អត្ថបទព័ត៌មាន
អង្គជំនុំជម្រះតុលាការកំពូលសម្រេចចាត់ចំណាត់ប្រភេទឡើងវិញ នូវឯកសារសម្ងាត់ចំនួនជាង ១.៧០០ ច្បាប់
អង្គជំនុំជម្រះតុលាការកំពូលបានបញ្ចប់ការពិនិត្យឡើងវិញទៅលើចំណាត់ប្រភេទនៃឯកសារជាង ១២.០០០ ដែលជាប្រភេទឯកសារសម្ងាត់និងសម្ងាត់បំផុតក្នុងសំណុំរឿង ០០១។ ក្នុងនោះ អង្គជំនុំជម្រះបានធ្វើចំណាត់ប្រភេទឯកសារសរុបចំនួន ១.៧៤៩ ថាជាឯកសារសាធារណៈ។ ឯកសារទាំងនេះមានជាអាទិ៍ ឯកសារក្នុងអំឡុងរបបកម្ពុជាប្រជាធិបតេយ្យ ដែលរួមមាន “ចម្លើយសារភាព” និងជីវប្រវត្តិរបស់ជនរងគ្រោះ ចម្លើយសាក្សី ប្រតិចារឹកនៃសវនាការអសាធារណៈ (in camera) និងដីកាចាត់ឲ្យស៊ើបសួរជំនួស។
សវនាការថ្ងៃទី ៣០-៣១ សីហា ទាក់ទិននឹងស្ថានភាពកាយសម្បទានិងបញ្ញាស្មារតីរបស់ អៀង ធីរិទ្ធ ក្នុងការចូលរួមការជំនុំជម្រះ
អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នឹងបើកសវនាការនៅ ថ្ងៃទី ៣០-៣១ ខែសីហា ឆ្នាំ២០១២នេះ ទាក់ទិននឹងស្ថានភាពកាយសម្បទានិងបញ្ញាស្មារតីរបស់ អៀង ធីរិទ្ធ ក្នុងការចូលរួមសវនាការ។ អង្គជំនុំជម្រះនឹងស្តាប់របាយការណ៍វាយតម្លៃរបស់អ្នកជំនាញវេជ្ជសាស្រ្តដែលត្រូវបានចាត់តាំងដោយ អ.វ.ត.ក ឲ្យទទួលខុសត្រូវពិនិត្យស្ថានភាពកាយសម្បទានិងបញ្ញាស្មារតីរបស់ អៀង ធីរិទ្ធ នាពេលថ្មីៗនេះ បន្ទាប់ពីគាត់បានទទួលការព្យាបាលបន្ថែម។
ប្រទេសអូស្រ្តាលីផ្តល់ជំនួយថវិកាបន្ថែមចំនួន ១,៤ លានដុល្លារអូស្រ្តាលី ដល់ អ.វ.ត.ក
ប្រទេសអូស្រ្តាលីបានផ្តល់ជំនួយថវិកាបន្ថែមចំនួន ១,៤ លានដុល្លារអូស្រ្តាលី (ប្រមាណ ១,៤៦ លានដុល្លារអាមេរិក) ដល់ភាគីអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។ ជំនួយថវិកាថ្មីនេះ ដែលត្រូវបានប្រកាសដោយឯកឧត្តម បប់ ខារ រដ្ឋមន្ត្រីការបរទេស និងជាសមាជិកសភាអូស្រ្តាលី ក្នុងអំឡុងដំណើរទស្សនកិច្ចជាផ្លូវការរបស់ឯកឧត្តមនៅរាជធានីភ្នំពេញកាលពីខែកក្កដា ឆ្នាំ២០១២ ត្រូវបានផ្ទេរទៅអង្គការសហប្រជាជាតិរួចហើយ។
