សំណុំរឿង
០០១
ពាក់ព័ន្ធការចោទប្រកាន់ប្រឆាំងនឹង កាំង ហ្កេកអ៊ាវ (ហៅ ឌុច) ដែលជាប្រធានមន្ទីរសន្តិសុខ ស-២១ នៅភ្នំពេញ។
សំណុំរឿង
០០២
ពាក់ព័ន្ធការចោទប្រកាន់ប្រឆាំងនឹង
មេដឹកនាំនួន ជា, ខៀវ សំផន, អៀង សារី, និងអៀង ធីរិទ្ធ។
សំណុំរឿង
០០៣
ពាក់ព័ន្ធការចោទប្រកាន់ មាស មុត
មេបញ្ជាការកងពលលេខ១៦៤ (កងទ័ពជើងទឹក) និង ស៊ូ ម៉េត មេបញ្ជាការកងពលលេខ៥០២ (កងទ័ពអាកាស) មុនពេលលោកស្លាប់។
សំណុំរឿង
០០៤
ពាក់ព័ន្ធនឹងការចោទប្រកាន់នានាប្រឆាំងនឹង អ៉ឹម ចែម, យឹម ទិត្យ និង អោ អាន។
ជនសង្ស័យនិង
ជនជាប់ចោទ
កាំង ហ្កេកអ៊ាវ
កាំង ហ្កេកអ៊ាវ ហៅ “ឌុច” (ឆ្នាំ១៩៤២-ឆ្នាំ២០២០) គឺជាប្រធាន មន្ទីរសន្តិសុខ ស-២១ នៅភ្នំពេញ ដែលជាកន្លែងឃុំឃាំងខុសច្បាប់ សួរចម្លើយ និងសម្លាប់ជនដែលត្រូវគេចាត់ទុកថាជាខ្មាំងរបស់បក្សកុម្មុយនីស្តកម្ពុជា (“ប.ក.ក”)។ ឌុច ត្រូវបានកាត់ទោសឱ្យជាប់ពន្ធនាគារអស់មួយជីវិត ដោយសារការចូលរួមរបស់គាត់នៅក្នុងឧក្រិដ្ឋកម្មប្រឆាំងមនុស្សជាតិ និងការបំពារបំពានយ៉ាងធ្ងន់ធ្ងរទៅលើ
អនុសញ្ញាទីក្រុងហ្សឺណែវ ដែលបានប្រព្រឹត្តនៅមន្ទីរសន្តិសុខ ស-២១។
នួន ជា
នួន ជា មានឈ្មោះកំណើត ឡៅ គឹមលន (ឆ្នាំ១៩២៦-ឆ្នាំ២០១៩) គឺជាអនុលេខា ប.ក.ក ជាប្រធានសភាតំណាងប្រជាជន និងជានាយករដ្ឋមន្ត្រីស្តីទីបណ្តោះអាសន្ននៃកម្ពុជាប្រជាធិបតេយ្យ។ គាត់ត្រូវបានកាត់ទោសឱ្យជាប់ពន្ធនាគារអស់មួយជីវិតពីបទអំពើប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងការបំពារបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវ។
អៀង សារី
អៀង សារី មានឈ្មោះកំណើត គឹម ត្រឹង (ឆ្នាំ១៩២៥-ឆ្នាំ២០១៣)។ គាត់ជាឧបនាយករដ្ឋមន្ត្រីទទួលបន្ទុកកិច្ចការបរទេសនៃកម្ពុជាប្រជាធិបតេយ្យ។ គាត់ត្រូវបានចោទប្រកាន់បញ្ជូនទៅជំនុំជម្រះពីបទអំពើប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ ការបំពារបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវ និងឧក្រិដ្ឋកម្មក្រោមក្រមព្រហ្មទណ្ឌកម្ពុជា។ កិច្ចដំណើរការនីតិវិធីប្រឆាំងគាត់ ត្រូវបានបញ្ចប់នៅថ្ងៃទី១៤ ខែមីនា ឆ្នាំ២០១៣ បន្ទាប់ពីគាត់ទទួលមរណភាព។
អៀង ធីរិទ្ធ
អៀង ធីរិទ្ធ (ឆ្នាំ១៩៣២-ឆ្នាំ២០១៥) គឺជារដ្ឋមន្ត្រីសង្គមកិច្ចនៃកម្ពុជា
