលជាអនុលេខានៃបក្សកុម្មុយនីសកម្ពុជា និង ខៀវ សំផន ដែលជាប្រមុខរដ្ឋនៃកម្ពុជាប្រជាធិបតេយ្យ។ អង្គជំនុំជម្រះសាលាដំបូង ជាដំបូង បានសម្រេចបំបែកកិច្ចដំណើរការនីតិវិធីលើបទចោទ ក្នុងសំណុំរឿង ០០២ ទៅជាការជំនុំជម្រះតូចៗដាច់ដោយឡែកពីគ្នា ដែលសំណុំរឿងលើកទីមួយ ០០២/០១ កំពុងដំណើរការ។ ក្រោយពីទទួលបានបណ្តឹងសាទុក្ខរបស់សហព្រះ រាជអាជ្ញាប្រឆាំងនឹងវិសាលភាពនៃបទចោទក្នុងសំណុំរឿង ០០២/០១ អង្គជំនុំជម្រះតុលាការកំពូល នៅថ្ងៃទី ០៨ ខែ កុម្ភៈ ឆ្នាំ ២០១៣ បានមោឃៈដីកាបំបែកលើកដំបូងរបស់អង្គជំនុំជម្រះសាលាដំបូង។ បន្ទាប់ស្តាប់នូវទស្សនៈរបស់ភាគី អង្គជំនុំជម្រះ សាលាដំបូងបានចេញសេចក្តីសម្រេចបំបែកកិច្ចដំណើរការនីតិវិធីជាថ្មី នៅថ្ងៃទី ២៩ ខែ មីនា ឆ្នាំ ២០១៣ ដោយរក្សាទុកនូវវិសាលភាពនៃការជំនុំជម្រះដដែល នៅក្នុងសំណុំរឿង ០០២/០១ ដូចកាលពីមុន មុនពេលអង្គជំនុំជម្រះតុលាការកំពូលចេញសេចក្តីសម្រេចមោឃភាព។ លទ្ធផលនៃសេចក្តីសម្រេចលើបណ្តឹងសាទុក្ខចេញថ្ងៃនេះ ដោយដម្កល់វិសាលភាពនៃបទចោទក្នុងសំណុំរឿង ០០២/០១ គឺថា បទចោទទាំងនេះ កម្រិតត្រឹមតែ ឧក្រិដ្ឋកម្ម ប្រឆាំងមនុស្សជាតិទាក់ទងនឹងការជម្លៀសដោយបង្ខំចេញពីទីក្រុងភ្នំពេញ ក្នុងខែមេសា ឆ្នាំ១៩៧៥ ដំណាក់កាលទីពីរនៃការជម្លៀសដែលបានចាប់ផ្តើមក្នុងខែកញ្ញា ឆ្នាំ១៩៧៥ និងការសម្លាប់លើទាហាន លន់ នល់ នៅទួលពោធ៍ជ្រៃ ក្នុងខេត្តពោធិ៍សាត់។អង្គជំនុំជម្រះតុលាការកំពូលបង្គាប់ឱ្យស្វែងរកលទ្ធភាពបង្កើតក្រុមប្រឹក្សាជំនុំជម្រះទីពីរ ហើយច្រានចោលបណ្តឹងសាទុក្ខប្រឆាំងនឹងវិសាលភាពនៃសំណុំរឿង ០០២/០១
ព័ត៌មានថ្មីៗ
- សិស្សានុសិស្សចំនួន៩៥នាក់ មកពីវិទ្យាល័យបឹងត្របែក បំពេញទស្សនកិច្ចសិក្សាមជ្ឈមណ្ឌលធនធាន អ.វ.ត.ក.18 កក្កដា 2024
- សម្ដេចធិបតី ហ៊ុន ម៉ាណែត អញ្ជើញជាអធិបតីដ៏ខ្ពង់ខ្ពស់បញ្ចុះបឋមសិលានៅក្នុងមជ្ឈមណ្ឌលធនធាន អ.វ.ត.ក.17 កក្កដា 2024
- សិស្សានុសិស្សចំនួន ៣៦២៥នាក់ ក្នុងវិទ្យាល័យចំនួនប្រាំក្នុងខេត្តកំពង់ស្ពឺ ចាប់អារម្មណ៍យ៉ាងខ្លាំងចំពោះ កម្មវិធីផ្សព្វផ្សាយរបស់មជ្ឈមណ្ឌលធនធានចល័តរបស់សាលាក្ដីខ្មែរក្រហម13 កក្កដា 2024
- ដំណើរអញ្ជើញជាអធិបតីដ៏ខ្ពស់ខ្ពស់បំផុតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងពិធីទស្សនកិច្ច និងបញ្ចុះបឋមសិលាជានិមិត្តរូបនៅអគារអនុវត្តមុខងារសេសសល់របស់អ.វ.ត.ក.12 កក្កដា 2024
- ការជូនដំណឹងដើមបណ្តឹងរដ្ឋប្បវេណីបន្តធ្វើនៅខេត្តតាកែវ11 កក្កដា 2024
- សិស្សានុសិស្សប្រមាណ ២០០ នាក់ មកពីស្រុកបាភ្នំ ចូលរួមកម្មវិធីទស្សនកិច្ចសិក្សារបស់ អ.វ.ត.ក.10 កក្កដា 2024
- អគ្គលេខាធិការរងអង្គការសហប្រជាជាតិទទួលបន្ទុកសន្ដិភាព បំពេញទស្សនកិច្ចនៅមជ្ឈមណ្ឌលធនធាន អ.វ.ត.ក.5 កក្កដា 2024
- កិច្ចប្រជុំលើកដំបូងរបស់ក្រុមការងារសហប្រតិបត្តិការជាមួយអង្គការសហប្រជាជាតិ និងដៃគូអភិវឌ្ឍន៍សម្រាប់ការអនុវត្តមុខងារសេសសល់របស់ អ.វ.ត.ក.4 កក្កដា 2024
- កម្មសិក្សាការីអន្ដរជាតិចំនួន០៤រូប ដែលបានហាត់ការនៅក្នុងអង្គជំនុំជម្រះតុលាការកំពូលរបស់សាលាក្ដីខ្មែរក្រហម ធ្វើបទបង្ហាញអំពីសមិទ្ធផលស្រាវជ្រាវរបស់ពួកគេទាក់ទងនឹង អ.វ.ត.ក.1 កក្កដា 2024
- ការតែងតាំងចៅក្រមអន្តរជាតិថ្មី1 កក្កដា 2024