សំណួរ-ចម្លើយទាក់ទងនឹងសវនាការលើស្ថានភាពកាយសម្បទានិងបញ្ញាស្មារតីរបស់ អៀង ធីរិទ្ធ ក្នុងការចូលរួមការជំនុំជម្រះ
បន្ទាប់ពីបានផ្តល់សេវាព្យាបាលដល់ អៀង ធីរិទ្ធ អង្គជំនុំជម្រះសាលាដំបូងនឹងបើកសវនាការនៅថ្ងៃទី៣០ និង ៣១ ខែសីហា ឆ្នាំ២០១២នេះ ដើម្បីស្តាប់ការវាយតម្លៃរបស់អ្នកជំនាញវេជ្ជសាស្រ្តលើស្ថានភាពកាយសម្បទានិងបញ្ញាស្មារតីរបស់ អៀង ធីរិទ្ធ ក្នុងការចូលរួមការជំនុំជម្រះ។ ខាងក្រោមនេះគឺជាចម្លើយតបទៅនឹងសំណួរមួយចំនួនពាក់ព័ន្ធនឹងសវនាការលើស្ថានភាពកាយសម្បទានិងបញ្ញាស្មារតីរបស់ អៀង ធីរិទ្ធ ក្នុងការចូលរួមសវនាការ។
អង្គភាពគាំពារជនរងគ្រោះនឹងរៀបចំវេទិកាថ្នាក់តំបន់លើកទី៣ ឆ្នាំ២០១២ នៅខេត្តសៀមរាប សម្រាប់ដើមបណ្តឹងរដ្ឋប្បវេណីនៃសំណុំរឿង ០០២
អង្គភាពគាំពារជនរងគ្រោះនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នឹងរៀបចំវេទិកាថ្នាក់តំបន់លើកទី៣ ក្នុងឆ្នាំ២០១២នេះ នៅខេត្តសៀមរាប សម្រាប់ដើមបណ្តឹងរដ្ឋប្បវេណីចំនួន ២០០ នាក់ ក្នុងចំណោមដើមបណ្តឹងរដ្ឋប្បវេណីចំនួន ៣៨៦៤នាក់ នៃសំណុំរឿង០០២។ វេទិកាថ្នាក់តំបន់នេះនឹងធ្វើនៅសណ្ឋាគារ អលសិនអង្គរប៉ារ៉ាឌី នៅថ្ងៃសៅរ៍ ទី២៥ ខែសីហា ឆ្នាំ២០១២ វេលាម៉ោង ៨:០០ព្រឹក ដល់ ម៉ោង ៤:០០ រសៀល។ (អត្តសញ្ញាណរបស់ដើមបណ្តឹងរដ្ឋប្បវេណីនឹងត្រូវបានរក្សាជាសម្ងាត់) ។
អ.វ.ត.ក ស្វាគមន៍សាធារណជនទី ៥០ ០០០ ដែលចូលរួមទស្សនាសវនាការក្នុងសំណុំរឿង ០០២
«អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) សូមអបអរសាទរចំពោះសាធារណជនទី ៥០ ០០០ ដែលបានចូលរួមទស្សនាដោយផ្ទាល់ដំណើការសវនាការសំណុំរឿង០០២»។ លិខិតបញ្ជាក់នេះត្រូវបានផ្តល់ជូនលោក កឹម សាម៉ាញ អាយុ ២៤ឆ្នាំ ជាគ្រូបង្រៀនថ្នាក់ទី៥ សាលាបឋមសិក្សាក្រពុំឈូក ស្រុកកោះអណ្តែត ខេត្តតាកែវ កាលពីព្រឹកថ្ងៃទី៨ ខែសីហា ឆ្នាំ២០១២ ដោយមន្ត្រីកិច្ចការសាធារណៈនៃ អ.វ.ត.ក ក្នុងឱកាសលោកអញ្ជើញចូលរួមទស្សនាដោយផ្ទាល់សវនាការជំនុំជម្រះក្តីក្នុងសំណុំរឿង០០២ ជាមួយប្រជាពលរដ្ឋជាង ៣០០នាក់ ផ្សេងទៀតមកពីស្រុកជាមួយលោក។ វត្ថុអនុស្សាវរីយ៍រួមមានមួក អាវយឺត សៀវភៅសាលដីកាស្ថាពរសំណុំរឿង ០