ប្រជាធិបតេយ្យ។ គាត់ត្រូវបានចោទប្រកាន់បញ្ជូនទៅជំនុំជម្រះពីបទអំពើប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ ការបំពារបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវ និងឧក្រិដ្ឋកម្មក្រោមក្រមព្រហ្មទណ្ឌកម្ពុជា។ គាត់ត្រូវបានរកឃើញថាមិនមាន នីតិសម្បទាអាចទទួលការជំនុំជម្រះ ប៉ុន្តែនៅស្ថិតក្រោមការត្រួតពិនិត្យរបស់តុលាការរហូតដល់គាត់ទទួលមរណភាព។
មាស មុត
មាស មុត(កើតឆ្នាំ ១៩៣៨) គឺជាមេបញ្ជាការនៃកងទ័ពជើងទឹក (កងពលលេខ ១៦៤) នៅកម្ពុជាប្រជាធិបតេយ្យ និងជាលេខាតំបន់ស្វយ័តកំពង់សោម។ គាត់ត្រូវបានសហចៅក្រមស៊ើបអង្កេតអន្តរជាតិ ដាក់ឱ្យស្ថិតនៅក្រោមការពិនិត្យ និងចោទប្រកាន់បញ្ជូនទៅជំនុំជម្រះនៅក្នុងសំណុំរឿង ០០៣ ចំណែកឯ សហចៅក្រមស៊ើបអង្កេតជាតិ បានលើកលែងការចោទប្រកាន់គាត់ ដោយសារមិនមានយុត្តាធិការបុគ្គល។ សំណុំរឿងដែលចោទប្រកាន់ មាស មុត ត្រូវបានបញ្ចប់នៅឆ្នាំ២០២១។
អ៉ឹម ចែម
អ៉ឹម ចែម (កើតឆ្នាំ ១៩៤៦) គឺជាលេខាស្រុកព្រះនេត្រព្រះ នៅតំបន់ ៥ (ភូមិភាគពាយ័ព្យ)។ គាត់ត្រូវបានសហចៅក្រមស៊ើបអង្កេតអន្តរជាតិ ដាក់ឱ្យស្ថិតនៅក្រោមការពិនិត្យនៅក្នុងសំណុំ០០៤ (ក្រោយមក សំណុំរឿង ០០៤/០១)។ សហចៅក្រមស៊ើបអង្កេត បានរួមគ្នាលើកលែងការចោទប្រកាន់ អ៉ឹម ចែម នៅឆ្នាំ២០១៧ ដោយសារមិនមានយុត្តាធិការបុគ្គល។
អោ អាន
អោ អាន (ឆ្នាំ១៩៣៣-ឆ្នាំ២០២០) គឺជាលេខាតំបន់៤១ មុនពេលត្រូវបានតែងតាំងជាអនុលេខាភូមិភាគកណ្តាល។ គាត់ត្រូវបានសហចៅក្រមស៊ើបអង្កេតអន្តរជាតិ ដាក់ឱ្យស្ថិតនៅក្រោមការពិនិត្យ និងចោទប្រកាន់បញ្ជូនទៅជំនុំជម្រះនៅក្នុងសំណុំរឿង ០០៤ (ក្រោយមកបំបែកទៅជា សំណុំរឿង ០០៤ /០២) ចំណែកឯ សហចៅក្រមស៊ើបអង្កេតជាតិបានលើកលែងការចោទប្រកាន់គាត់ ដោយសារកង្វះយុត្តាធិការបុគ្គល។ សំណុំរឿងដែលចោទ អោ អាន ត្រូវបានបញ្ចប់ដោយអង្គជំនុំជម្រះតុលាការកំពូល នៅឆ្នាំ២០២១ ដោយសារពុំមានដីកាបញ្ជូនរឿងទៅជំនុំជម្រះជាក់លាក់ និងអាចអនុវត្តបាន។
យឹម ទិត្យ
យឹម ទិត្យ (កើតឆ្នាំ ១៩៣៦) គឺជាលេខាតំបន់ ១, ៣ និង៤ (ភូមិភាគពាយ័ព្យ) និងតំបន់ ១៣ (ភូមិភាគនិរតី) និងជាលេខាស្រុកគិរីវង់។ គាត់ត្រូវបានសហចៅក្រមស៊ើបអង្កេតអន្តរជាតិ ដាក់ស្ថិតក្រោមការពិនិត្យ និងចោទប្រកាន់បញ្ជូនទៅជំនុំជម្រះនៅក្នុងសំណុំរឿង ០០៤ ចំណែកឯ សហចៅក្រមស៊ើបអង្កេតជាតិ បានលើកលែងការចោទប្រកាន់គាត់ ដោយសារកង្វះយុត្តាធិការបុគ្គល។ សំណុំរឿងដែលចោទ យឹម ទិត្យ ត្រូវបានបញ្ចប់នៅឆ្នាំ២០២១។