វីដេអូថ្មី ៖ សវនាការក្នុងសំណុំរឿង០០២ - ផ្នែកទី ១
ផ្នែកកិច្ចការសាធារណៈបានផលិតវីដេអូឯកសារថ្មី ដែលមានចំណងជើងថា "សវនាការក្នុងសំណុំរឿង០០២ ផ្នែកទី១"។ វីដេអូឯកសារនេះបង្ហាញអំពីដំណាក់កាលដំបូងនៃដំណើរការនីតិវិធីក្នុងសំណុំរឿង០០២ ចាប់ពីខែវិច្ឆិកា ឆ្នាំ២០១១។
ការរៀបចំដំណើរមកដល់របស់សហចៅក្រមស៊ើបអង្កេតអន្តរជាតិ
ថ្ងៃទី១២ ខែកក្កដា ឆ្នាំ២០១២ រាជរដ្ឋាភិបាលកម្ពុជាបានជូនដំណឹងទៅអង្គការសហប្រជាជាតិ អំពីសេចក្តីសម្រេចរបស់ឧត្តមក្រុមប្រឹក្សានៃអង្គចៅក្រមនៃព្រះរាជាណាចក្រកម្ពុជា កាលពីថ្ងៃទី២០ ខែមិថុនា ឆ្នាំ២០១២ ដែលតែងតាំងសហចៅក្រមស៊ើបអង្កេតអន្តរជាតិ លោក ម៉ាក ហាម៉ុន ជនជាតិអាមេរិក និងសហចៅក្រមស៊ើបអង្កេតបម្រុងអន្តរជាតិ លោក អូលីវីយេ បូវ៉ាឡេត ជនជាតិបារាំង នៅអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)។
ប្រទេសនូវែលហ្សេឡង់ប្រកាសសន្យាផ្តល់ជំនួយថវិកាបន្ថែមដល់ អ.វ.ត.ក
ប្រទេសនូវែលហ្សេឡង់បានប្រកាសសន្យាផ្តល់ជំនួយថវិកាបន្ថែមចំនួន ១ សែនដុល្លារនូវែលហ្សេឡង់ ដល់ភាគីអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ។ការប្រកាសសន្យានេះធ្វើឡើងនៅរាជធានីភ្នំពេញ នៅថ្ងៃទី១២ ខែកក្កដា ឆ្នាំ២០១២ ខណៈដែលលោករដ្ឋមន្ត្រីក្រសួងការបរទេសនូវែលហ្សេឡង់ មូរេ ម៉ាក្ស ឃុលលី ជួបប្រជុំជាមួយរដ្ឋមន្ត្រីការបរទេសកម្ពុជា ឯកឧត្តម ហោ ណាំហុង។
រដ្ឋមន្ត្រីកិច្ចការបរទេសអង់គ្លេសធ្វើទស្សនកិច្ចនៅ អ.វ.ត.ក
សមាជិកសភាអង់គ្លេសនិងជារដ្ឋមន្ត្រីទទួលបន្ទុកការិយាល័យកិច្ចការបរទេសនៃចក្រភពអង់គ្លេស លោក ជេរេមី ប្រោន បានធ្វើទស្សនកិច្ចរយៈពេលមួយម៉ោង នៅអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅរសៀលថ្ងៃនេះ ដែលជាផ្នែកមួយនៃដំណើរទស្សនកិច្ចផ្លូវការរយៈពេល១ថ្ងៃនៅព្រះរាជាណាចក្រកម្ពុជា។
ស្ថាប័នរដ្ឋាភិបាលនិងគ្រឹះស្ថានអប់រំបានទទួលសៀវភៅសាលដីកា ឌុច
តំណាងក្រសួង មន្ទីរ ស្ថាប័នរដ្ឋាភិបាល សាកលវិទ្យាល័យ បណ្ណាល័យ និង និសិ្សត ប្រមាណជាង៤០០នាក់ បានចូលរួមក្នុងពិធីចែកចាយសៀវភៅសាលដីកាស្ថាពរនៃសំណុំរឿង00១ ដែលប្រព្រឹត្តទៅនៅអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ព្រឹកថ្ងៃទី១១ ខែកក្កដា ឆ្នាំ២០១២ នេះ ក្រោមអធិបតីភាពឯកឧត្តម ក្រាញ់ តូនី ប្រធានការិយាល័យរដ្ឋបាលស្តីទីនៃ អ.វ.ត.ក។ ពិធីនេះគឺជានិមិត្តរូបនៃការផ្សព្វផ្សាយនិងចែកចាយជាផ្លូវការដល់សាធារណជន នូវសាលដីកាស្ថាពរនៃសំណុំរឿង ០០១ ប្រឆាំងនិង កាំង ហ្កេកអ៊ាវ ហៅ ឌុច ដែលត្រូវបានអង្គជំនុំជម្រះតុលាការកំពូលផ្តន្ទាទោសដាក់ពន្ធនាគារអស់មួយជីវិត។
មន្ត្រី៖ “អ.វ.ត.ក ជំនុំជម្រះតែអតីតមេដឹកនាំជាន់ខ្ពស់និងអ្នកដែលទទួលខុសត្រូវខ្ពស់បំផុត ចំពោះឧក្រិដ្ឋកម្មធ្ងន់ធ្ងរដែលត្រូវបានប្រព្រឹត្តក្នុងរបបកម្ពុជាប្រជាធិបតេយ្យ”
“អ.វ.ត.ក ត្រូវបានបង្កើតឡើងដើម្បីជំនុំជម្រះតែអតីតមេដឹកនាំជាន់ខ្ពស់និងអ្នកដែលទទួលខុសត្រូវខ្ពស់បំផុត ចំពោះឧក្រិដ្ឋកម្មធ្ងន់ធ្ងរដែលត្រូវបានប្រព្រឹត្តក្នុងរបបកម្ពុជាប្រជាធិបតេយ្យ ចន្លោះពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី ៦ ខែមករា ឆ្នាំ១៩៧៩ ប៉ុណ្ណោះ។ អ្នកដែលជាសាច់សារលោហិត ជាមិត្តភក្តិ ឬធ្លាប់បម្រើ ខ្មែរក្រហម ពុំត្រូវបាននាំយកមកជំនុំជម្រះឡើយ”។
អង្គជំនុំជម្រះសាលាដំបូងលើកពេលសវនាការក្នុងសំណុំរឿង ០០២ ទៅថ្ងៃពុធ ទី១៨ ខែកក្កដា ឆ្នាំ២០១២
អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានលើកពេលសវនាការសាធារណៈក្នុងសំណុំរឿង ០០២ ដែលគ្រោងធ្វើនៅថ្ងៃច័ន្ទ ទី១៦ និងថ្ងៃអង្គារ៍ ទី១៧ ខែកក្កដា ឆ្នាំ២០១២ ទៅធ្វើនៅថ្ងៃពុធ ទី១៨ ខែកក្កដា ឆ្នាំ២០១២ ចាប់ពីម៉ោង ៩:០០ ព្រឹក ដោយអង្គជំនុំជម្រះនឹងស្តាប់សក្ខីកម្មរបស់អ្នកជំនាញ ដេវីដ ឆេនដល័រ។
សេចក្តីសម្រេចរបស់អង្គជំនុំជម្រះសាលាដំបូងស្តីពីកំហុសវិជ្ជាជីវៈ របស់មេធាវីការពារក្តី នួន ជា
នៅថ្ងៃទី២៩ ខែមិថុនា ឆ្នាំ២០១២ អង្គជំនុំជម្រះសាលាដំបូងបានចេញសេចក្តីសម្រេចស្តីពីកំហុសវិជ្ជាជីវៈរបស់មេធាវីការពារក្តី នួន ជា។ សេចក្តីសម្រេចនេះ ដែលជាឯកសារសាធារណៈ និងត្រូវបានចេញបន្ទាប់ពីមានការព្រមានដោយផ្ទាល់មាត់មួយនៅក្នុងតុលាការនាថ្ងៃទី២១ ខែមិថុនា ឆ្នាំ២០១២ បានផ្តល់ជាឧទាហរណ៍ជាច្រើននៃកំហុសវិជ្ជាជីវៈរបស់មេធាវីអន្តរជាតិនៃក្រុមមេធាវីការពារក្តី នួន ជា ចំនួនពីររូប (លោក Michiel PESTMAN និង លោក Andrew IANUZZI)។ សេចក្តីសម្រេចនេះត្រូវចេញដោយមានទាំងការជូនដំណឹងទៅគណៈមេធាវី Amsterdam និងគណៈមេធាវីរដ្ឋ New York ដែលលោក PESTMAN និង លោក IANUZZI ជាសមាជិ
អង្គជំនុំជម្រះសាលាដំបូងផ្អាកសវនាការលើសំណុំរឿង ០០២
បន្ទាប់ពីបញ្ចប់សវនាការសាធារណៈនៅរសៀលថ្ងៃនេះ អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានផ្អាកសវនាការលើសំណុំរឿង ០០២ និងលើកទៅបន្តធ្វើនៅថ្ងៃទី១៦ ខែកក្កដា ឆ្នាំ២០១២។ សវនាការនឹងបន្តធ្វើនៅម៉ោង ៩ព្រឹក ថ្ងៃច័ន្ទ ទី១៦ ខែកក្កដា ដោយស្តាប់សក្ខីកម្មរបស់លោកបណ្ឌិត ដេវីដ ឆេនដល័រ។
ប្រទេសស៊ុយអែដប្រកាសសន្យាផ្តល់ជំនួយថវិកាចំនួន ២៨ លានក្រោន ស្មើនឹងប្រមាណ ៤ លានដុល្លារអាមេរិក
ប្រទេសស៊ុយអែដបានប្រកាសសន្យាផ្តល់ជំនួយថវិកាចំនួន ២៨ លានក្រោន (ប្រមាណ ៤ លានដុល្លារអាមេរិក) ដល់ភាគីអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) សម្រាប់ការចំណាយឆ្នាំ២០១២ និង ២០១៣ ទៅតាមគម្រោងថវិកាដែលបានអនុម័តរួចហើយ។ វិភាគទាននៃថវិកានេះគឺ ៥០% សម្រាប់ចំណាយក្នុងឆ្នាំ២០១២ ហើយ ៥០% ទៀតសម្រាប់ការចំណាយក្នុងឆ្នាំ២០១៣។
លោក JUSTICE STEVEN J. BWANA ត្រូវបានតែងតាំងជាចៅក្រមបម្រុងអន្តរជាតិនៅអង្គបុរេជំនុំជម្រះ
ដោយអនុលោមតាមការជ្រើសតាំងរបស់លោកអគ្គលេខាធិការអង្គការសហប្រជាជាតិ បាន គីមូន និង ដោយមានការបោះឆ្នោតសម្រេចដោយឧត្តមក្រុមប្រឹក្សានៃអង្គចៅក្រម ព្រះមហាក្សត្រនៃព្រះរាជាណាចក្រកម្ពុជា ព្រះបាទ នរោត្តម សីហមុនី បានតែងតាំងលោក Justice Steven J. Bwana (មកពីប្រទេសតង់ហ្សានី) ជាចៅក្រមបម្រុងអន្តរជាតិថ្មីនៅអង្គបុរេជំនុំជម្រះនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ជំនួសលោកស្រីចៅក្រម Kathinka Lahuis (មកពីប្រទេសហុល្លង់)។
សេចក្តីថ្លែងការណ៍ជាសាធារណៈរបស់សហព្រះរាជអាជ្ញា អំពីសំណុំរឿង ០០៣
សហព្រះរាជអាជ្ញានៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ចេញសេចក្តីថ្លែងការណ៍ជាសាធារណៈនេះគឺដើម្បីជូនដំណឹងឲ្យបានជ្រាបអំពីកិច្ចដំណើរការនីតិវិធីក្នុងសំណុំរឿងលេខ ០០៣ ជាពិសេសទាក់ទិននឹងព័ត៌មានដែលបានផ្សាយនៅលើទំព័រសារព័ត៌មានដែលថា មានអង្គហេតុថ្មីៗដែលគេអះអាងថាមានការទាក់ទងទៅនឹងការស៊ើបសួរនៅក្នុងសំណុំរឿង ០០៣ គឺជាព័ត៌មានមិនត្រឹមត្រូវនិងដែលនាំឲ្យមានការយល់ច្រឡំកាន់តែខ្លាំងឡើង។ ដោយសារតែ សំណុំរឿង ០០៣ នេះកំពុងតែស្ថិតក្នុងកិច្ចស៊ើបសួរនៅឡើយ សហព្រះរាជអាជ្ញាបានស្វែងរកនិងបានទទួលសិទ្ធិអំណាចក្នុងការធ្វើសេចក្តីថ្លែងការណ៍នេះ។
សេចក្តីប្រកាសព័ត៌មានរបស់អង្គជំនុំជម្រះសាលាដំបូង ទាក់ទិននឹងអំពើហិង្សាផ្លូវភេទ
ក្នុងពេលថ្មីៗនេះ លោកស្រី Margot Wallström តំណាងពិសេសនៃអគ្គលេខាធិការអង្គការសហប្រជាជាតិទទួលបន្ទុកបញ្ហាអំពើហិង្សាផ្លូវភេទក្នុងគ្រាមានជម្លោះ បានណែនាំឲ្យរដ្ឋាភិបាលកម្ពុជា និង អ.វ.ត.ក “ប្រើនូវសមត្ថភាពឯករាជ្យរបស់ខ្លួនឲ្យបានពេញលេញ ក្នុងការគោរពដល់សេចក្តីក្លាហានរបស់ជនរងគ្រោះពីអំពើហិង្សាផ្លូវភេទក្នុងសម័យខ្មែរក្រហម និងឲ្យទទួលស្គាល់ពលិកម្មរបស់ជនរងគ្រោះនិងអ្នកនៅរស់រានមានជីវិតពីសម័យនោះ”។
សេចក្តីប្រកាសព័ត៌មានរបស់ចៅក្រម ម៉ូតូ ណូហ្គូឈី នៃអង្គជំនុំជម្រះតុលាការកំពូល អំពីការលាលែងរបស់លោក
ចៅក្រម Motoo Noguchi មកពីប្រទេសជប៉ុន ដែលជាចៅក្រមនៃអង្គជំនុំជម្រះតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានបញ្ជូនពាក្យសុំលាលែងពីការងាររបស់លោក ទៅលោកអគ្គលេខាធិការអង្គការសហប្រជាជាតិ នៅថ្ងៃទី១៦ ខែឧសភា ឆ្នាំ២០១២។ ពាក្យសុំលាលែងរបស់លោកនឹងចូលជាធរមានក្នុងអំឡុងពេល៦០ថ្ងៃ គឺនៅថ្ងៃទី១៥ ខែកក្កដា ឆ្នាំ២០១២។ លោកនឹងវិលត្រឡប់ទៅបម្រើការងារនៅក្រសួងយុត្តិធម៌ជប៉ុនវិញ។
សេចក្តីប្រកាសព័ត៌មានរបស់សហចៅក្រមស៊ើបអង្កេតអន្តរជាតិបម្រុង
ចាប់តាំងពីពេលចូលបំពេញមុខងារនៅ អ.វ.ត.ក មក សហចៅក្រមស៊ើបអង្កេតអន្តរជាតិបម្រុងបានខិតខំប្រឹងប្រែងអស់កម្លាំងកាយចិត្ត រហូតដល់ដំណាក់កាលចុងក្រោយ ដើម្បីបន្តការស៊ើបអង្កេតលើសំណុំរឿង ០០៣ និង០០៤ ដ៏ចម្រូងចម្រាស ដោយគោរពច្បាប់ និងគោរពដល់ជនរងគ្រោះ។ ក្រៅពីការចុះស៊ើបអង្កេតដល់កន្លែង ជនសង្ស័យត្រូវបានជូនដំណឹងអំពីសិទ្ធិរបស់ខ្លួន និងទទួលបានការអនុញ្ញាតឲ្យចូលមើលសំណុំរឿង។ តាមរយៈសេចក្តីសម្រេចស្តីពីសមត្ថកិច្ចរបស់ អ.វ.ត.ក ក្នុងការជំនុំជម្រះសំណុំរឿង ០០៣ អង្គហេតុកំពុងស៊ើបសួរត្រូវបានជូនដំណឹងជាសាធារណៈ ដើម្បីអនុញ្ញាតឲ្យជនរងគ្រោះដឹង និងប្រើប្រាស់សិទ្ធិរបស់ខ្លួន។
អង្គជំនុំជម្រះសាលាដំបូងផ្អាកសវនាការលើសំណុំរឿង ០០២ និងលើកទៅបន្តធ្វើនៅថ្ងៃទី ១៧ ខែឧសភា ឆ្នាំ២០១២
បន្ទាប់ពីធ្វើសេចក្តីសន្និដ្ឋានបញ្ចប់សវនាការសាធារណៈនៅព្រឹកមិញនេះ អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានផ្អាកសវនាការលើសំណុំរឿង ០០២ និងលើកទៅបន្តធ្វើចាប់ពីម៉ោង ៩ព្រឹក ថ្ងៃទី១៧ ខែឧសភា ឆ្នាំ២០១២។
លោក មុំ លុជ្ស ត្រូវបានតែងតាំងជាមេធាវីជាតិការពារក្តី
អង្គភាពគាំពារការការពារក្តីនៃអង្គជំនុំជម្រះវិសាមញ្ញក្នុងតុលាការកម្ពុជា បានតែងតាំងលោក មុំ លុជ្ស ជាមេធាវីជាតិតំណាងជនសង្ស័យមួយរូបដែលមានឈ្មោះនៅក្នុងដីកាបញ្ជូនរឿងឲ្យស៊ើបសួរលើកទីបី ដែលសហព្រះរាជអាជ្ញាអន្តរជាតិបានផ្ញើជូនទៅការិយាល័យសហចៅក្រមស៊ើបអង្កេត នៅថ្ងៃទី៧ ខែកញ្ញា ឆ្នាំ២០០៩។ ដីកាបញ្ជូនសំណុំរឿងឲ្យស៊ើបសួរលើកទីបីគឺជាផ្នែកមួយនៃសំណុំរឿង ០០៤។ លោក មុំ លុជ្ស មានបទពិសោធន៍ជាមេធាវី រយៈពេល១៧ឆ្នាំ មកហើយ ដោយបំពេញការងារចម្បងនៅក្នុងវិស័យច្បាប់ព្រហ្មទណ្ឌ។ អត្តសញ្ញាណរបស់ជនសង្ស័យដែលមានឈ្មោះនៅក្នុងដីកាបញ្ជូនសំណុំរឿងឲ្យស៊ើបសួរលើកទីបីត្រូវស្ថិតនៅជាសម្ងាត់។